Youtube ៖ ករណីដែលគូស្នេហ៍ Youtuber អង់គ្លេសមួយគូបានបង្ហោះចែកចាយវីដេអូ Vlog ចែករំលែកបទពិសោធជីវិតដ៏អាក្រក់ពេលបានមកកម្សាន្តនៅកម្ពុជា កំពុងតែមានការចាប់អារម្មណ៍ទ្វេរដងនៅពេលដែលឆាណែលថៃមួយបានយករឿងរ៉ាវនោះផុសផ្សព្វផ្សាយបន្ត។ តើអ្វីដែលគូស្នេហ៍រូបនោះនិយាយគឺជាការពិត ឬវាគ្រាន់តែជាការបង្កើតសាច់រឿងដើម្បីចង់ Discredit ប្រទេសកម្ពុជា?
យោងតាមឆាណែលមួយដែលមានឈ្មោះថា Thailand & The World ដែលមានចំនួន Subscribers ត្រឹមតែ 12.3K ប៉ុណ្ណោះ បានយករឿងរ៉ាវរបស់គូស្នេហ៍ Youtuber សញ្ជាតិអង់គ្លេសមួយគូ ដែលបានបង្ហោះ Vlog នៅលើឆាណែលរបស់ខ្លួនដែលមានឈ្មោះ On Tour with Drigers មកអត្ថាធិប្បាយជាភាសាថៃ មកបង្ហោះផ្សព្វផ្សាយលើឆាណែលរបស់ខ្លួន។
បើតាមការរៀបរាប់ បុរសស្ត្រីអង់គ្លេសបាននិយាយថាពួកគាត់បានចាកចេញពីក្រុងបាងកកប្រទេសថៃ តាមរយៈរថភ្លើងមកព្រំដែនកម្ពុជា មុននឹងឆ្លងដែនមកប្រទេសកម្ពុជាពួកគាត់ទទួលបានដំណឹងអវិជ្ជមានជាច្រើន ក្រើនរំលឹកឱ្យពួកគាត់ប្រយ័ត្នខ្លួន ប៉ុន្តែពេលមកដល់មែនទែន គ្រប់វាអាក្រក់ជាងអ្វីដែលពួកគាត់បានឮទៅទៀត។
ចំណុចសំខាន់ដែលដកស្រង់បានពីឆាណែល Thailand & The World ដែលយករឿងរ៉ាវគូស្នេហ៍ខាងលើមកបង្ហោះ បានលើកយកចំណុចអវិជ្ជមានជាច្រើនរបស់ប្រទេសកម្ពុជាមកនិយាយដោយក្នុងនោះ សារព័ត៌មានត្រយងសូមដកស្រង់តែប៉ុន្មានចំណុចមកជម្រាបជូនមិត្តអ្នកអានដូចខាងក្រោម៖
១. ត្រូវអាជ្ញាធរច្រកព្រំដែនបង្ខំឱ្យចាយលុយក្រោមតុ (លុយសំណូក) ចំនួន៣ដុល្លារ លើតម្លៃវាយ Passport ចូលប្រទេសកម្ពុជាដែលមានតម្លៃ ៣០ដុល្លារ។ គាត់ធ្លាប់បានដឹងដំណឹងនេះរួចស្រេចហើយទើបគាត់ព្យាយាមបដិសេធមិនព្រមបង់លុយក្រោមតុចំនួន៣ដុល្លារនោះ ដូច្នេះអាជ្ញាធរនៅទីនោះព្យាយាមឃាត់ខ្លួនគាត់មិនឱ្យចូលលុះត្រាតែគាត់ដាច់ចិត្តបង់ប្រាក់៣ដុល្លារនោះ
២. ចូលមកដល់ច្រកព្រំដែនកម្ពុជា សំបូរដោយកាស៊ីណូ (បនល្បែង) រីកដូចផ្សិត ប្រៀបដូចទៅនឹងទីក្រុងម៉ាកាវ ប្រទេសចិន ថែមទាំងចូលដល់ភ្លាមពេលគាត់រកទីតាំងរថយន្តក្រុង មិនទទួលបានចម្លើយហើយនោះ ថែមទាំងត្រូវអ្នករត់តាក់ស៊ី ព្យាយាមបោកប្រាស់ឱ្យគាត់ឡើងជិះឡាន
