ក្រុមបាល់ទះជម្រើសជាតិកម្ពុជា គ្រោងនឹងធ្វើការប្រកួតមិត្តភាពអន្ដរជាតិ ជាមួយក្រុមជម្រើសជាតិបារាំង ឬក្រុមបាល់ទះយុវជនបារាំងអាយុក្រោម១៩ឆ្នាំ (U19) នៅអំឡុងពាក់កណ្ដាលខែកុម្ភ:ខាងមុខនេះ។
នេះបើតាមការបង្ហើបរបស់លោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធ កីឡាបាល់ទះកម្ពុជា ក្នុងព្រឹត្តិការណ៍ប្រកួតកីឡាបាល់ទះមិត្តភាព «CAMBODIA VOLLEYBALL ALL STAR» នេះរៀបចំ ឡើងដោយសហព័ន្ធកីឡាបាល់ទះកម្ពុជា ដើម្បីអបអរសាទរទិវាជ័យជម្នះ ៧មករា ខួបលើកទី៤៤ ស្ថិតនៅកីឡដ្ឋានព្រីន កាលពីថ្ងៃទី៧ ខែមករា ឆ្នាំ២០២៣ កន្លងទៅ។
ជុំវិញការប្រកួតមិត្តភាព ជាមួយក្រុមកំពុងឈរចំណាត់ថ្នាក់លេខ៤ លើពិភពលោកនេះ ត្រូវបានលោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធ បង្ហាញនូវសុទិដ្ឋិនិយមខ្ពស់ ដែលជាស្ថិតក្នុងផែនការរបស់សហព័ន្ធ ក្នុងការជំរុញក្រុមជម្រើសជាតិកម្ពុជា ធ្វើការប្រកួតមិត្តភាពអន្ដរជាតិឲ្យបានច្រើននាពេលខាងមុខ ពិសេសក្រុមខ្លាំងៗជាងខ្លួន ដើម្បីវាស់ស្ទង់ ក៏ដូចជាពង្រឹងសមត្ថភាព និងបច្ចេកទេស ឆ្ពោះទៅប្រជែងមេដាយមាសស៊ីហ្គេម ឆ្នាំ២០២៣។
លោកបណ្ឌិត អាំង សិរីពិសិដ្ឋ បានបញ្ជាក់បន្ថែមថា៖ «សហព័ន្ធនឹងធ្វើការប្រកួតមិត្តភាពអន្ដរជាតិឲ្យបានច្រើនបន្តទៀតដើម្បីបង្កើនទំនាក់ទំនង់ជាមួយប្រទេសតំបន់អាស៊ាន និងជុំវិញពិភពលោក គឺដើម្បីឲ្យវិស័យបាល់ទះកម្ពុជាដើរទាន់បរិបទកីឡាបាល់ទះពិភពលោក»។ អគ្គលេខាធិការសហព័ន្ធ បានបន្ថែមថា យើងក៏កំពុងតែបង្កើតភាពស្និតស្នាល និងគ្រោងអញ្ជើញកីឡាករបាល់ទះសហរដ្ឋអាមេរិកដើម្បីធ្វើការប្រកួតមិត្តភាពនៅកម្ពុជាផងដែរ។
គួរបញ្ជាក់ថា ការប្រកួតមិត្តភាព រវាងក្រុមបាល់ទះជម្រើសជាតិកម្ពុជា និងក្រុមបាល់ទះ Cambodia All Star មកពីជុំវិញសមាគម និងក្លិប នៅប្រទេសកម្ពុជា កាលពីថ្ងៃទី៧ ខែមករា ឆ្នាំ២០២៣ កន្លងទៅ ចំនួន៥ សិតរួចមកក្រុមបាល់ទះជម្រើសជាតិកម្ពុជា ឈ្នះ៤ លើក្រុមបាល់ទះ Cambodia All Star ឈ្នះ១៕
អត្ថបទពាក់ព័ន្ធ៖ក្រុមបាល់ទះជម្រើសជាតិកម្ពុជា យកឈ្នះគុយបា ៣សិត១ ក្នុងជំនួបមិត្តភាពអន្តរជាតិ (មានវីដេអូ)
