ប្លែកៗ៖ សម្រាប់អ្នកដែលចូលចិត្តស្ដាប់រឿងរ៉ាវរន្ធត់ៗ ពាក់ព័ន្ធនឹងរឿងវិញ្ញាណឬព្រលឹង ប្រាកដជាត្រូវចិត្តជាក់ជាមិនខានព្រោះរឿងដែលយកមកជម្រាបជូននាពេលនេះគឺរឿងនិយាយពីផ្ទះខ្មោចសណ្ឋិតដែលល្បីល្បាញថាលងសាហាវជាទីបំផុតនៅប្រទេសអ៊ីតាលី។
១.គេហដ្ឋានពណ៌ក្រហម នៃក្រុងឡុំបូឌៀ Lombardia
ឈ្មោះពិតរបស់ផ្ទះនេះគឺផ្ទះរបស់ត្រកូល De Vecchi (ឌឺ វ៉េកឃី) កសាងឡើងក្នុងសតវត្សរ៍ទី១៩ តាមបញ្ជារបស់ លោកម្ចាស់ ហ្វីឡិច ឌីវ៉េកឃី Felice De Vecchi ជាផ្ទះពីរជាន់ មានបន្ទប់ក្រោមដី ស្ថិតក្នុងខេត្ត Cortenova (ខតតេណូវ៉ា) ជាប់នឹងបឹងទន្លេសាបខូម៉ូ Como។ ផ្ទះពណ៌ក្រហមនេះបច្ចុប្បន្នពណ៌បានរបកខ្លះហើយ ធ្វើឱ្យសភាពផ្ទះកាន់តែមើលកាន់តែស្រដៀងនឹងស្នាមរបួសដែលដាច់រលាត់។ អ្នកខ្លះហៅផ្ទះនេះថា «ផ្ទះមេមត់» ព្រោះធ្លាប់មានអ្នកកាន់លទ្ធិសាតានបានសម្លឹងផ្ទះនេះទុកចង់យកធ្វើជាកន្លែងជួបប្រជុំគ្នាសម្រាប់ក្រុមអ្នកគោរពបូជាសាតាននិងមេធ្មប់។ ទោះជាមិនទាន់បានសម្រេចប៉ុន្តែអ្នកខ្លះបានលើកឡើងថាមានការជួបប្រជុំគ្នាជាញឹកញាប់ និយាយងាយៗបានថា ផ្ទះនេះជាទីតាំងចួបជុំសម្រាប់មនុស្សដែលនិយមលទ្ធិសាតាននិងមន្តអាគមន៍ខ្មៅ។
យោងតាមការនិទានតៗគ្នាបានឱ្យដឹងថា ថ្ងៃមួយលោកម្ចាស់ Count (ខោន) បានចេញទៅដើរលេង ពេលត្រលប់មកវិញស្រាប់តែប្រទះសពប្រពន្ធត្រូវគេធ្វើឃាត ផ្ទៃមុខរបស់សពខូចខ្ទេចខ្ទីមើលមិនយល់ មិនតែប៉ុណ្ណោះកូនស្រីក៏បាត់ខ្លួនសាបសូន្យ ព្រោះតែហេតុនេះលោកម្ចាស់ ខោន បានប្រមូលរបស់របរចេញពីភូមិគ្រឹះនោះហើយមិនត្រលប់ទៅវិញទៀតនោះទេ ប៉ុន្តែអ្នកដែលមិនមានអបិយជំនឿបាននាំគ្នាទៅស៊ើបអត្រានុកូលដ្ឋាន ហើយរកឃើញថា លោកម្ចាស់ខោន នៅលីវ មិនមានកូនមិនមានប្រពន្ធនោះឡើយ។
ប៉ុន្តែក្រុមអ្នកមានជំនឿបានប្រាប់ថាធ្លាប់បានឮសំឡេងមនុស្សស្រីស្រែកយំដង្ហោយចេញពីផ្ទះនោះ ជាពិសេសនៅវេលាដែលពេលថ្ងៃមានវេលាយូរជាងពេលយប់។ អ្នកដែលមើលថែផ្ទះនោះបានចេញមកប្រាប់ថា មិនពិតនោះទេ ផ្ទះមួយខ្នងនេះមិនមានស្អីនោះទេ បើមានខ្មោចមែនគឺខ្មោចគាត់នេះហើយដែលចេញមកលងដើម្បីបន្លាចមនុស្សដែលចូលមករញ៉េរញ៉ៃក្នុងផ្ទះ។
