កីឡដ្ឋានធំ (Main Stadium)នៃពហុកីឡដ្ឋានជាតិមរតកតេជោ សម្រេចបាន៩៥% ហើយនៅសល់តែ៥%ទេ ដែលកំពុងកែលម្អ រចនា សម្អាតប៉ុណ្ណោះ។ នេះបើតាមការបញ្ជាក់របស់ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) ថ្លែងនៅថ្ងៃទី៣ ខែមេសា ឆ្នាំ២០២១ នេះ។
កីឡដ្ឋានធំនេះមានកៅអីអង្គុយចំណុះ៦ម៉ឺននាក់ ក្នុងនោះការបំពាក់កៅអីសម្រេចបាន ២២០០០ហើយ ហើយនៅនៅសប្តាហ៍ទី១ ឬសប្តាហ៍ទី២នៃខែឧសភា ឆ្នាំ២០២១នឹងសម្រេចបាន១០០%នៃកៅអីសរុបចំនួន៦ម៉ឺននេះ។ ការដាំស្មៅទីលានបាល់ទាត់ ដែលដាំរួចរាល់ទាំងអស់ហើយ ដោយគ្រាន់តែមិនទាន់ជួសជុល កាត់តម្រឹមឲ្យស្មើគ្នា។ ជាមូលដ្ឋាន ផ្នែកខាងក្រោមនៃទីលានបាល់ទាត់គឺបានបំពាក់នូវប្រព័ន្ធបង្ហូរទឹក និងខ្សាច់ដែលទ្រទ្រង់ស្មៅល្អចំនួន៥ប្រភេទ ដែលភាគីចិន បានអះអាងថាជាស្មៅល្អៗយកមកពិសោធន៍ដាំ សមស្របនឹងបរិយាសកម្ពុជាយើង ក្រោមការទទួលស្គាល់ពីសហព័ន្ធកីឡាបាល់ទាត់អន្តរជាតិ (FIFA) ប៉ុន្តែនៅក្នុងចំណោមស្មៅល្អៗ ទាមង៥ប្រភេទនេះ គឺមានតែស្មៅ១ប្រភេទប៉ុណ្ណោះ ដែលដុះល្អ សមស្របទៅនឹងបរិយាកាស សីតុណ្ហភាព កម្តៅ សំណើម នៃទីលានដែលបើកដំបូល។
ស្មៅមួយប្រភេទដែលធ្វើពិសោធន៍ហើយលូតលាស់បានល្អជាងគេនោះ គឺមានភាបរស់រវើក ដែលជួយដល់ល្បឿនបាល់រត់បានល្អ ជួយដល់ល្បឿននៃការរត់របស់អត្តពលិក ព្រមទាំងជួយសម្រាលដល់អត្តពលិកពេលដួលកុំឲ្យមានគ្រោះថ្នាក់ធ្ងន់បានទៀតផង។
ក្រៅពីនេះគឺនៅសល់តែផ្លូវរត់អត្តពលកម្មជុំវិញទីលានបាល់ទាត់ ដែលត្រូវក្រាលកម្រាលតាមស្តង់ដារបស់សហព័ន្ធកីឡាអត្តពលកម្មអន្តរជាតិ ដោយភាគីចិនត្រូវកម្មង់ពីប្រទេសបារំាងដែលនឹងមកដល់ឆាប់ៗ ហើយគ្រោងនឹងក្រាលនាដើមខែឧសភា ដោយប្រើប្រាស់ប្រមាណ២សប្តាហ៍នឹងរួចរាល់ហើយ។
ដោយឡែកអាងទឹកព័ន្ធជុំវិញកីឡដ្ឋានធំ ការចាក់ផ្លូវបេតង់ក្នុងពហុកីឡដ្ឋាន ការរៀបចំបន្ទប់សណ្ឋាគារស្នាក់នៅពិសេសៗ ការបំពាក់ភ្លើង ការបំពាក់ប្រព័ន្ធសំឡេងកំពុងដំណើរការជិតរួចរាល់ហើយផងដែរ៕
ប្រភព៖Cambodia SEA GAMES 2023