សិល្បៈអន្តរជាតិ៖ តារាសម្ដែងឯកពីភាពយន្តភាគ «Crash Landing On You» Hyun Bin និង Son Ye Jin បានក្លាយជាលោក ឪពុក និង អ្នកម្ដាយពេញលក្ខណៈហើយ ព្រោះកូនប្រុសតូចរបស់អ្នកទាំងពីរបានបើកភ្នែកមើលឃើញពិភពលោក។ នេះបើយោងតាមការប្រកាសពីផលិតកម្ម MSTeam។
ថ្ងៃនេះ Son Ye Jin សម្រាលបានកូនប្រុសម្នាក់ ទាំងម្ដាយនិងទារកមានសុខភាពល្អ។ ដោយឡែក Hyun Bin មិនបាននៅផ្ដល់កម្លាំងចិត្តដល់ភរិយាខ្លួនឡើយដោយសារតែជាប់ភារកិច្ចថតភាពយន្តវាយប្រហារបែបចារកម្មរឿង «Harbin» នៅប្រទេសម៉ុងហ្គោលី។ នេះបើយោងតាមផលិតកម្ម VAST Entertainment។
គូស្វាមីភរិយាដ៏មានឥទ្ធិពលដែលមានវ័យ៤០ឆ្នាំ ស្រករគ្នា បានរៀបអាពាហ៍ពិពាហ៍នៅថ្ងៃទី៣១ ខែមីនា នៅ Grand Walkerhill ភាគខាងកើតក្រុងសេអ៊ូល ក្រោយមើលចិត្តថ្លើមគ្នាពីរបីឆ្នាំ។
អ្នកទាំងពីរបានស្គាល់ដំបូងនៅក្នុងភាពយន្តដែលសម្ដែងរួមគ្នាគឺរឿង «The Negotiation» កាលពីឆ្នាំ២០១៨ ហើយបានចាប់ផ្ដើមសេពគប់និងមើលចិត្តគ្នា ក្រោយពេលបានសម្ដែងរឿងភាគ «Crash Landing on You» ដែលជារឿងទីពីរជាមួយគ្នា៕
ប្រភព៖ inquirer
