ក្រុមបាល់ទះជម្រើសជាតិកម្ពុជា នឹងធ្វើការប្រកួតមិត្តភាពអន្ដរជាតិ ជាមួយក្រុមបាល់ទះយុវជនបារាំងអាយុក្រោម១៩ឆ្នាំ (U19) នៅអំឡុងពាក់កណ្ដាលខែកុម្ភ:ខាងមុខនេះនៅលើកទឹកដីកម្ពុជា។ ដោយការប្រកួតនេះនឹងត្រូវធ្វើឡើងចំនួន២ជើងគឺនៅថ្ងៃទី១៨ និងថ្ងៃទី២២ ខែកុម្ភ: ឆ្នាំ២០២៣។
លោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធ កីឡាបាល់ទះកម្ពុជា បានមានប្រសាសន៍ថា៖ «ជុំវិញការប្រកួតមិត្តភាព ជាមួយក្រុមបាល់ទះយុវជនបារាំងអាយុក្រោម១៩ឆ្នាំ (U19) ដោយមានការប្រកួត២ជើងគឺដើម្បីជម្រុញឲ្យមានការវាស់ស្ទង់បច្ចេកទេសគ្នាទៅវិញទៅមក ទាំងខាងបារាំង និងកម្ពុជាគឺសុទ្ធតែមិនទាន់ដឹងពីសមត្ថភាពគ្នារៀងៗខ្លួន»។
លោកបានបន្តថា នៅពេលខាងមុខនេះ កម្ពុជាកំពុងពិភាក្សាជាមួយប្រទេសម៉ាឡេស៊ី សិង្ហបុរី គ្រោងបង្កើតពាន់រង្វាន់មួយដើម្បីធ្វើការប្រកួតចំនួន៣ប្រទេសនេះ ដែលប្រទេសម៉ាឡេស៊ីនឹងធ្វើការរៀបចំនៅទីនោះ។
លោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធ បង្ហាញនូវសុទិដ្ឋិនិយមខ្ពស់ ដែលជាស្ថិតក្នុងផែនការរបស់សហព័ន្ធ ក្នុងការជំរុញក្រុមជម្រើសជាតិកម្ពុជា ធ្វើការប្រកួតមិត្តភាពអន្ដរជាតិឲ្យបានច្រើននាពេលខាងមុខ ពិសេសក្រុមខ្លាំងៗជាងខ្លួន ដើម្បីវាស់ស្ទង់ ក៏ដូចជាពង្រឹងសមត្ថភាព និងបច្ចេកទេស ឆ្ពោះទៅប្រជែងមេដាយមាសស៊ីហ្គេម ឆ្នាំ២០២៣។
គួរបញ្ជាក់ថា ក្រុមបាល់ទះជម្រើសជាតិកម្ពុជា បានធ្វើការប្រកួតមិត្តភាព ជាមួយក្រុមបាល់ទះ Cambodia All Star មកពីជុំវិញសមាគម និងក្លិប នៅប្រទេសកម្ពុជា កាលពីថ្ងៃទី៧ ខែមករា ឆ្នាំ២០២៣ កន្លងទៅ ចំនួន៥ សិតរួចមកក្រុមបាល់ទះជម្រើសជាតិកម្ពុជា ឈ្នះ៤ លើក្រុមបាល់ទះ Cambodia All Star ឈ្នះ១៕
