គណៈកម្មការរៀបចំព្រឹត្តិការណ៍កីឡាអូឡាំពិករបស់ប្រទេសជប៉ុន Tokyo 2020 Olympic បានរៀបចំផែនការចែកស្រោមអនាម័យប្រមាន ១៦០,០០០ ស្រោម ជូនដល់ប្រតិភូនិងអត្តពលិក ដែលចូលរួមប្រកួតកីឡាកម្រិតពិភពលោកមួយនេះនៅទីក្រុងតូក្យូ ក្នុងខែកក្កដា ខាងមុខនេះ តែចំនួននេះនៅតិចជាងកាលប្រកួតអូឡាំពិកនៅប្រទេសប្រេស៊ីល ក្នុងឆ្នាំ២០១៦។
សារព័ត៌មាន UK Yahoo បានបញ្ជាក់ការចែកស្រោមអនាម័យនេះគឺទុកសម្រាប់ យកត្រឡប់ទៅផ្ទះ វិញជាជាងប្រើវានៅក្នុងភូមិកីឡា (ទីកន្លែងសម្រាប់អត្តពលិកស្នាក់នៅ) ព្រោះទីនោះ មានច្បាប់គម្លាតសង្គម ដើម្បីប្រឆាំងជំងឺកូវីដ-១៩។ ស្រោមអនាម័យនេះគ្រោងចែកជូនអត្តពលិកប្រមាណជាង១១,០០០នាក់ ដោយក្នុង១នាក់ជូន១៤ប្រអប់។
អត្ថបទពាក់ព័ន្ធ៖ក្រុមហ៊ុនPfizer និងBioNTechផ្ដល់វ៉ាក់សាំងបង្ការកូវីដ-១៩ សម្រាប់អូឡាំពិក នៅជប៉ុន
តាមពិតទៅនេះជាផែនការតាំងពីយូរមកហើយរបស់គណៈកម្មការរៀបចំការប្រកួត ពោលគឺមុនមានជំងឺកូវីដ-១៩ មកម៉្លេះ។ ប៉ុន្តែបច្ចុប្បន្ននេះអ្នករៀបចំកីឡាអូឡាំពិកបានស្នើសុំកុំឱ្យមានការប៉ះពាល់គ្នាទៅវិញទៅមកសម្រាប់អ្នកចូលរួមទាំងគ្នា ខណៈការចែកជូនស្រោមអនាម័យដោយឥតគិតថ្លៃនេះ ជាផ្នែកមួយនៃយុទ្ធនាការសុខភាពពិភពលោកទៅវិញទេ។ ព្រមទាំងជឿជាក់ថាជាផ្នែកមួយនៃការ«ជួយដល់ការយល់ដឹង»។
បើយោងតាមសេចក្តីថ្លែងការណ៍របស់គណៈកម្មការរៀបចំការប្រកួតបញ្ជាក់ថា៖«គោលដៅរបស់យើងមិនមែនសំដៅដល់ការប្រើប្រាស់ស្រោមអនាម័យនៅភូមិកីឡា នោះទេ ប៉ុន្តែវាជាការជួយដល់ការយល់ដឹងមួយ ចំពោះស្រោមអនាម័យនេះគឺសម្រាប់ឱ្យពួកគាត់យកត្រឡប់ទៅកាន់ប្រទេសរៀងៗខ្លួន វិញប៉ុណ្ណោះ»។
អត្ថបទពាក់ព័ន្ធ៖មន្រ្តី៖កីឡាអូឡាំពិកនៅតូក្យូ បន្តធ្វើខណៈអ្នកស្ម័គ្រចិត្ត១ម៉ឺននាក់លាឈប់
ប្រធានបទនេះត្រូវបានសារព័ត៌មាន Soranews24 វាយតម្លៃថាលេស ប៉ុណ្ណោះដែលប្រើពាក្យ«ការយល់ដឹង» ព្រោះធ្វើឱ្យមនុស្សជាច្រើនមិនយល់ស្របពីរឿងនេះនោះទេ។ «នៅពេលដែលអត្តពលិកត្រឡប់ទៅដល់មាតុភូមិវិញហើយ ធ្វើឱ្យគាត់មានគំនិតចង់សាងល្បងប្រើប្រាស់ស្រោមអនាម័យរបស់កីឡាអូឡាំពិកដែលពួកគេបានពីប្រទេសជប៉ុន។ ហាក់ដូចជាមិនបង្កើនការយល់ដឹងអំពីការរួមភេទប្រកបដោយសុវត្ថិភាពចំពោះនរណាម្នាក់នោះទេ ក្រៅពីរំលឹកគាត់ឱ្យប្រើប្រាស់ស្រោមអនាម័យទៅវិញ»។
មែនទែនទៅនេះមិនមែនជារឿងថ្មីទេ តាមពិតគណៈកម្មការអូឡាំពិកអន្តរជាតិ បានចាប់ផ្ដើមអនុវត្តន៍ផែនការចែកស្រោមអនាម័យតាំងពីប្រកួតកីឡាអូឡាំពិកឆ្នាំ១៩៨៨ មកម៉្លេះ ដែលកាលនោះមានការផ្ទុះនៃឆ្លងរីករាលដាលជំងឺអេដស៍ខ្លាំង។ ប៉ុន្តែផែនការចែកស្រោមអនាម័យនៅក្នុងការប្រកួតអូឡាំពិកនៅតូក្យូ គឺមានចំនួនតិចជាងកាលប្រកួតកីឡាអូឡាំពិកឆ្នាំ២០១៦ នៅប្រេស៊ីល ព្រោះតែចែកប្រមាណ១៦ម៉ឺនស្រោម ប៉ុណ្ណោះ (ម្នាក់១៤ស្រោម) តែបើធៀបកាលធ្វើនៅទីក្រុងរីយូ ប្រទេសប្រេស៊ីល ចែករហូតដល់៤៥ម៉ឺនប្រអប់ឯណោះ ដែលគ្រានោះអត្តពលិកម្នាក់ទទួលបានចំនួន៤២ស្រោម។
អត្ថបទពាក់ព័ន្ធ៖«តាក់ស៊ីហោះ» រៀបចំផែនការឱ្យទាន់ក្នុងកីឡាអូឡាំពិកនៅប៉ារីសឆ្នាំ២០២៤
ព្រឹត្តិការណ៍កីឡាអូឡាំពិករដូវក្តៅ ដែលធ្វើនៅរាជធានីតូក្យូ នេះមានការចូលរួមពីកីឡាករកីឡាការិនី ពីប្រទេស/តំបន់ចំនួន២០៦ផ្សេងគ្នា សរុបប្រមាណជា១១,០០០នាក់ លើប្រភេទ៣៣កីឡានិង៣៣៩វិញ្ញាសា។ ការប្រកួតគ្រោងចាប់ធ្វើពីថ្ងៃទី២៣ ខែកក្កដា ដល់ថ្ងៃទី៨ ខែសីហា ឆ្នាំ២០២១៕
អត្ថបទពាក់ព័ន្ធ៖កូរ៉េខាងជើង មិនបញ្ជូនអត្តពលិកទៅប្រកួតកីឡាអូឡាំពិកនៅប្រទេសជប៉ុនទេ
