កាលពីពេលថ្មីៗនេះខ្សែប្រយុទ្ធ Son Heung Min របស់ក្រុមជម្រើសជាតិកូរ៉េខាងត្បូង ដែលទើបអស់ភារកិច្ចក្នុងព្រឹត្តិការណ៍ FIFA World Cup ឆ្នាំ ២០២២ ក្រោយធ្លាក់ត្រឹមវគ្គ១៦ក្រុមចុងក្រោយ បានជាប់ពាក់ព័ន្ធក្នុងពាក្យចចាមអារ៉ាមថាមានទំនាក់ទំនងស្នេហាជាមួយតារាសម្ដែងកូរ៉េ Kim Go Eun។
ជាពិសេសអ្នកនិយមលេងអ៊ីនធឺណិតម្នាក់បានអះអាងថា Kim Go Eun បានតាមដាន (Followed) គណនី Instagram ឯកជនរបស់កីឡាករ Son Heung-min។ ខណ: Son Heung Min ក៏បានចុច “Like” រូបភាពរបស់ Kim Go Eun និងបង្ហោះ “Lovestagram” ជាមួយនាង។
ទោះជាយ៉ាងណាក៏ដោយ នៅថ្ងៃទី២០ ខែធ្នូ ភាគីរបស់តារាសម្តែង Kim Go Eun បានច្រានចោលពាក្យចចាមអារ៉ាមបែបនេះទាំងស្រុង ហើយបានហៅពួកគេថា «គ្មានមូលដ្ឋានទាំងស្រុង» គ្រប់យ៉ាងគឺស្ថិតក្នុងឋានៈអ្នកគាំទ្រក្រុមជម្រើសជាតិកូរ៉េខាងត្បូងប៉ុណ្ណោះ។
នេះមិនមែនជាលើកទីមួយឡើយ ព្រោះកន្លងមកដំណឹងស្នេហាដែលធ្វើឱ្យមហាជនភ្ញាក់ផ្អើល និងចាប់អារម្មណ៍ខ្លាំងរវាង តារាបាល់ទាត់សញ្ជាតិកូរ៉េខាងត្បូង Son Heung Min និងតារាចម្រៀងកូរ៉េមួយទៀត ដែលជាសំណព្វចិត្តយុវវ័យទូទាំងពិភពលោក Kim Jisoo សមាជិកក្រុម BlackPink ក្រោយមានលេចឮដំណឹងថា Super Star មកពីក្រុម Tottenham Hotspur បានឆ្លៀតហោះទៅកាន់ក្រុង Paris មុននឹងហោះទៅកាន់ប្រទេសកំណើត ដើម្បីត្រៀមខ្លួនជួយក្រុមជម្រើសជាតិក្នុងវគ្គប្រកួតជម្រុះ 2022 FIFA World Cup Asia Qualifier រវាងកូរ៉េខាងត្បូងនិងរុស្សី កាលពីថ្ងៃទី៧ ខែតុលា ឆ្នាំ២០២១។
ប៉ុន្តៃស្ថានីយទូរទស្សន៍ SBS បានចេញមកផ្សព្វផ្សាយថាដំណឹងចចាមអារ៉ាមខាងលើនេះមិនមែនជាការពិតនោះទេ ព្រោះ Jisoo និង Son Heung Min មិនស្គាល់ឬជិតស្និទ្ធិគ្នានោះទេ ថែមទាំងបង្ហាញភស្ដុតាងដោយយកឃ្លីបសម្ភាសន៍ចាស់ដែល Jisoo ធ្លាប់បកស្រាយកាលពីឆ្នាំ២០១៩ថា រូបខ្លួនជាប់ពាក់ព័ន្ធព័ត៌មានស្នេហាព្រោះតែទៅទស្សនាការប្រកួតដែល Son លេងឱ្យ Tottenham Hotspur ប៉ុន្តែការទៅនោះគឺទៅក្នុងឋានៈជាអ្នកគាំទ្របាល់ទាត់ម្នាក់ប៉ុណ្ណោះ ហើយសមីខ្លួនអះអាងថាមិនបានស្គាល់ជិតស្និទ្ធិជាមួយនឹង Son ឡើយ។
