ទីបំផុតកំណត់ត្រាបានចារក្នុងប្រវត្តិសាស្រ្តហើយ ដោយកម្ពុជា អាចរកបានជ័យជម្នះជាលើកដំបូងរបស់ខ្លួនក្នុងវគ្គជម្រុះតាមពូលពានរង្វាន់ AFF Championship (AFF Mitsubishi Electric Cup) បន្ទាប់ពីទទួលឱកាសចូលដល់វគ្គនេះជាលើកទី៩។
ជ័យជម្នះរបស់កម្ពុជា នេះបានយកឈ្នះលើក្រុមបាល់ទាត់ជម្រើសជាតិហ្វីលីពីន ដោយលទ្ធផល ៣-២ ក្នុងប្រកួតបើកឆាកពូល A នាល្ងាចថ្ងៃអង្គារ នេះ ខណៈ៨លើកនៃប្រកួតបើកឆាកកន្លងមកសុទ្ធតែបរាជ័យនៅថ្ងៃបើកឆាកទាំងអស់។
ជាមួយគ្នានេះដែរឯកឧត្តម ស សុខា រដ្ឋលេខាធិការក្រសួងអប់រំ យុវជននិងកីឡា និងក្រុមគ្រួសារ បានអញ្ជើញចូលទស្សនាការប្រកួតផ្ទាល់នៅកីឡដ្ឋាន បានបង្ហោះនៅលើហ្វេសប៊ុកថា៖«អបអរសាទរក្រុមបាល់ទាត់ជម្រើសជាតិកម្ពុជា រកបានជ័យជម្នះជាប្រវត្តិសាស្ត្រក្នុងប្រកួតបើកឆាកនៃវគ្គជម្រុះតាមពូល ពានរង្វាន់បាល់ទាត់បុរសធំប្រចាំតំបន់អាស៊ាន 2022 AFF Championship (AFF Mitsubishi Electric Cup 2022) ពោលគឺយកឈ្នះលើក្រុមជម្រើសជាតិហ្វីលីពីន ដោយលទ្ធផល៣-២ លើទីលានពហុកីឡដ្ឋានជាតិមរតតេជោ ក្នុងរាជធានីភ្នំពេញ នៅល្ងាចថ្ងៃអង្គារ ទី២០ ខែធ្នូ ឆ្នាំ២០២២ នេះ»។
ឯកឧត្តម បានបន្តថា៖«ក្នុងនាមក្រុមគ្រួសារនៃបាល់ទាត់កម្ពុជា ខ្ញុំសូមជូនពរឱ្យក្រុមគោព្រៃកម្ពុជា ទទួលបានលទ្ធផលជាផ្លែផ្កា នៅក្នុងប្រកួតជាបន្តបន្ទាប់ ដែលនៅសល់ក្នុងពូល A នេះ»។
ចំពោះកាលវិភាគប្រកួតបន្តរបស់កម្ពុជា មាន៖
- កម្ពុជា ជួប ឥណ្ឌូនេស៊ី ថ្ងៃទី២៣ ខែធ្នូ វេលាម៉ោង ៤:៣០នាទីល្ងាច ក្នុងពហុកីឡដ្ឋាន Gelora Bung Kamo Stadium ទីក្រុង Jakarta
- កម្ពុជា ជួប ប្រ៊ុយណេ ថ្ងៃទី២៩ ខែធ្នូ វេលាម៉ោង ៥:០០នាទីល្ងាច ក្នុងពហុកីឡដ្ឋានជាតិមរកតតេជោ រាជធានីភ្នំពេញ
- កម្ពុជា ជួប ថៃ ថ្ងៃទី០២ ខែមករា វេលាម៉ោង ៧:៣០នាទីយប់ ក្នុងពហុកីឡដ្ឋាន Thammasat Stadium ខេត្ត Pathum Thani។
គួររំលឹកផងដែរថា ក្រុមជម្រើសជាតិហ្វីលីពីន ស្ថិតនៅពូល A ជាមួយជើងខ្លាំងថៃ, កម្ពុជា, ឥណ្ឌូនេស៊ី, ហ្វីលីពីន, និង ប្រ៊ុយណេ ក្នុងពានរង្វាន់ AFF Mitsubishi Electric Cup 2022។ ចំណែកពូល B មាន វៀតណាម, ម៉ាឡេស៊ី, សិង្ហបុរី, មីយ៉ាន់ម៉ា និង ឡាវ៕