ឯកឧត្តម ស សុខា រដ្ឋលេខាធិការក្រសួងអប់រំ យុវជន និងកីឡា បានមានប្រសាសន៍ថា កម្ពុជាគឺជាប្រទេសទីមួយហើយក្នុងតំបន់អាស៊ានដែលមានតំបន់ហាត់ប្រាណអាស៊ានមុនគេ ។ ការលើកឡើងដូចនេះ នៅក្នុងពិធីបិទការប្រកួតកីឡា ដណ្តើមពានរង្វាន់ សម្តេចក្រឡាហោម ស ខេង ឆ្នាំ២០២២ ធ្វើឡើងនៅថ្ងៃទី១ ខែធ្នូ ឆ្នាំ២០២២ នៅសាកលវិទ្យាល័យជាតិបាត់ដំបង។
ឯកឧត្តម ស សុខា បានលើកឡើងថានៅប៉ុន្មានថ្ងៃមុនកម្ពុជាបានចាប់ផ្ដើមកសាង និងដាក់ឱ្យប្រើប្រាស់តំបន់ហាត់ប្រាណអាស៊ាន ក្រោយការដឹកនាំនិងចង្អុលបង្ហាញពីរាជរដ្ឋភិបាល ដើម្បីជំរុញឱ្យប្រជាពលរដ្ឋមានការហាត់ប្រាណនៅតំបន់ហាត់ប្រាណអាស៊ាន។ ឯកឧត្តមបន្ថែមថា បន្ទាប់ពីបានបើកដំណើរការនៅតំបន់មុខអូតែលសុខា ថ្នាក់ដឹកនាំនឹងបន្តនៅតាមគោកដៅបន្ទាប់ដូចជាខេត្ត សៀមរាប ក្រុងព្រះសីហនុ និងបាត់ដំបង ជាដើម ដែលនេះបង្ហាញថាកម្ពុជាកំពុងមានការលូតលាស់ខ្លាំងលើវិស័យកីឡាននៅក្នុងតំបន់អាស៊ាន។
ថ្លៃងក្នុងកម្មវិធីឯកឧត្តម ស សុខា ក៏បានស្នើឱ្យថ្នាក់គ្រប់គ្រង់ គណកម្មាធិការរៀបចំការប្រកួតកីឡាពាន់រង្វាន់ សម្តេចក្រឡាហោម ស ខេង គួរតែពិនិត្យក្នុងការពង្រីកទទួលយកអ្នកដាក់ពាក្យក្នុងវិស័យបាល់ទាត់កាន់តែច្រើន ព្រោះថាកីឡាបាល់ទាត់នេះកំពុងមានភាពពេញនិយម និងមានអ្នកចូលរួមច្រើនបន្ទាប់ពីមានការចូលរួមជាច្រើននៅក្នុងកម្មវិធីប្រកួតលើកនេះ។ ឯកឧត្តម ក៏សូមឱ្យកីឡាករទាំងអស់ដែលបានចូលរួមប្រកួតត្រូវពង្រឹងសម្ថភាពបន្ថែមដើម្បីត្រៀមនៅក្នុងកម្មវិធីប្រកួតថ្នាក់ជាតិនាពេលខាងមុខ។
សូមរំលឹកថា ព្រឹត្តិការណ៍ប្រកួតកីឡាពានរង្វាន់ «សម្តេចក្រឡាហោម ស ខេង» ឆ្នាំ២០២២ នៅខេត្តបាត់ដំបង បានចាប់ផ្ដើមដំណើរការប្រកួតចាប់ពីថ្ងៃទី២៩ ខែតុលា ដល់ថ្ងៃទី២៩ ខែវិច្ឆិកា ឆ្នាំ២០២២ នៅក្រុងបាត់ដំបង ខេត្តបាត់ដំបង ដែលមានកីឡា ៣ប្រភេទចូលរួមមានកីឡាបាល់ទាត់ កីឡាវាយសី និងកីឡាប៊ូល និងប៉េតង់៕
អត្ថបទ៖ នី ម៉េងងី