នៅព្រឹកថ្ងៃទី២០ ខែមករា ឆ្នាំ២០២៣ សហព័ន្ធកីឡាបាល់ទះកម្ពុជា បានធ្វើពិធីបិទវគ្គបណ្ដុះ បណ្ដាលប្រព័ន្ធ Volleyball Information System (VIS) និង E-Scoresheet Computer Program បន្ទាប់ពីបានសិក្សាអស់រយ:ពេល៥ថ្ងៃ ចាប់ពីថ្ងៃទី១៦ ដល់ថ្ងៃទី២០ ខែមករា ឆ្នាំ២០២៣ ដល់មន្ត្រីបច្ចេកទេសចំនួន ២៥រូប ស្រីចំនួន ៨នាក់ មកពីមន្ទីរអបរំ យុវជន និងកីឡារាជធានី-ខេត្ត នាយកដ្ឋានអបរំកាយ និងកីឡា, នាយកដ្ឋានអបរំកាយ សិស្សនិស្សិត, នាយកដ្ឋានរៀបចំ និងព្រឹត្តិការណ៍កីឡា និងវិទ្យាស្ថានអបរំកាយ និងកីឡា។
ឯកឧត្តម ស សុខា រដ្ឋលេខាធិការក្រសួងអបរំ យុវជន និងកីឡា និងជាអនុប្រធានសហព័ន្ធកីឡាបាល់ទះកម្ពុជា បានមានប្រសាសន៍ថា៖ «ការបើកវគ្គបណ្ដុះ បណ្ដាលប្រព័ន្ធបច្ចេកវិទ្យានេះ នឹងរៀបចំយ៉ាងហោចណាស់ឲ្យបានម្ដងក្នុងមួយឆ្នាំដើម្បីពង្រឹងសមត្ថភាពដល់មន្ត្រីសហព័ន្ធ និងជំរុញឲ្យមានការបណ្ដុះបណ្ដាលនៅតាមបណ្ដាខេត្តផងដែរ ជាពិសេសសិក្ខាកាមជានារីឲ្យបានចូលរួមកាន់តែច្រើន ដើម្បីមានលទ្ធភាពក្លាយជាអាជ្ញាកណ្ដានាពេលខាងមុខ»។
ឯកឧត្តម ស សុខា បានបន្ថែមថា ដើម្បីពង្រឹងសមត្ថភាពដល់មន្ត្រីបច្ចេកទេសរបស់សហព័ន្ធ គួរមានការផ្ដល់ឱកាសឲ្យពួកគាត់ទៅចូលរួមសិក្សាពីការរៀបចំការនៅពេលមានការប្រកួតនៅក្រៅប្រទេស ជាក់ស្តែងនាពេលខាងមុខកម្ពុជាអាចនឹងមានការប្រកួតជាមួយប្រទេសសិង្ហបុរី និងម៉ាឡេស៊ី ដែលជាឱកាសក្នុងការដក់ស្រង់បទពិសោធន៍សម្រាប់មន្ត្រីបច្ចេកទេសរបស់សហព័ន្ធកីឡាបាល់ទះកម្ពុជា ទៅចូលរួមដើម្បីត្រៀមលក្ខណ:សម្រាប់ព្រឹត្តិការណ៍ស៊ីហ្គេម លើកទី៣២ ដែលកម្ពុជាធ្វើជាម្ចាស់ផ្ទះ។
លោក បណ្ឌិត អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានមានប្រសាសន៍ថា បន្ទាប់ពីបានសិក្សាអស់រយ:ពេល៥ថ្ងៃ តាមរយ:គ្រូឧទ្ទេសមកពីសហព័ន្ធកីឡាបាល់ទះអាស៊ី សិក្ខាកាមដែលបានចូលរួមបានទទួលចំណេះដឹងបន្ថែម មិនត្រឹមតែផ្នែកទ្រឹស្ដីប៉ុណ្ណេះទេ ក៏មានការអនុវត្តជាក់ស្ដែងផងដែរ។
អគ្គលេខាធិការសហព័ន្ធកីឡាបាល់ទះកម្ពុជា បន្ថែមថា ក្រោយឆ្លងកាត់ការសិក្សារយ:ពេល៥ថ្ងៃរួចមកលោកបានវាយតម្លៃខ្ពស់ចំពោះការខិតខំ ប្រឹងប្រែងរបស់សិក្ខាកាម ទាំងអស់ នឹងទទួលបានចំណេះដឹងកាន់តែច្រើន និងមានសមត្ថភាព បច្ចេកទេសក្នុងការចុះអនុវត្តជាក់ស្តែងនាពេលខាងមុខ ជាពិសេដើម្បីពង្រឹងសមត្ថភាពមន្ត្រីបច្ចេកទេសរបស់សហព័ន្ធកីឡាបាល់ទះកម្ពុជា ឲ្យស្របទៅតាមផែនការអភិវឌ្ឍធនធានមនុស្សរបស់សហព័ន្ធ ក្នុងការគ្រប់គ្រង់បែបបច្ចកវិទ្យាក្នុងពេលប្រកួត នឹងត្រៀមលក្ខណ:សម្រាប់ព្រឹត្តិការណ៍ស៊ីហ្គេម លើកទី៣២ ដែលកម្ពុជាធ្វើជាម្ចាស់ផ្ទះ។
ចំពោះដំណាក់កាលនៃការសិក្សា វគ្គបណ្ដុះ បណ្ដាលប្រព័ន្ធ Volleyball Information System (VIS) និង E-Scoresheet Computer Program រួមមាន៖
ថ្ងៃទី១៖ សិក្សាអំពី E-Scoresheet ចាប់ផ្ដើមពីមូលដ្ឋានគ្រឹះ និងតម្រូវការផ្សេងៗសម្រាប់ការគ្រប់គ្រង់ប្រព័ន្ធ
ថ្ងៃទី២៖ អនុវត្ត ពីកម្មវិធីដែលបានសិក្សា E-Scoresheet និងការវាយតម្លៃ
ថ្ងៃទី៣៖ សិក្សាពីប្រព័ន្ធ VIS ចាប់ផ្ដើមពីមូលដ្ឋានគ្រឹះ ទម្រង់នៃការប្រកួត អ្នកវិភាគ និការកត់ត្រា VIS
ថ្ងៃទី៤៖ ការអនុវត្តលើប្រព័ន្ធគ្រប់គ្រង់ VIS
ថ្ងៃទី៥៖ ការចុះអនុវត្តប្រព័ន្ធគ្រប់គ្រង់ VIS ដោយផ្ទាល់ លើកការប្រកួតជាក់ស្ដែង៕
