ព្រឹត្តិការណ៍ប្រកួតកីឡាអូឡាំពិក 2020 Summer Olympics ដែលនឹងធ្វើនៅរាជធានីតូក្យូ ប្រទេសជប៉ុន ចាប់ពីចុងខែកក្កដា ខាងមុននេះ បានត្រូវបានគណៈកម្មការរៀបចំការប្រកួតអនុញ្ញាតឱ្យមានលក់គ្រឿងស្រវឹងនៅក្នុងបរិវេណកីឡដ្ឋាននានា សម្រាប់អ្នកគាំទ្រដែលទៅទស្សនាផ្ទាល់នៅទីលាន ប៉ុន្តែត្រូវមានការរឹតត្បិតទប់ស្កាត់ការឆ្លងរីករាលដាលនៃជំងឺកូវីដ-១៩។
អត្ថបទពាក់ព័ន្ធ៖អត្តពលិកកីឡាលើកទម្ងន់តំបន់អាស៊ាន១០នាក់កក់សំបុត្រយន្តហោះទៅអូឡាំពិកនៅតូក្យូ
ការសម្រេចនេះកើតឡើង បន្ទាប់ពីមានការអនុញ្ញាតឱ្យមានអ្នកគាំទ្រប្រមាណ១ម៉ឺននាក់ អាចចូលទស្សនាការប្រកួតកីឡាអូឡាំពិកនេះបាននៅតាមកីឡដ្ឋាននីមួយៗ ដែលអាចផ្ទុកទស្សនិកជនប្រមាណ៥០% ឬ ១ម៉ឺននាក់តាមប្រភេទកៅអីក្នុងកីឡដ្ឋាន។ ជាមួយគ្នានេះដែរទស្សនិកជនមកពីជុំវិញពិភពលោក នៅតែមិនអនុញ្ញាតឱ្យចូលទស្សនា នោះទេលើកលែងតែម្ចាស់ផ្ទះជប៉ុន ដោយហេតុផលពីជំងឺកូវីដ-១៩ ដែលឆ្លងជាសាកល។
យ៉ាងណាក្តីសារព័ត៌មាន Kyodo របស់ជប៉ុនបញ្ជាក់ថាការសម្រេចចិត្តអនុញ្ញាតឱ្យមានគ្រឿងស្រវឹងនេះគឺដោយសារផ្អែកលើកិច្ចសន្យាឧបត្ថម្ភជាមួយក្រុមហ៊ុនផលិតគ្រឿងស្រវឹង។ បើទោះជាអនុញ្ញាតឱ្យមានលក់គ្រឿងស្រវឹងមែន តែគណៈកម្មការបានកំណត់ពេលវេលានៃការលក់ដូរជាក់លាក់ និងគោរពបទដ្ឋានសុខភាពសាធារណៈជៀសវាងជំងឺឆ្លងកូវីដ-១៩។
2020 Summer Olympics នឹងរៀបចំសៀវភៅណែនាំសម្រាប់អ្នកគាំទ្រសម្រាប់ចូលទស្សនាឱ្យមានរបៀបរបបទាំងការទទួលទានអាហារ ឬការពិសារគ្រឿងស្រវឹងជាក្រុមនៅតាមផ្លូវ ឬ បរិវេណកីឡដ្ឋាន។ ជាមួយគ្នានេះអ្នកគាំទ្រមិនអនុញ្ញាតឱ្យច្រៀងគាំទ្រអំឡុងពេលប្រកួតបាននោះទេ។
អត្ថបទពាក់ព័ន្ធ៖មន្រ្តី៖កីឡាអូឡាំពិកនៅតូក្យូ បន្តធ្វើខណៈអ្នកស្ម័គ្រចិត្ត១ម៉ឺននាក់លាឈប់
លោក Seiko Hashimoto ប្រធានគណៈកម្មការប្រកួត 2020 Summer Olympics ថាការលក់គ្រឿងស្រវឹងនេះគឺស្ថិតក្នុងការពិចារណា វាអាស្រ័យទៅលើអ្នកគាំទ្រថាតើពួកគេអាចបញ្ឈប់ការនិយាយលឺ ឬ ស្រែក ឬ ការពារខ្លួនពីកូវីដ-១៩ បានត្រឹមត្រូវកម្រិតណា។
រហូតដល់ថ្ងៃទី១១ ខែកក្កដា ឆ្នាំ២០២១ ខាងមុខ រាជធានីតូក្យូ បានកម្រិតពីការលក់គ្រឿងស្រវឹងនៅតាមបារ ឬ ភោជនីយដ្ឋាន នានាចន្លោះពីម៉ោង១១ព្រឹកដល់ម៉ោង៧យប់ ហើយអ្នកអង្គុយញាំត្រូវតែនៅម្នាក់ឯង ឬ មានគ្នា២នាក់ប៉ុណ្ណោះ។
ព្រឹត្តិការណ៍កីឡាអូឡាំពិករដូវក្តៅ ដែលធ្វើនៅរាជធានីតូក្យូ នេះមានការចូលរួមពីកីឡាករកីឡាការិនី ពីប្រទេស/តំបន់ចំនួន២០៦ផ្សេងគ្នា សរុបប្រមាណជា១១,០០០នាក់ លើប្រភេទ៣៣កីឡានិង៣៣៩វិញ្ញាសា។ ការប្រកួតគ្រោងចាប់ធ្វើពីថ្ងៃទី២៣ ខែកក្កដា ដល់ថ្ងៃទី៨ ខែសីហា ឆ្នាំ២០២១។ ការប្រកួតនេះបានលើកពេលពីឆ្នាំ២០២០ កន្លងមកដោយសារការឆ្លងនៃជំងឺកូវីដ-១៩ ជុំវិញពិភពលោក៕
អត្ថបទពាក់ព័ន្ធ៖កីឡាអូឡាំពិកនៅជប៉ុន ចែកស្រោមអនាម័យ ប្រមាណ១៦ម៉ឺនស្រោម ដល់អត្តពលិក តែតិចជាងកាលនៅប្រេស៊ីល