យ៉ាងណាមិញរឿងដែលធ្វើឱ្យកេរ្តិ៍ឈ្មោះផ្ទះនេះល្បីល្បាញនិងស័ក្ដិសិទ្ធិនោះគឺ កាលពីមិនប៉ុន្មានឆ្នាំមុននេះ មានហេតុការណ៍រញ្ជួយផែនដី បណ្ដាលឱ្យមានការខូចខាតខ្លាំងនៅតំបន់ៗនោះនិងតំបន់ជិតៗនោះ ប៉ុន្តែផ្ទះខ្មោចនេះបែរជាមិនមានខូចខាតអ្វីសូម្បីបន្តិច។
២.គេហដ្ឋាន ដារីអូ នៅក្រុងវេនីស (Canal Grande)
ផ្ទះមួយខ្នងនេះកសាងឡើងនៅសតវត្សរ៍ទី១៥ ជាយុគសម័យដែលទីក្រុងនេះកំពុងតែរុងរឿងបំផុត។ ផ្ទះនេះមានទីតាំងស្ថិតនៅលើអូរ ខាណាល់ គ្រេន Canal Grande ស្ថិតនៅផ្នែកខាងស្ដាំនៃកំពង់ទូកជីខ្លីអូ Giglio។ បើនិយាយពីភាពស្រស់ស្អាតមិនចាំបាច់និយាយនោះទេ ព្រោះគ្រាន់តែមើលតាមរូបភាពអាចនិយាយបានថាស្អាតដូចផុសចេញពីក្នុងគំនូរ។ ផ្ទះនេះត្រូវបានគេនិយាយតៗគ្នាថាជាផ្ទះត្រូវបណ្ដាសារ ព្រោះអ្នកដែលរស់នៅក្នុងផ្ទះនេះរមែងមិនស្លាប់ដោយស្រួលៗនោះឡើយ។
បើនិយាយចាប់តាំងកសាងភ្លាម កូនស្រីម្ចាស់ផ្ទះស្រាប់តែសម្លាប់ខ្លួនព្រោះតែបញ្ហាសេដ្ឋកិច្ចរបស់ប្ដី ហើយក្រោយមកទៀតប្ដីក៏ស្លាប់តៃហោងតាម បន្ទាប់ពីនោះមកម្ចាស់ផ្ទះក្រោយៗមកទៀត ក៏មានហេតុការណ៍ត្រូវស្លាប់ជាបន្តបន្ទាប់ ដូច្នេះអ្នកដែលធ្វើដំណើរកាត់ផ្ទះនេះរមែងព្រឺសំបុរ ប៉ះរោមគ្រប់ៗគ្នា។
ដូចគ្នានឹងផ្ទះខ្មោចលងឬផ្ទះត្រូវបណ្ដាសារជាច្រើនកន្លែង គ្រប់យ៉ាងដែលកើតឡើងរមែងមានដើមហេតុ។ រឿងហេតុដែលបង្កឱ្យមានជាដំណឹងយ៉ាងគគ្រឹកគគ្រេងនោះកើតឡើង នៅថ្ងៃទី១៩ ខែកក្កដា ឆ្នាំ១៩៧០ លោកម្ចាស់ Count ម្នាក់ត្រូវបានសាហាយប្រុសរបស់ខ្លួនធ្វើឃាតនៅក្នុងផ្ទះមួយខ្នងនេះ។ រឿងហេតុអាស្រូវស្អុយគគ្រុកនេះមិនសូវជាកើតមានឡើយនៅក្នុងទីក្រុងវេនីស ដែលជាទីកន្លែងត្រូវបានចាត់ទុកថារ៉ូមែនទិក ដូច្នេះទើបរឿងនេះបានក្លាយជារឿងដែលអ្នកស្រុកវេនីសលើកយកមកនិយាយយ៉ាងសប្បាយមាត់។
