អ្នកប្រដាល់កម្ពុជា សុខ ធី (ហៅ កាកា) បច្ចុប្បន្នកំពុងប្រកបអាជីពនៅប្រទេសថៃកំពុងឡើងកូដខ្លាំង ពេលនេះត្រូវបានចាប់ខ្លួនពីបទប្រើប្រាស់មេតំហ្វេតាមីន។
បញ្ជាក់* បើយោងតាមវេជ្ជបណ្ឌិត និងក្រុមអ្នកជំនាញផ្នែកគ្រឿងញៀន នៃអាជ្ញាធរជាតិប្រយុទ្ធប្រឆាំងគ្រឿងញៀន មានប្រសាសន៍ថា មេតំហ្វេតាមីន គឺជាគ្រឿងញៀនមិនមែនជាថ្នាំប៉ូវកម្លាំងឡើយ។
យោងតាមការចុះផ្សាយរបស់ផេក ช่อง44เชฟบุญธรรม បានឲ្យដឹងថាប៉ូលីសថៃ បានចាប់ខ្លួន សុខ ធី នៅមុខស្ថានីយប្រេងឥន្ធនៈកាលពីល្ងាចថ្ងៃទី២៩ ខែវិច្ឆិកា ឆ្នាំ២០២២ ដោយរកឃើញថ្នាំញៀនប្រភេទមេតំហ្វេតាមីនចំនួន៥គ្រាប់លាក់ក្នុងកាបូប។
ខណ: សុខ ធី ក៏បានសារភាពថាខ្លួនបានទិញថ្នាំញៀនមេតំហ្វេតាមីន ពីឈ្មួញគ្រឿងញៀននៅភូមិ Rangsit Khlong 1 បន្ទាប់មកប៉ូលីសក៏បាននាំខ្លួន សុខ ធី ទៅធ្វើតេស្តទឹកនោមនៅមន្ទីរពេទ្យ Noppharat Rajathanee ហើយបានរកឃើញសារធាតុញៀន។
កីឡាករ សុខ ធី បានក្លាយជាអ្នកប្រដាល់ ដោយសារតែបានហែលឆ្លងទៅធ្វើកម្មករនៅក្នុងប្រទេសថៃ។ ទាំងលោក និងឪពុកបានទៅធ្វើជាកម្មករនៅក្នុងប្រទេសជិតខាងមួយនេះ រយៈពេលយូរឆ្នាំមកហើយ ដោយសារតែឱកាសទៅធ្វើការឆ្ងាយស្រុកកំណើតនោះហើយ ដែលធ្វើអោយលោកប្រឹងក្រោកឈរ ដោយទៅហ្វឹកហាត់ប្រដាល់ ហើយបានប្រឡូកការឡើងរេញ រហូតមានឈ្មោះបោះសំឡេង។
គួរដឹងថា សុខ ធី កំពុងក្លាយជាអ្នកប្រដាល់ដែលមានទីផ្សារ បន្ទាប់ពីអ្នកប្រដាល់កម្ពុជារូបនេះឧស្សាហ៍លេចមុខក្នុងព្រឹត្តិការណ៍ Muy Thai ដែលធ្វើអោយលោកទទួលបានតម្លៃខ្លួនខ្ពស់ផងដែរ៕
