កុមារី Alex Eala វ័យ១៦ឆ្នាំរបស់ហ្វីលីពីន ដែលជាសមាជិកក្នុងតំបន់អាស៊ាន បានឈ្នះជើងឯកពានរង្វាន់កីឡាវាយកូនបាល់អន្តរជាតិ 2021 French Open នៅទីក្រុងបារីស លើវិញ្ញាសាវាយគូកុមារី កាលពីពាក់កណ្ដាលខែមិថុនា កន្លងទៅ ខណៈនាងបានតាំងចិត្តជាថ្មី ចូលរួមប្រកួតនៅក្នុងពានរង្វាន់ Wimbledon នៅប្រទេសអង់គ្លេស នាពេលខាងមុខទៀត។
ប្រាប់សារព័ត៌មាន TV5 របស់ហ្វីលីពីន កុមារីខាងលើបានលើកឡើងថា៖«ខ្ញុំពិតជាមានកម្លាំងចិត្តខ្លាំងណាស់ ដើម្បីចូលរួមប្រកួតក្នុងWimbledon ព្រោះវាជាលើកទី១របស់ខ្ញុំ ហើយជា Grand Slams ដែលខ្ញុំចូលចិត្តបំផុត។ ខ្ញុំបានហ្វឹកហាត់ខ្លាំងជាមួយដៃគូរបស់ខ្ញុំហើយយើងបានមើលពីចំណុចខ្វះខាតនានាមុនចូលរួមប្រកួតផ្លូវការ»។
ម្ដាយរបស់កុមារី Alex Eala មានឈ្មោះ Rizza ជាម្ចាស់មេដាយសំរឹទ្ធិវិញ្ញាសាហែលទឹកចម្ងាយ១០០ម៉ែត្រ ក្នុងស៊ីហ្គេមឆ្នាំ១៩៨៥ ហើយបច្ចុប្បន្នជានាយកហិរញ្ញវត្ថុនៅក្រុមហ៊ុនទូរគមនាគមន៍ Globe Telecom ហើយនាងជាក្មួយស្រីបង្កើតរបស់ស្នងការប្រកួតរបស់សហព័ន្ធកីឡាបាល់បោះហ្វីលីពីន លោក Noli Eala បងប្រុសបង្កើតរបស់នាងឈ្មោះ Michael ជាកីឡាករវាយកូនបាល់នៅសកលវិទ្យាល័យ Pennsylvania State នៅសហរដ្ឋអាមេរិក។
«ខ្ញុំពិតជាមានទំនុកចិត្តខ្លាំងណាស់មុនការប្រកួតមកដល់។ ខ្ញុំទៅទីនោះ (ទីក្រុងឡុងដុង) ហើយមិនរំពឹងពីអ្វីទាំងអស់ ប៉ុន្តែខ្ញុំផ្ដោតលើការប្រកួតដែលត្រូវលេងម្តងមួយប្រកួតៗ»។ កុមារី Alex Eala បន្ថែម។ រូបគេឈរនៅចំណាត់ថ្នាក់លេខ៣កម្រិតពិភពលោក លើវិញ្ញាសាវាយគូកុមារី គឺក្រោយសាងសមិទ្ធផល ឈ្នះជើងឯកពានរង្វាន់ French Open ក្រោយ១៨ខែ ដែលឈ្នះជើងឯកពានរង្វាន់ Australian Open។ ម៉្យាងនៅប្រកួតខាងមុខនេះនាងមិនទាន់បង្ហាញឈ្មោះដៃគូប្រកួតនៅឡើយ ខណៈគូប្រជែងសុទ្ធសឹងជាក្លិបក្នុងប្រទេសអង់គ្លេសទាំងអស់។
បើទោះបីនេះជាលើកទី១ ក្នុងការប្រកួត Wimbledon តែកុមារី Alex Eala នឹងប្រឹងប្រែងហ្វឹកហាត់នៅលើទីលានស្មៅ ក្នុងក្រុមយុវជនRafael Nadal Academy នៅប្រទេសអេស្ប៉ាញផងដែរ។
អត្ថបទពាក់ព័ន្ធ៖បញ្ជីម្ចាស់ជើងឯកទាំង១៥វិញ្ញាសាក្នុងព្រឹត្តិការណ៍វាយកូនបាល់អន្តរជាតិ French Open
ព្រឹត្តិការណ៍វាយកូនបាល់ Wimbledon ជា Grand Slams ១ក្នុងចំណោម៤ លើលោក ដែលធំជាងគេ ក្នុងនោះមាន Australian Open (នៅអូស្ត្រាលី) French Open (បារាំង) និង US Open (នៅអាមេរិក)។ ការប្រកួតនៅឆ្នាំនេះរៀបចំពីថ្ងៃទី២៨ខែមិថុនា ដល់១១ ខែកក្កដា ឆ្នាំ២០២១ លើទីលានAll England Lawn Tennis and Croquet Clubក្នុងទីក្រុងឡុងដុង ដោយមាន១៥វិញ្ញាសា ក្នុងនោះមាន៖
*វាយឯកត្តជនបុរស (Men’s Singles)
*វាយឯកត្តជននារី (Women’s Singles)
*វាយគូបុរស (Men’s Doubles)
*វាយគូនារី (Women’s Doubles)
*វាយគូជម្រុះបុរស-នារី (Mixed Doubles)
*វាយឯកត្តជនកុមារា (Boys’ Singles)
*វាយឯកត្តជនកុមារី (Girls’ Singles)
*វាយគូកុមារា (Boys’ Doubles)
*វាយគូកុមារី (Girls’ Doubles)
*វាយប្រើកៅអីឯកត្តជនបុរស (Wheelchair Men’s Singles)
*វាយប្រើកៅអីឯកត្តជននារី (Wheelchair Women’s Singles)
*វិញ្ញាសា Wheelchair Quad Singles
*វាយប្រើកៅអីគូបុរស (Wheelchair Men’s Doubles)
*វាយប្រើកៅអីគូនារី (Wheelchair Women’s Doubles)
*វិញ្ញាសា (Wheelchair Quad Doubles)