ប៉ុន្តែបើតាមអ្នកសិក្សាបានចេញមកបង្ហាញថាគ្រប់យ៉ាងដែលឮពាក់ព័ន្ធនឹងផ្ទះនេះស្ទើតែគ្មានអ្វីដែលជាការពិតនោះឡើយ ព្រោះឪពុកម្ដាយកូនដែលជាដើមហេតុនោះ ថ្វីត្បិតតែមានពិតមែន តែការស្លាប់ពិតប្រាកដគឺម្ដាយឈឺស្លាប់ឪពុកក៏ឈឺស្លាប់ ចំណែកកូនដែលព័ត៌មានលើកឡើងថាស្លាប់ក្នុងសង្គ្រាមនោះ ក៏មិនពិតនោះដេរ តែជាកូនដែលមាននាមត្រកូលដូចគ្នា មែនទែនទៅផ្ទះនោះត្រូវបានគេផ្លាស់ប្ដូរម្ចាស់អស់ជាច្រើននាក់ ដែលម្ចាស់ថ្មីមានទាំងអ្នកនៅក្នុងត្រកូលនិងអ្នកត្រកូលផ្សេង ហើយក៏មានម្ចាស់ជាជាតិសាសន៍ផ្សេងដែរ តែមិនធ្លាប់មាននរណាម្នាក់សម្លាប់ខ្លួននៅក្នុងផ្ទះនេះនោះឡើយ។
៣.គេហដ្ឋានម៉ាញ់ណូនី នៅខេត្តហ្វឺរ៉ារ៉ា (Magnoni, Ferrara)
ផ្ទះនេះស្ថិតនៅខេត្ត ខូណា (Cona) ស្ថិតនៅមិនឆ្ងាយពីខេត្ត ហ្វឺរ៉ារ៉ា មិនប៉ុន្មានគីឡូនោះឡើយ។ ផ្ទះនេះត្រូវបានគេចាត់ចូលជាផ្ទះខ្មោចសណ្ឋិតក្នុងអំឡុងគ.ស ១៩៨០ អ្នកដែលបង្កើតឱ្យមានសាច់រឿងនេះឡើង ការពិតទៅអាចហៅថាក្មេងមួយក្រុមសមជាង ពួកក្មេងទាំងនេះលួចចូលទៅក្នុងផ្ទះដែលគេបោះបង់ចោលមួយនេះ ហើយជួបគ្រោះថ្នាក់ចរាចរណ៍ទាំងក្រុម មានតែម្នាក់ប៉ុណ្ណោះដែលនៅរស់ ហើយបាននិយាយរឿងរ៉ាវដែលបានកើតឡើងនៅយប់នោះឱ្យគ្រប់គ្នាស្ដាប់។
ខណៈដែលពួកគេកំពុងតែលួចចូលទៅក្នុងផ្ទះដែលគេបោះបង់ចោលយ៉ាងក្លៀវក្លានោះ ស្រាប់តែខ្សែភ្នែកពួកគេមើលឃើញភ្នែកដែលពោរពេញដោយកំហឹងមួយគូសម្លឹងចេញមកតាមបង្អួចពីក្នុងផ្ទះជាន់លើហើយចង្អុលមកពួកគេព្រមទាំងស្រែកសន្ធាប់បណ្ដេញពួកញេ រហូតពួកគេភ័យខ្លាចនាំគ្នារត់ចេញពីផ្ទះសឹងមិនទាន់ ហើយក៏ជួបនឹងឧប្បត្តិហេតុក្រឡាប់រថយន្ត។
បន្ទាប់ពីក្មេងប្រុសនោះប្រាប់រឿងដែលខ្លួនជួប ស្រាប់តែទ្វារបង្អួចទាំងអស់ត្រូវបានបិទជិត តែក្រោយពីនោះមិនយូរប៉ុន្មានមានបង្អួចមួយបើកឡើងវិញ ដោយគ្មានអ្នកណាអាចរកពាក្យអ្វីមួយអត្ថាធិប្បាយចំពោះរឿងនេះបាន។ ទ្វារបង្អួចដែលបើកនោះគឺជាបង្អួចតែមួយដូចដែលក្មេងប្រុសម្នាក់នោះបានតំណាលប្រាប់គេ ។
