បាត់ដំបង៖ មេខ្លោងកាប់រានដីព្រៃរបស់រដ្ឋចំនួន ២នាក់ត្រូវបានសមត្ថកិច្ចជំនាញចុះឃាត់ខ្លួនបញ្ជូនទៅកាន់តុលាកាអនុវត្តទោស។
លោកវរសេនីយ៍ឯក ប៉ាង ហៀង អធិការនគរបាលស្រុកគាស់ក្រឡ បានប្រាប់ឲ្យដឹងថា អនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង នៅថ្ងៃទី ១៨ ខែធ្នូ ឆ្នាំ ២០២២នេះកម្លាំងជំនាញបាននាំខ្លួនមនុស្ស ២នាក់ជាមេខ្លោង បញ្ជូនទៅតុលាកាដើម្បីអនុវត្តទោសពីបទកាប់ទន្រ្ទានយកដីរដ្ឋខុសច្បាប់ម្តងហើយម្តងទៀត ដែលប្រព្រឹត្តិនៅត្រង់ចំណុចភ្នំស្នរ ភូមិតានួត ឃុំព្រះផុស ស្រុកគាស់ក្រឡ ខេត្តបាត់ដំបង។
ជនដែលពាក់ព័ន្ធខាងលើឈ្មោះមឿន រឿន ភេទប្រុស អាយុ ៤៥ឆ្នាំ មុខរបរ ធ្វើស្រែ និងម្នាក់ទៀតឈ្មោះវុិត សាមឿន ភេទប្រុស អាយុ ៣២ ឆ្នាំ មុខរបរ ធ្វើស្រែ ទាំង ២នាក់មានទីលំនៅក្នុងភូមិតានួត ឃុំព្រះផុស ស្រុកគាស់ក្រឡ។
បច្ចុប្បន្នកម្លាំងនគរបាលការិយាល័យជំនាញបានននាំខ្លួន និងបញ្ជូនសំណុំរឿងនេះទៅកាន់អយ្យការ អមសាលាដំបូងខេត្តបាត់ដំបងអនុវត្តតាមនីតិវិធី៕
អត្ថបទ: ដំបងក្រញូង