ឆ្លងកាត់ការប្រកួតយ៉ាងស្វិតស្វាញរយៈពេល ជាច្រើនសប្តាហ៍ ពានរង្វាន់បាល់ទាត់យុវជនស្រុកល្វាឯម អាយុក្រោម២២ឆ្នាំ ឆ្នាំ២០២៣ បានរកឃើញម្ចាស់ជើងឯកហើយ ដោយបានទៅក្រុម យុវជនភូមិទឹកឃ្លាំង ក្រោយយកឈ្នះ លើក្រុមបាល់ទាត់យុវជនអធិរាជជ្រោយពិសី ដោយបាល់កាត់សេចក្តី១១ មែត្រ ក្រោយស្នើគ្នា ០-០ ពេញ ៩០នាទី។
ពានរង្វាន់បាល់ទាត់ប្រចាំស្រុកក្នុងខេត្តកណ្តាល មួយនេះមានក្រុមបាល់ទាត់តំណាងឃុំទាំង១៥ មកពីជុំវិញស្រុកល្វាឯម សរុបមាន១៦ក្រុម។
ការប្រកួតវគ្គផ្តាច់ព្រ័ត្រនេះ ធ្វើឡើងនៅរសៀលថ្ងៃទី១៥ ខែមករា ឆ្នាំ២០២៣ ថ្មីៗនេះ ក្រោមការអញ្ជើញចូលរួមជាអធិបតីភាព លោកបណ្ឌិត កន សុខកាយ អភិបាលនៃគណៈអភិបាលស្រុក និងលោក សែម សោត្ថី ប្រធានក្រុមប្រឹក្សាស្រុក ផងដែរ។
ក្នុងឱកាសនោះ លោកបណ្ឌិត កន សុខកាយ អភិបាលនៃគណៈអភិបាលស្រុកល្វាឯម ក៏បានអំពាវនាវដល់បងប្អូនប្រជាពលរដ្ឋ និងសិស្សានុសិស្សទាំងអស់ ត្រូវនាំគ្នាលេងកីឡាឲ្យបានគ្រប់ៗគ្នា ដើម្បីទទួលបាននូវសុខភាពល្អ ទំនាក់ទំនងល្អ មិត្តភាពល្អ សាមគ្គីភាព និងជៀសឲ្យឆ្ងាយពីគ្រឿងញៀន ហើយត្រូវបន្តខិតខំរៀនសូត្រ ឱ្យក្លាយជាទំពាំងស្នងឬស្សី នៃប្រទេសជាតិយើងនាពេល ខាងមុខ។
លោកបណ្ឌិត បានបន្ថែមថា រដ្ឋបាលស្រុកល្វាឯម និងគណៈកម្មការស្រុកល្វាឯម នឹងរៀបចំការប្រកួតបាល់ទាត់ពានរង្វាន់មហាជន ប្រចាំស្រុកល្វាឯម មួយទៀត នៅដើមខែមិនា ខាងមុខ នេះ គ្រោងនឹងបិទបញ្ចប់នៅខែឧសភា ឆ្នាំ២០២៣។
លទ្ធផលចំណាត់ថ្នាក់ការប្រកួត៖
• ក្រុមបាល់ទាត់យុវជនភូមិទឹកឃ្លាំង គ្រងជើងឯក (លេខ១)
• ក្រុមបាល់ទាត់អធិរាជជ្រោយពិសី គ្រងជើងឯករង (លេខ២)
• ក្រុមបាល់ទាត់ឃុំសារិកាកែវ (លេខ៣)
• ក្រុមបាល់ទាត់យុវជនឃុំព្រែកឬស្សី (លេខ៤)
គួរបញ្ជាក់ថា ការប្រកួតនេះមានកាចូលរួមទូស្សនាផ្តាល់ជាច្រើន ពីសំណាកបងប្អូន សិស្សានុសិស្ស និងប្រជាពលរដ្ឋ នៅស្រុកល្វាឯម ដែលការប្រកួតនេះធ្វើឡើងនៅទីលាន វិទ្យាល័យ ហ៊ុន សែន ទឹកឃ្លាំង ស្ថិតនៅភូមិទឹកឃ្លាំង ឃុំទឹកឃ្លាំង ស្រុកល្វាឯម ខេត្តកណ្តាល៕
