ថ្មីៗនេះសហព័ន្ធកីឡាវ៉ូវីណាមកម្ពុជា បានរៀបចំមហាសន្និបាតបញ្ចប់អាណត្តិទី៣ និងបន្តអាណត្តិទី៤ ឆ្នាំ២០២១-២០២៥ នៅថ្ងៃចុងសប្ដាហ៍កន្លងទៅ ក្នុងទីស្នាក់ការរបស់គណៈកម្មាធិការជាតិអូឡាំពិកកម្ពុជា ព្រមទាំងមានការបោះឆ្នោតជ្រើសរើសប្រធានសហព័ន្ធផងដែរ ដោយឯកឧត្តម អ៊ូ រតនា ដែលជាអគ្គលេខាធិការ បានជាប់ឆ្នោតជាប្រធានសហព័ន្ធ។
គណៈកម្មការប្រតិបត្តិសហព័ន្ធកីឡាវ៉ូវីណាមកម្ពុជា អាណត្តិថ្មីនេះមាន៖
-ប្រធានសហព័ន្ធ៖ ឯកឧត្តម អ៊ូ រតនា
-អនុប្រធានចំនួន៧រូប៖ លោក សុខ មុនី, លោក រស់ មនិន្ទៈ, លោក គិន ឆេងលី, លោក លី សុធា, លោក ឡុង សុផាត, លោក សំ សុខយី និង លោក ជា ហុងរី
-អគ្គលេខាធិការ៖លោក យ៉ាំ ថៃសាន
អគ្គលេខាធិការរង៣រូប៖ លោក លាង ណារិទ្ធ, លោក អាំ សុផល និងលោក ម៉ិច សីហា
-អគ្គហិរញ្ញិក៖ លោកស្រី ញឹម ម៉ី
-អគ្គហិរញ្ញិករង៖ លោកស្រី ប៉ុក ករុណា
-សមាជិក៥រូប៖លោក ប៊ូ វីរៈ, លោក គង់ ហួន, លោក កៅ មករា, លោក ទេព ជីវៈសុខុម និងលោក ម៉េង សៅណេង។
ឯកឧត្តម អ៊ូ រតនា ប្រធានសហព័ន្ធកីឡាវ៉ូវីណាមកម្ពុជា បានថ្លែងអំណរគុណរីករាយ ដែលទទួលបានការគាំទ្រពីសមាជិកប្រតិបត្តិ ហើយឯកឧត្តមបានប្ដេជ្ញាចិត្តខ្ពស់ក្នុងការដឹកនាំអភិវឌ្ឍន៍ និងរក្សានូវសក្ដានុពលរបស់សហព័ន្ធលើឆាកអន្ដរជាតិ ដែលសហព័ន្ធធ្លាប់សម្រេចបានកន្លងមក។ បេសកកម្មធំៗ២ គឺការត្រៀមប្រកួតកីឡាស៊ីហ្គេម ឆ្នាំ២០២១ នៅប្រទេសវៀតណាម និងស៊ីហ្គេម ឆ្នាំ២០២៣ នៅប្រទេសកម្ពុជា។
«ជាមួយនិងភាពរីករាយនេះ វាក៏ជាអម្រែកមួយដ៏ធ្ងន់ដែរ ក្នុងការដឹកនាំសហព័ន្ធ ក្នុងស្ថានភាពវិបត្តិកូវីដ-១៩នេះ។ យើងមានកម្មវិធីធំៗជាច្រើន ចាប់ពីឆ្នាំនេះរហូតដល់ឆ្នាំ២០២៣។ តែយ៉ាងណាយើងនឹងខិតខំធ្វើយ៉ាងម៉េច ដើម្បីចូលរួមទប់ស្កាត់កូវីដ-១៩ ផង និងរក្សានូវកម្រិតបច្ចេកទេសរបស់កីឡាករ-កីឡាការិនីផង យើងនឹងរិះរកគ្រប់មធ្យោបាយ ដើម្បីថែរក្សាទម្រង់ និងរក្សាសក្ដានុពល ត្រៀមស៊ីហ្គេម ឆ្នាំ២០២១ នៅវៀតណាម និងស៊ីហ្គេម ឆ្នាំ២០២៣។ យើងប្ដេជ្ញាធ្វើយ៉ាងណាដឹកនាំសហព័ន្ធកីឡាវ៉ូវីណាម ឲ្យដើរទៅមុខប្រកបដោយសក្ដានុពល»។ ឯកឧត្តម អ៊ូ រតនា បន្ថែម។
សូមបញ្ជាក់ថាសហព័ន្ធកីឡាវ៉ូវីណាមកម្ពុជា អាណត្តិទី១និងទី២ មានលោកឧកញ៉ា រ័ត្ន សាខន ជាប្រធានសហព័ន្ធ តែចូលដល់អាណត្តិទី៣លោកឧកញ៉ា បានលាឈប់ពីតំណែងដោយមានបញ្ហាសុខភាព ហើយត្រូវបានបោះឆ្នោតជ្រើសរើសជាប់ឯកឧត្ដម ស៊ូម សារឿន ជាប្រធានវិញម្តង ខណៈអាណត្តិទី៤នេះឯកឧត្តម អ៊ូ រតនា ជាប្រធានសហព័ន្ធវិញម្តង៕