សិល្បៈជាតិ៖ ប៉ុន្មានថ្ងៃនេះប្រធានបទក្ដៅនៅលើបណ្ដាញសង្គមដែលមហាជនផ្ដោតការចាប់អារម្មណ៍ជាពិសេសនោះគឺរឿងបើកបរក្នុងសភាពស្រវឹង ហើយបុកម្ដាយនិងកូនតូចបណ្ដាលឱ្យស្ថិតក្នុងសភាពធ្ងន់ធ្ងរ។ យ៉ាងណាមិញតារាស្រី នៅ ដាណា បានចូលរួមចែករំលែកបទពិសោធផ្ទាល់ខ្លួន និង ប្រាប់មូលហេតុដែលធ្វើឱ្យកញ្ញាផ្ដាច់ស្រាអស់រយៈពេល ៤ឆ្នាំកន្លងមកនេះ។
កាលពីថ្ងៃទី៦ ខែធ្នូ ម្សិលមិញនេះ តារាសម្ដែងស្រីមានឈ្មោះបោះសំឡេងគួរសមគឺកញ្ញា នៅ ដាណា បានចេញមកចែករំលែកដល់អ្នកគាំទ្រនិងមិត្តៗក្នុងបណ្ដាញសង្គមរបស់ខ្លួនពីមូលហេតុដែលធ្វើឱ្យកញ្ញាឈប់ផឹកគ្រឿងស្រវឹង ព្រោះថា៖
១. ជាទូទៅ មិនថាខ្ញុំមិនថាគេ ពេលស្រវឹង មិនដែលទទួលស្គាល់ថាខ្លួនស្រវឹង ហើយនៅព្រហើនបើកបរទាំងស្រវឹង
២. ខុសច្បាប់ចរាចរណ៍
៣. ភាពមិនទទួលខុសត្រូវ ថ្វីត្បិតតែខ្ញុំមិនដែលបង្ករបួសស្នាមដល់អ្នកដទៃក៏ពិតមែន ប៉ុន្តែមិនមែនមានន័យថាមិនអីនោះទេ វាអាចមានហានិភ័យដែលបង្កការបំផ្លិចបំផ្លាញដល់ទ្រព្យសម្បត្តិអ្នកដទៃ របួសស្នាមដល់អ្នកដទៃ ហើយអ្វីដែលគួរឱ្យខ្លាចជាងនេះទៅទៀត គឺបំផ្លាញជីវិតអ្នកដទៃ។ ហើយបើបើកបរទាំងស្រវឹងដោយមានមនុស្សជិះជាមួយទៀត គឺស្មើនឹងអ្នកក៏ឱ្យមនុស្សនោះមកមានហានិភ័យជាមួយនឹងអ្នក
៤. ខាតបង់ថវិការ
៥. ខូចសុខភាព
៦. ខាតពេលវេលា
៧. ស្រវឹង បង្កជម្លោះ
ចំណុចចុងក្រោយដែលតារាស្រីរូបនេះបានបញ្ជាក់ទៀតនោះគឺកញ្ញាចង់ចំណាយពេលវេលា និងថវិកាដែលយកទៅញ៉ាំគ្រឿងស្រវឹងមកញ៉ាំរបស់ឆ្ងាញ់និងដើរលេងវិញ ការដែលតារាស្រីរូបនេះសម្រេចចិត្តដូច្នេះ គេអាចទាញសេចក្ដីសន្និដ្ឋានបានថាព្រោះកញ្ញាមិនចង់ឱ្យប៉ះពាល់ដល់សុខភាព និងអាយុជីវិតរបស់ខ្លួនឯង ក៏ដូចជាអ្នកដទៃ។