ផ្ទះនោះត្រូវបានគេទុកចោល ហើយក៏គ្មានអ្នកណាម្នាក់ស្គាល់ថាម្ចាស់បច្ចុប្បន្នគឺជាអ្នកណាដែរ មានអ្នកតាមប្រម៉ាញ់ខ្មោចជាច្រើនដែលលួចចូលទៅក្នុងផ្ទះនោះ ដោយភាគច្រើនអ្វីដែលនិយាយតៗគ្នាពាក់ព័ន្ធនឹងផ្ទះនោះគឺរឿងឮសំឡេងមនុស្សស្រីស្រែកនិងសំឡេងក្មេងយំ ចំណែកអ្វីដែលលើសពីនេះគឺមើលឃើញស្រមោលខ្មៅស្ទង់ៗចេញពីបង្អួចជាន់ពីរ ដែលជាបង្អួចដែលគេតែងតែនិយាយតៗគ្នានោះឯង។
៤.ប្រាសាទម៉ុនតេបេលឡូ ខេត្ត រីមិនី (Castello di Montebello, Rimini)
រីមិនី មិនត្រឹមតែមានឆ្នេរខ្សាច់ស្ថិតនៅក្រុងប៉តជីអូ ខេត្តត័ររៀនណាទេ ប៉ុន្តែនៅមានប្រាសាទបុរាណមួយកន្លែងដែលត្រូវបានគេផ្ដល់រហស្សនាមឱ្យថាផ្ទះខ្មោចសណ្ឋិតដ៏គួរឱ្យខ្លាចបំផុតមួយរបស់ប្រទេសអ៊ីតាលី។ តាមតំណាលតៗគ្នាបាននិយាយដល់នាងតូច អាត់ហ្សូរីណា(Azzurrina) ដែលកូនស្រីរបស់ អូកុតឆូណេ ដិ ម៉ុនតេប៊េលឡូ។
ក្មេងតូចនេះកើតក្រោយគ.សទី១៤ ក្មេងនេះកើតមកជាមួយនឹងសំបុរភឿក ដែលនៅក្នុងសម័យនោះចាត់ទុកថាជាបិសាច ជាមនុស្សចង្រៃ ដូច្នេះឪពុកចាំបាច់ត្រូវតែឃុំឃាំងកូនខ្លួនឯងឱ្យនៅតែក្នុងប្រាសាទដោយមានអ្នកយាម២នាក់ ថ្ងៃមួយក្មេងតូចលេងកូនបាល់ ហើយកូនបាល់រមៀលជ្រុះចូលទៅក្នុងបន្ទប់ក្រោមដី នាងតូចនោះបានរត់ចុះទៅតាមរើស ចុះទៅមិនយូរប៉ុន្មានអ្នកយាមទាំងពីរបានឮសំឡេងរបស់ក្មេងតូចនោះស្រែក តែនៅពេលអ្នកយាមរត់ចុះទៅរកក៏មិនមានឃើញអ្វី មិនឃើញអ្នកណាម្នាក់ សូម្បីតែអាត់ហ្សូរីណាក៏មិនឃើញ។
ថ្វីត្បិតរកសពក្មេងតូចមិនឃើញតែវិញ្ញាណរបស់នាងហាក់ដូចជានៅវិលវល់ក្នុងបរិវេណប្រាសាទនេះ ព្រោះរាល់៥ឆ្នាំម្ដង ដល់ថ្ងៃដែលនាងបាត់ខ្លួនដោយអាថ៌កំបាំងនោះ នាងនឹងបង្ហាញខ្លួនឱ្យគេឃើញ សព្វថ្ងៃនេះប្រាសាទនេះនៅបើកដំណើរការឱ្យមនុស្សទិញសំបុត្រចូលទស្សនាដដែល។
៥.វិមាន វ៉ាលាមេលានី នៃខេត្តអាន់ខូណា (Castle Serra San Quirico)
