សង្គមសិល្បៈ៖ កាលពីថ្ងៃទី២១ ខែវិច្ឆិកា ឆ្នាំ២០២២ យប់ម្សិលមិញនេះតារាចម្រៀងជើងចាស់ សាន ផានិត បានរៀបចំកម្មវិធីសម្ពោធហាងថ្មីរបស់ខ្លួន ដែលក្នុងនោះមហាជនមានការចាប់អារម្មណ៍ចំពោះវត្តមានរបស់អ្នកឧកញ៉ា គួច ម៉េងលី ដែលបានចូលរួមជាភ្ញៀវកិត្តិយសក្នុងកម្មវិធីនោះដែរ។
កម្មវិធីសម្ពោធហាងថ្មីរបស់ម្ចាស់បទ «ទូរស័ព្ទប្រាប់ផង» មានភ្ញៀវកិត្តិយសយ៉ាងច្រើនកុះករ មានទាំងតារាចម្រៀងចាស់-ថ្មី អគ្គនាយកសារព័ត៌មាន និង មន្ត្រីរាជការបានផ្ដល់កិត្តិយសចូលរួម។ ប៉ុន្តែវត្តមានរបស់អ្នកឧកញ៉ា គួច ម៉េងលី ឬ ដែលអ្នកគាំទ្រនិយមហៅថា លោកគ្រូ គួច ម៉េងលី ទំនងជាឆក់បានការចាប់អារម្មណ៍ខ្ពស់ជាងគេ ព្រោះតែសកម្មភាពថតរូបអនុស្សាវរីយ៍របស់លោកគ្រូជាមួយនឹងនារីស្អាតៗជាច្រើននាក់នៅពីមុខផ្ទាំង Backdrop។
ធ្លាប់មានអ្នកខ្លះលើកឡើងថាលោកគ្រូ គួច ម៉េងលី អាចនឹងរាងចាលលែងហ៊ានថតរូបជាមួយនឹងស្រីៗជាបន្តទៀតហើយ ព្រោះយើងគ្រប់គ្នាសុទ្ធតែដឹងថាថ្មីៗនេះលោកគ្រូត្រូវបាននារីម្នាក់ចោទប្រកាន់ បណ្ដាលឱ្យមានមតិអវិជ្ជមាននិងវាយប្រហារចំពោះកិត្តិយសនិងកេរ្តិ៍ឈ្មោះលោកគ្រូជាខ្លាំង។
ជាក់ស្ដែងរឿងហេតុពិតប្រាកដត្រូវបានលោកគ្រូចេញមកបកស្រាយ ច្រានចោល និងបដិសេធចំពោះការលើកឡើងនោះ ដោយក្រោយមកទៀតនារីជាម្ចាស់ដើមហេតុ ក៏បានចេញមកសុំទោសចំពោះលោកគ្រូវិញដែរ។
គួរបញ្ជាក់ថារូបភាពរវាងលោកគ្រូ គួច ម៉េងលី នេះថតនៅក្នុងកម្មវិធីសម្ពោធហាង «ប្រេនក្បាលគីបសាខាទី២» របស់លោក សាន ផានិត ដែលមានទីតាំងនៅកណ្ដាលក្រុងតាខ្មៅ ជាប់មន្ទីរកសិកម្មក្រុងតាខ្មៅ ខាងមុខសួនច្បារថ្មី។