យោងតាមការចុះផ្សាយរបស់ Marca សារព័ត៌មានអេស្ប៉ាញ បានចុះផ្សាយថាខ្សែប្រយុទ្ធ Cristiano Ronaldo នឹងដើរតួជាប្រធានក្រុមអារ៉ាប៊ីសាអូឌីត All-Star ក្នុងជំនួបមិត្តភាពអន្តរជាតិ ទល់នឹងជើងខ្លាំង PSG លើទឹកដីអារ៉ាប៊ីសាអូឌីត នៅថ្ងៃទី១៩ ខែមករា វេលាម៉ោង ១២:០០ នាទីយប់ ក្នុងកីឡដ្ឋាន King Fahd International Stadium។
ចាប់តាំងពីខ្សែប្រយុទ្ធ Cristiano Ronaldo ផ្លាស់មកកាន់ Saudi Professional League ឬ Saudi Pro League លីគកំពូលរបស់ប្រទេសអារ៉ាប៊ីសាអូឌីត គ្រប់គ្នានៅមិនទាន់ឃើញកីឡាករវ័យ ៣៧ឆ្នាំរូបនេះបង្ហាញខ្លួននៅឡើយនោះទេ។
មូលហេតុដែល Ronaldo មិនទាន់អាចបង្ហាញខ្លួនឲ្យក្លិប Al Nassr បានគឺដោយសារតែសហព័ន្ធបាល់ទាត់អង់គ្លេសហៅកាត់ថា «FA» ពិន័យចំនួន២ប្រកួត ត្រង់ចំណុច CR7 បោកទូរសព្ទអ្នកគាំទ្រវ័យក្មេងម្នាក់របស់ក្លិប Everton ពេលដើរចេញពីទីលាន Goodison Park កាលពីខែមេសា ឆ្នាំ២០២២។
យ៉ាងណាមិញ Ronaldo ត្រូវបានគេរំពឹងថានឹងអាចបង្ហាញខ្លួនលើកដំបូងក្នុងនាមជាប្រធានក្រុម (Saudi All-Star XI) ទល់នឹង PSG ក្នុងជំនួបមិត្តភាព «ដំណើរទេសចរណ៍បែបប្រពៃណីក្នុងរដូវរងា – Traditional Winter Tour» ដែលជាការរៀបចំឡើងបញ្ចូលគ្នាដោយកីឡាករមកពីក្លិប Al Nassr និងក្លិប Al Hilal ក្នុងទីក្រុង Riyadh នៅថ្ងៃទី១៩ ខែមករា ខាងមុខនេះ។
الوعد ان شاءالله يوم ١٩ يناير … لقاء فوق الخيال … ومدير الفريق الكابتن خالد الشنيف ان شاءالله والتشكيلة غداً بيعلنها المدرب وخالد … اتمنى يومها ننسى الهلال والنصر ساعتين ونصير كلنا موسم الرياض… وبعد الساعتين نوقف الهدنة 😂🇸🇦❤️ pic.twitter.com/nttB07IgBb
— TURKI ALALSHIKH (@Turki_alalshikh) January 15, 2023
ដូច្នេះ Lionel Messi សមាជិករបស់ Paris Saint-Germain ប៉ះគ្នាជាមួយ Cristiano Ronaldo សមាជិករបស់ក្រុមរួមបញ្ចូលគ្នារវាង Al Nassr និង Al Hilal ច្បាស់ជាកក្រើតនៅទឹកដីអារ៉ាប៊ីសាអូឌីត ជាក់ជាមិនខាន ហើយនេះក៏អាចជាការប៉ះគ្នាលើកចុងក្រោយផងដែរ។
ក្រៅពីនេះក្លិបបាល់ទាត់ Al Hilal ដែលមានម្ចាស់ក្លិបជាខ្សែរាជវង្ស គឺព្រះអង្គម្ចាស់អារ៉ាប់ Abdulrahman Bin Saeed គ្រោងនឹងចំណាយលើសអ្វីដែល Al Nassr ផ្តល់ជូន Cristiano Ronaldo គុណនឹង២ ពោលគឺ Messi នឹងទទួលបានថ្លៃនឿយហត់១ឆ្នាំ ៣០០លានអឺរ៉ូ បើសិនស៊ីញេកុងត្រាចូលក្រុមអារ៉ាប៊ីសាអូឌីតមួយនេះ។ យោងតាមការចុះផ្សាយរបស់ Mundo Deportivo សារព័ត៌មានរបស់ប្រទេសអេស្ប៉ាញ៕
