ពានរង្វាន់លីគកំពូលកម្ពុជា Cambodian Premier League 2022 បានឈានដល់សប្ដាហ៍ទី២៥ ក្នុងចំណោមសប្ដាហ៍សរុប២៧ ស្របពេលដែលក្រុមវិសាខា គឺជាក្រុមចុងក្រោយគេដែលត្រូវពិន័យកាតក្រហម បន្ទាប់ពីក្រុមទាំង៧ផ្សេងទៀតសុទ្ធតែត្រូវពិន័យមុនរួចអស់ហើយ។
ម្ចាស់កាតក្រហម ដែលត្រូវពិន័យនៅក្រុមវិសាខា គឺអ្នកចាំទី កែវ សុខសិលា ក្រោយបង្កកំហុសនៅក្នុងពេលជួយក្រុមខ្លួន ទទួលក្រុមបឹងកេត នៅថ្ងៃអាទិត្យ ថ្មីៗនេះក្នុងតំបន់ Top4 ដោយលោកអាជ្ញាកណ្តាល ហ៊ោ ប៊ុនថង ពិន័យនៅនាទី២២ បន្ទាប់ពីអ្នកចាំទីរបស់បឹងកេត ហ៊ុល គឹមហ៊ុយ ត្រូវពិន័យកាតក្រហមដូចគ្នានៅនាទីទី១៥។
ដូច្នេះក្រុមទាំង៨ សុទ្ធតែត្រូវពិន័យកាតក្រហមគ្រប់ក្រុមខណៈកាតសរុបមាន៖
-ណាហ្គាវើល កាតសរុប៦៣ (ក្រហម៧)
-ភ្នំពេញក្រោន កាតសរុប៥៧ (ក្រហម២)
-អង្គរថាយហ្គឺរ កាតសរុប៥០ (ក្រហម២)
-ក្រសួងការពារជាតិ កាតសរុប៥០ (ក្រហម២)
-បឹងកេត កាតសរុប៤៩ (ក្រហម៥)
-វិសាខា កាតសរុប៤៧ (ក្រហម១)
-ព្រះខ័នរាជស្វាយរៀង កាតសរុប៣៩ (ក្រហម១)
-គីរីវង់សុខសែនជ័យ កាតសរុប២៩ (ក្រហម១)
ដូច្នេះ៩២ប្រកួតមកនេះអាជ្ញាកណ្តាលបានចាយកាតសរុបចំនួន៣៨៣សន្លឹក ដោយក្នុងនោះមានកាតក្រហមចំនួន២១សន្លឹកទៅលើក្រុមជាសមាជិកទាំង៨៕