សិល្បៈជាតិ៖ បន្ទាប់ពីត្រូវចាប់ឃុំខ្លួនកាលពីថ្ងៃទី ១៧ ខែសីហា Pinky Savika ត្រូវបានដោះលែងឱ្យចេញផុតពីរបងពន្ធនាគារហើយកាលពីថ្ងៃទី៣០ ខែវិច្ឆិកា ក្រោយតុលាការចេញដីកាអនុញ្ញាតឱ្យដោះលែងនៅក្រៅឃុំជាបណ្ដោះអាសន្ន។
អ្នកនាង Pinky Savika អតីតតារាសម្ដែងល្បីឈ្មោះ ចុងចោទក្នុងរឿងខ្ចីលុយដែលជាការបោកប្រាស់ប្រជាជននិងបទល្មើសបច្ចេកវិទ្យា ក្នុងករណី Forex-3D ដែលមានតម្លៃទឹកប្រាក់ខូចខាតរហូតដល់ជាង២ពាន់លានបាត។ នៅក្នុងការពិចារណាក្ដី មេធាវីការពារក្ដីចុងចោទបានស្នើសុំធានាខ្លួនដោយទឹកប្រាក់ចំនួន៥លានបាត ដើម្បីឱ្យតុលាការពិចារណា ហើយនៅពេលតុលាការពិចារណារួចបានចេញសេចក្ដីសម្រេចឱ្យមានការដោះលែងខ្លួន ចុងចោទនៅក្រៅឃុំជាបណ្ដោះអាសន្ន ជាថ្នូរនឹងទឹកប្រាក់ធានាខ្លួនចំនួន ៥លានបាត ដោយមានកំណត់លក្ខខ័ណ្ឌផ្សេងដូចជា ហាមធ្វើដំណើរចេញក្រៅប្រទេស បើសិនជាផ្លាស់ប្ដូរទីតាំងឬកន្លែងស្នាក់នៅត្រូវផ្ដល់ដំណឹងមកកាន់តុលាការក្នុងរយៈពេល ៧ថ្ងៃ និងត្រូវមកបង្ហាញខ្លួននៅចំពោះមុខតុលាការជារៀងរាល់ខែ រហូតដល់មានការផ្លាស់ប្ដូរ ឬសេចក្ដីសម្រេចថ្មីដែលមានចែងប្រាប់។
នៅវេលាម៉ោង ៧យប់ម្សិលមិញនេះ អតីតតារាស្រីរូបនេះត្រូវបានដឹកចេញពីមន្ទីរឃុំឃាំងស្ត្រី ដោយពេលនោះ Pinky ស្លៀកសំលៀកបំពាក់អាវយឺតពណ៌ លើកដៃជំរាបសួរ និងបាយបាយមកកាន់អ្នកសារព័ត៌មានដែលរងចាំតាមដាននិងផ្ដិតរូបភាពនៅខាងមុខបរិវេណច្រកចេញ ព្រមជាមួយនឹងលើកដៃជាសញ្ញាបេះដូង ជំនួសឱ្យពាក្យអរគុណមុននឹងធ្វើដំណើរចេញទៅដោយមិនបានឈប់ផ្ដល់បទសម្ភាសន៍ដល់អ្នកសារព័ត៌មាននោះឡើយ៕
ប្រភព៖ PPTV, Thairath, Sanook