លោក Igor Zhelezovsky អ្នកជិះស្គីប្រណាំង ដែលធ្លាប់ធ្វើឱ្យកក្រើកពិភពលោកក្នុងទសវត្សទី៨០និង៩០ ជនជាតិបេឡារូស បានទទួលមរណភាព ក្នុងវ័យ៥៧ឆ្នាំ ដោយសារជំងឺកូវីដ-១៩ នៅថ្ងៃអាទិត្យ ទី១២ខែមិថុនា ឆ្នាំ២០២១ ថ្មីៗនេះ។ នេះបើតាមកាចេញផ្សាយរបស់សារព័ត៌មាន rsport។
លោកបានសាងស្នាដៃជាច្រើនជំនាន់សម័យសហភាពសូវៀត លើវិញ្ញាសាប្រណាំងស្គី ផ្នែកបុរស ពោលគឺធ្លាប់ឈ្នះជើងឯកពិភពលោក World Sprint រហូតដល់ទៅ៦លើកគឺនៅឆ្នាំ១៩៨៥, ១៩៨៦, ១៩៨៩ និង១៩៩១ ក្នុងនាមជាសហភាពសូវៀត ហើយនៅឆ្នាំ១៩៩២ ក្នុងនាមជាសហធនរដ្ឋឯករាជ្យ ដែលទើបបំបែកពីសូវៀត និងឆ្នាំ១៩៩៣ ឈ្នះក្នុងនាមជាពលរដ្ឋបេឡារូស។
លោកធ្លាប់ឈ្នះមេដាយប្រាក់អូឡាំពិកឆ្នាំ១៩៩៤ វិញ្ញាសា១០០០ម៉ែត្រ និងឈ្នះមេដាយសំរឹទ្ធិឆ្នាំ១៩៨៨ ព្រមទាំងធ្លាប់ឈ្នះក្នុងព្រឹត្តិការណ៍ World Cup ឆ្នាំ១៩៩១,១៩៩២,១៩៩៣ សុទ្ធសឹងជាមេដាយមាសផងដែរ។
បុរសកម្ពស់១.៨៣ម៉ែត្ររូបនេះធ្លាប់ជាប្រធានសហព័ន្ធកីឡាជិះស្គីរបស់បេឡារុស ចន្លោះឆ្នាំ១៩៩៦ដល់២០០៥ មុនលោកសម្រេចចិត្តចូលនិវត្តន៍ ខណៈលោកក៏ជាសមាជិករបស់សហព័ន្ធកីឡាជិះស្គីអន្តរជាតិផងដែរ៕