៣. ក្បួនបោកប្រាស់អ្នកទេសចរណ៍រៀបចំជាប្រព័ន្ធ ប៉ូលិសនៅទីនោះចូលដៃចូលជើងជាមួយក្រុមឆបោក ចង់កោរលុយរបស់ពួកគេ បង្ខំឱ្យឡើងជិះឡានតាក់ស៊ីគ្នាគេនោះ ដោយកុហកថាពីប៉ោយប៉ែត ទៅសៀមរាបអត់មានឡានក្រុងបើកទេ គឺបិទតាំងពីសម័យកូវីដ អត់ទាន់បើកវិញទេ ដោយសារតែមិនទុកចិត្តអ្នកទាំងពីរសុខចិត្តស្វែងរកឡានឈ្មួលជិះទៅសៀមរាប អស់ម្នាក់២០ដុល្លារ ប៉ុន្តែចង្អៀត ក្ដៅហប់ ស្ពឹកដៃជើងកំរើកមិនរួច
៤. បទពិសោធឈឺចាប់មួយទៀតត្រូវអ្នករត់កង់បី Passapp បោកលុយ ជិះម៉ូតូអស់ត្រឹមតែ១ម៉ឺនរៀល ពេលហុចលុយក្រដាស៥ម៉ឺន មិនព្រមអាប់លុយ ថែមទាំងបើករត់គេច ពេលទៅក្រុមហ៊ុន Passapp បានត្រឹមឱ្យពួកគេទៅជួបអ្នកបើកម៉ូតូយកលុយវិញ តែពួកគេសម្រេចចិត្តអត់ទៅជួបព្រោះខ្លាចសុវត្ថិភាព
៥. ចូលមកដល់ក្រុងភ្នំពេញ នៅតែមិនរួចខ្លួន ប៊ិះនឹងត្រូវចោរឆក់ កាបូប ឆក់ទូរស័ព្ទ ឆក់របស់មានតម្លៃព្រោះពេលដែលម៉ូតូកង់៣បន្ថយលឿន មានដៃលូកចូលមកក្នុងកង់៣ដែលពួកគេជិះ។ កាន់តែអាក្រក់ជាងនោះគឺអ្នករត់កង់៣យកគេទៅដាក់ខុសគោលដៅ ហើយជិះមកទារប្រាក់នៅកន្លែងគោលដៅ។
នេះគ្រាន់តែការសង្ខេបខ្លីមួយដែលសារព័ត៌មានត្រយងយកមកចែករំលែក ប៉ុន្តែការពិតយ៉ាងណានោះមានតែរងចាំមើលអាជ្ញាធរមានសមត្ថកិច្ចស្រាវជ្រាវករណីនេះបន្តទៀត តើអ្វីដែលគេលើកឡើងនោះគឺជាការពិតដែរទេ? ប៉ុន្តែអ្នកធ្វើ Vlog នោះគេថតបានភស្តុតាងជាច្រើនក្នុងវីដេអូដោយសារតែគេ Vlogers ដូច្នេះគ្រប់សកម្មភាពមានថតជាប់ក្នុងកាមេរ៉ា។
មនុស្សជាច្រើនបានចូលមក Comment អាក្រក់ៗ និងចាត់ទុកប្រទេសកម្ពុជាជាកន្លែងមួយដែលអសន្តិសុខ ដោយប្រៀបធៀបជាមួយនឹងប្រទេសថៃ ថាជាកន្លែងសំបូរសប្បាយ មានទីតាំងកម្សាន្ត ធំទូលាយ គ្រប់យ៉ាងមានសុវត្ថិភាព…។
សម្រាប់ឆាណែលថៃ Thailand & The World បានយករឿងនេះទៅបង្ហោះចែកចាយបន្ត នាពេលនេះបានវាយតម្លៃថា ប្រទេសខ្មែរ ប្រទេសវៀតណាម និងប្រទេសថៃ ជាទីតាំងដែលសំបូរ មនុស្សបោកប្រាស់ អំពើឆបោក ចោរកម្ម គ្មានសន្តិសុខ និងសណ្ដាប់ធ្នាប់។ ក្រុមជនជាតិថែមនិយាយទៀតថាបើសិនខ្លួនឃើញថៃណាម្នាក់ប្រព្រឹត្តអំពើបោកប្រាស់ ឬពុករលួយនឹងប្រញាប់រាយការណ៍ទៅកម្លាំងសមត្ថកិច្ចភ្លាម ព្រោះមិនចង់ឱ្យមុខមាត់ប្រទេសជាតិត្រូវអាប់ឱនដោយសារតែបុគ្គលគ្មានខួរគិតមួយចំនួន។
សារព័ត៌មានត្រយងកំពុងតែព្យាយាមទំនាក់ទំនងទៅអាជ្ញាធរមានសមត្ថកិច្ច ដើម្បីស្រាយបំភ្លឺចំពោះករណីនេះ ប្រសិនបើមិនពិតទេនោះ យើងគួរតែមានចំណាត់ការសូមឱ្យបុគ្គលនោះលុបចោលវីដេអូផ្សព្វផ្សាយព័ត៌មានមិនពិតដែលធ្វើឱ្យប៉ះពាល់ដល់កិត្តិនាមប្រទេសកម្ពុជាយ៉ាងធ្ងន់ធ្ងរ៕
ប្រភព៖ youtube