គេហដ្ឋានដែលត្រូវបានគេចាត់ទុកជាកន្លែងខ្មោចលងសាហាវជាប្រវត្តិសាស្ត្រនេះស្ថិតនៅលើកំពូលភ្នំនៃក្រុង ស៊ឺរ៉ា សាន គ្វីរីកូ (Serra San Quirico) នៃខេត្តអាំងខូណា។ ដំណើរដើមទងនៃសាច់រឿងខ្មោចលងនេះកើតឡើងក្នុងសម័យសង្គ្រាមលោកលើកទីពីរ មានពាក្យតំណាលតៗគ្នាថា ថ្ងៃមួយក្នុងសម័យសង្គ្រាមផ្ទះមួយខ្នងនេះមានរៀបចំពិធីជប់លាងតូចមួយ ស្រាប់តែពេលនោះទាហានណាស៊ីសអាល្លឺម៉ង់បានសំរុកចូលមកហើយបាញ់សម្លាប់មនុស្សដែលនៅទីនោះអស់ប្រមាណជា២០នាក់។ មុនស្លាប់លោកម្ចាស់ខោនបានមានវាចាថាលោកម្ចាស់នឹងសណ្ឋិតនៅទីនេះដើម្បីថែរក្សាការពារផ្ទះមិនឱ្យមាននរណាចូលមកញ៉ាំញីជាដាច់ខាត។
ក្រោយមានកើតហេតុការណ៍នោះ ផ្ទះដ៏ស្អាតមួយខ្នងនេះចាប់ផ្ដើមល្បីរន្ទឺរឿងខ្មោចលងដូចជាមានឮសំឡេងស្រែកជាដើម។ ប៉ុន្តែហេតុការណ៍ដែលល្បីល្បាញពាក់ព័ន្ធនឹងផ្ទះនេះកើតឡើងនៅឆ្នាំ១៩៧០ គឺនៅពេលមានគូស្នេហ៍មួយគូនាំគ្នាមកថតវីដេអូ Pre-Wedding នៅទីនោះ ពេលថតគ្រប់យ៉ាងធម្មតា តែពេលត្រលប់មកវិញរូបភាពទាំងអស់ប្រែជាពណ៌ខ្មៅ ហើយមានសំឡេង Background ជាសំឡេងលេងវីយូឡុងក្នុងពិធីជប់លាងទៅវិញ។
រឿងហេតុដែលធ្វើឱ្យមានការចងចាំទាក់ទងនឹងផ្ទះនេះដែរគឺកើតឡើងនៅឆ្នាំ១៩៨០ មានក្មេងស្រីម្នាក់បានចូលទៅដើរលេងនៅទីនោះរួចហើយក៏បានចូលទៅក្នុងផ្ទះនោះបន្ទាប់មកនាងបានឃើញរូបកូនកម្លោះកូនក្រមុំមួយគូមើលទៅស្អាតនាងក៏យកត្រលប់មកផ្ទះជាមួយ យប់នោះនាងសុបិនអាក្រក់មួយយប់ មើលឃើញមនុស្សស្រីម្នាក់មកខ្សឹបឱ្យនាងយករូបថតទៅសង នាងភ័យស្រែករហូតភ្ញាក់ទាំងខ្លួន ពេលភ្ញាក់ដឹងខ្លួនឃើញម្ដាយនាងមានទឹកមុខស្លេកស្លាំងនៅមាត់ទ្វារហើយប្រាប់នាងថាបានឮសំឡេងនាងស្រែក ប៉ុន្តែនៅពេលចូលមកមើលកូនស្រាប់តែឃើញមនុស្សស្រីស្លៀកឈុតសខ្សឹបដាក់ត្រចៀកកូនស្រី រួចក៏រលាយបាត់ទៅ។ បន្តបន្ទាប់មកទៀតអ្នកស្រុកដែលរស់នៅម្ដុំនោះបានហៅមាត់ជ្រោះដែលស្ថិតនៅទីនោះថា មាត់ជ្រោះបិសាច៕
ប្រភព៖ The Cloud