បន្ទាប់ពីក្រុមបាល់ទាត់ជម្រើសជាតិអារ៉ាប៊ីសាអូឌីត ក្រោមការដឹកនាំរបស់លោក Hervé Renard បានយកឈ្នះអាហ្សង់ទីន យ៉ាងភ្ញាក់ផ្អើលបំផុត ក្នុងការប្រកួតបើកឆាកពូល C ជាមួយលទ្ធផល ២-១ តាមរយៈការស៊ុតដោយកីឡាករ Saleh Al Shehri និង Salem Al Dawsari នៅកីឡដ្ឋាន Lusail Iconic កាលពីល្ងាចថ្ងៃទី២២ ខែវិច្ឆិកា។
ក្នុងនោះព្រះមហាក្សត្រនៃប្រទេសអារ៉ាប៊ីសាអូឌីត Salman bin Abdulaziz Al Saud បានប្រកាសថាថ្ងៃទី២៣ ខែវិច្ឆិកា ឆ្នាំ២០២២ គឺជាថ្ងៃឈប់សម្រាកថ្នាក់ជាតិ១ថ្ងៃ សម្រាប់ប្រជាជនអារ៉ាប៊ីសាអូឌីតទាំងមូល ដើម្បីអបអរសាទរជ័យជម្នះរបស់ពួកគេនៅព្រឹត្តិការណ៍ FIFA World Cup 2022។
ខណ:សមាជិករបស់ក្រុមបាល់ទាត់ជម្រើសជាតិអារ់ាប៊ីសាអូឌីត នឹងទទួលបានរថយន្តដ៏ទំនើបសេរីចុងក្រោយបង្អស់គឺ Rolls Royce Phantom 2022 ម្នាក់១គ្រឿងដែលមានតម្លៃ៥៥មុឺនដុល្លារពីព្រះអង្គម្ចាស់ Mohammed bin Salman (MbS)។
នេះគឺជាជ័យជម្នះលើកដំបូងរបស់ក្រុមជម្រើសអារ៉ាប៊ីសាអ៊ូឌីត លើអាហ្សង់ទីន បន្ទាប់ពីធ្លាប់ជួបគ្នា២លើកគឺនៅឆ្នាំ១៩៩២ និង២០១២។ ក្នុងឆ្នាំ១៩៩២ ក្រុមទាំងពីរជួបគ្នាក្នុងវគ្គផ្ដាច់ព្រ័ត្រ FIFA Confederations Cup ហើយកាលនោះអាហ្សង់ទីនបានយកឈ្នះអារ៉ាប៊ីសាអ៊ូឌីត ៣-១ ក្លាយជាម្ចាស់ជើងឯក។ រហូតដល់ឆ្នាំ២០១២ ទើបពួកគេបានជួបគ្នាម្ដងទៀតក្នុងការប្រកួតមិត្តភាព ដោយលទ្ធផលបញ្ចប់ទៅ ០-០។
គួរដឹងដែលថា World Cup ២០២២ នៅប្រទេសកាតា គឺជាការបង្ហាញខ្លួនទី៦ របស់ក្រុមជម្រើសជាតិអារ៉ាប៊ីសាអូឌីត ដោយពួកគេធ្លាប់បង្ហាញខ្លួនដំបូងនៅឆ្នាំ ១៩៩៤ បន្ទាប់មក ១៩៩៨, ២០០២, ២០០៦ និង ២០១៨។ អារ៉ាប៊ីសាអូឌីតធ្លាប់ឈានជើងដល់វគ្គ ១៦ក្រុមអំឡុងការបង្ហាញខ្លួនលើកដំបូងបង្អស់របស់ពួកគេ៕
