ក្លិបបាល់ទាត់ អាយ.អេស.អាយ ដង្កោសែនជ័យ បានប្រកាសចែកផ្លូវជាមួយម្ចាស់កីឡាករឆ្នើមប្រចាំ (MVP) ពានរង្វាន់សម្តេចតេជោ ហ៊ុន សែន (Hun Sen Cup Cup) ឆ្នាំ២០១៩ គឺខ្សែបម្រើកណ្តាល ហួយ ផល្លីន ក្រោយខ្ចីជើងពីក្រុមព្រះខ័នរាជស្វាយរៀង មួយរយៈខ្លីមក។
បើតាមសំណេររបស់ក្រុមជើងឯករងពានរង្វាន់ Cambodian League 2 រដូវកាលឆ្នាំ២០២២ នេះបញ្ជាក់នៅលើហ្វេសប៊ុកខ្លួន នៅព្រឹកថ្ងៃព្រហស្បត្តិ៍ ទី២៤ ខែវិច្ឆិកា ឆ្នាំ២០២២ ថា៖«ក្លិប សូមថ្លែងអំណរគុណទៅកាន់កីឡាករ ហួយ ផល្លីន សម្រាប់ការខិតខំប្រឹងប្រែងជួយក្លិបរបស់យើងកន្លងមក ។ ក្លិបសូមជូនពរ ផល្លីន ពេលត្រឡប់ទៅចូលរួមជាមួយក្រុមព្រះខ័នរាជស្វាយរៀង វិញ សូមជួបតែសំណាងល្អ និងទទួលបានជោគជ័យក្នុងអាជីពនាថ្ងៃអនាគត»។
ក្នុងចំណោមគ្រាប់បាល់៥៥០គ្រាប់នៅរដូវកាលឆ្នាំ២០២២ នេះនៃពានរង្វាន់លីគទី២កម្ពុជា កីឡាករ ហួយ ផល្លីន រកបាន២គ្រាប់អំឡុងពេលបង្ហាញខ្លួនឱ្យក្រុម អាយ.អេស.អាយ ស្របពេលគេក៏ជាផ្នែកមួយជួយឱ្យក្រុមឈ្នះជើងឯករងផងដែរ។ នៅក្នុងពានរង្វាន់ Hun Sen Cup រដូវកាល២០២២ ក្រុមមួយនេះឡើងដល់វគ្គ១៦ក្រុមចុងក្រោយជើងឯកថ្នាក់ជាតិ ខណៈក្នុងពានរង្វាន់ Cambodian League Cup 2022 ក្រុមបានធ្លាក់ចេញត្រឹមវគ្គចែកពូល។
សម្រាប់កីឡាករ ហួយ ផល្លីន ត្រូវបានក្លិបព្រះខ័នរាជស្វាយរៀង ចុះបញ្ជីចូលក្នុងក្រុមឈុតធំនៅឆ្នាំ២០១៣ ខណៈនៅគ្រានោះក៏ត្រូវបានកោះហៅឱ្យចូលរួមក្នុងក្រុមជម្រើសជាតិផងដែរ។ កីឡាករវ័យ២៦ឆ្នាំរូបនេះធ្លាប់ជួយព្រះខ័នរាជស្វាយរៀង ឈ្នះជើងឯកពានរង្វាន់លីគកំពូលកម្ពុជា នៅឆ្នាំ២០១៣ និង២០១៩ និងពានរង្វាន់ Hun Sen Cup នៅឆ្នាំ២០១៥និង២០១៧ ផងដែរ។ នៅឆ្នាំ២០១៩ រូបគេត្រូវជ្រើសរើសជាកីឡាករល្អប្រចាំព្រឹត្តិការណ៍ Hun Sen Cup ទៀតផង៕