សិល្បៈអន្តរជាតិ៖ ថ្មីៗនេះក្រុមអ្នកគាំទ្រតារាចម្រៀង Celine Dion បានប្រមូលផ្ដុំគ្នានៅមុខទីស្នាក់ការទស្សនាវដ្ដី Rolling Stone ដើម្បីតវ៉ាប្រឆាំងនឹងការសម្រេចដែលទស្សនាវដ្ដីមួយនេះដកឈ្មោះម្ចាស់បទ Titanic ចេញពីបញ្ជីឈ្មោះ «200 Greatest Singers of all time»។
យោងតាមការផ្សាយរបស់ Variety បានឱ្យដឹងថាក្រុមអ្នកគាំទ្រជនជាតិកាណាដាបានមកប្រមូលផ្ដុំគ្នានៅមុខទីស្នាក់ការកណ្ដាលរបស់ទស្សនាវដ្ដីនៅទីក្រុងញូវយ៉ករួមជាមួយនឹងប៉ាដាសរសេរអក្សរប្រឆាំង។ តំណាងឱ្យក្រុមបាតុករបានប្រាប់ថាពួកគេគឺជាសមាជិកក្រុម Redheads ក្រុមអ្នកស្រលាញ់ Celine Dion នៅក្រុង Montreal។ ពួកគេបានធ្វើដំណើររយៈពេល៦ម៉ោងដើម្បីមកប្រមូលផ្ដុំគ្នាស្វែងរកយុត្តិធម៌ឱ្យតារាចម្រៀងដែលពួកខ្លួនស្រលាញ់ព្រមជាមួយនឹងសម្រែក «យុត្តិធម៌សម្រាប់ Celine»។
បើតាមការផ្សាយពី TMZ ពិធីករទូរទស្សន៍កាណាដា Julie Synder ដែលបានចូលរួមនៅក្នុងបាតុកម្មលើកនេះបានលើកឡើងថាក្រុមរបស់ខ្លួនមកទីនេះដើម្បីចង់ឱ្យទស្សនាវដ្ដីចេញលិខិតសុំទោសជាផ្លូវការចំពោះតារាដែលខ្លួនគាំទ្រ។ «យើងសង្ឃឹមថា Rolling Stone នឹងទទួលស្គាល់កំហុស។ មនុស្សយើងគ្រប់គ្នាជួនកាលក៏អាចប្រព្រឹត្តកំហុសដែរ»។
ទស្សនាវដ្ដីតន្ត្រីរបស់អាមេរិកមួយនេះបានប្រកាសឈ្មោះតារាចម្រៀងឆ្នើមគ្រប់រដូវកាលពីថ្ងៃទី២ ដោយនៅក្នុងបញ្ជីនោះមានតារាចម្រៀងល្បីជាច្រើនរូបមិនមានឈ្មោះឬមានឈ្មោះនៅបាតតារាង ខណៈ Deline Dion គ្មានឈ្មោះជាប់នៅក្នុងបញ្ជី Top200 ដែលករណីនេះធ្វើឱ្យតារានិងអ្នកគាំទ្រជាច្រើនហួសចិត្តជាខ្លាំង។
តារាសម្ដែង Yvette Nicole Brown បានរិះគន់នៅលើបណ្ដាញសង្គមចំពោះអ្នកដែលរៀបចំតារាងបញ្ជីឈ្មោះលើកនេះថា «ពួកគេដាក់ចំណាត់ថ្នាក់ Michael Jackson ទៅដល់លេខ៨៦ ហើយបែរជាគ្មានឈ្មោះ Celine Dion នៅក្នុងបញ្ជី។ Michael Jackson គួរតែស្ថិតនៅ Top3 ចំណែក Celine Dion យ៉ាងហោចណាស់ក៏ស្ថិតនៅក្នុង Top10 ដែរ។
TMZ បានអះអាងថាតារាចម្រៀងមានកេរ្តិ៍ឈ្មោះល្បីជាច្រើនដួងមិនមានឈ្មោះក្នុងបញ្ជីនោះឡើយ ប៉ុន្តែនៅពេលដែលទស្សនាវដ្ដី Rolling Stone ភ្លេចរំលេចឈ្មោះរបស់ Celine Dion គឺជារឿងដែលអត់ប្រយោជន៍បំផុត។តារាចម្រៀងជនជាតិកាណាដាគឺជាអ្នកចម្រៀងដ៏ជោគជ័យបំផុតក្នុងប្រវត្តិសាស្ត្រតន្ត្រី Pop ជាមួយនឹងពានរង្វាន់ Grammy Awards ចំនួន៥ ពានរង្វាន់ AMA ចំនួន៦ ពានរង្វាន់ Billboard ចំនួន៧ និងពានរង្វាន់ World Music ចំនួន១២។ TMZ លើកឡើងថាទោះយ៉ាងណាក៏គួរតែមានឈ្មោះតារាសម្ដែងស្រីរូបនេះនៅក្នុងបញ្ជីដែរ។
តារាចម្រៀង Celine Dion កើតនៅឆ្នាំ១៩៦៨ គឺជាតារាចម្រៀងសញ្ជាតិកាណាដា។ នាងត្រូវបានចាត់ចូលជាតារាចម្រៀង Diva ដ៏មានឥទ្ធិពលម្នាក់ក្នុងចំណោម៣របស់ពិភពលោក រួមជាមួយនឹង Whitney Houston និង Mariah Carey។ តារារូបនេះបានបញ្ចេញចម្រៀងជាភាសាអង់គ្លេស និង បារាំងដោយក្នុងនោះមានបទចម្រៀងល្បីជាច្រើនដូចជា The Power of Love, Because You Loved Me, Where Does My Heart Beat Now និងបទចម្រៀងល្បីល្បាញជាអមតៈ My Heart Will Go On បទចម្រៀងអមភាពយន្ត Titanic (1997) និង Beauty and the Beast។
កាលពីឆ្នាំ២០១៦ Billboard បានប្រសិទ្ធិនាមឱ្យ Celine Dion គឺជាម្ចាស់ក្សត្រីរួមសម័យក្នុងពិភពតន្ត្រី។ ក្រៅពីចម្រៀងតារារូបនេះធ្លាប់បានបង្ហាញវត្តមានក្នុងភាពយន្តជាច្រើន ក៏ដូចជាមុខជំនួញនិងសកម្មភាពមនុស្សធម៌ជាមួយនឹងអង្គការជាច្រើន។ កាលពីដើមខែធ្នូតារាចម្រៀងរូបនេះបានព្យួរសកម្មភាពតន្ត្រីទេសចរណ៍របស់ខ្លួនព្រោះតែកើតមានជំងឺម្យ៉ាងដែលអត្រាកើតជំងឺនេះម្នាក់ក្នុងចំណោម១លានអ្នក ហើយជាជំងឺមួយពិបាកព្យាបាលបំផុត។
ប្រភព៖ VnExpress Entertainment
