សិល្បៈជាតិ៖ បញ្ហាបែកធ្លាយបទចម្រៀង និងការយកបទចម្រៀងរបស់តារាចម្រៀងចែកចាយបន្តនៅតែជាបញ្ហាប្រឈមដែលតារាទាំងក្នុងនិងក្រៅស្រុកកំពុងជួបប្រទះ។ ថ្មីៗនេះអ្នកនាង ពេជ្រ សូលីកា បានចេញមកប្រកាសធម៌ក្ដៅចំពោះអ្នកដែលយកបទចម្រៀងថ្មីរបស់ខ្លួនទៅចែកចាយបន្តពីជនអនាមិកដែលបានទម្លាយបទចម្រៀងថ្មីរបស់ខ្លួនមកបញ្ចេញជាសាធារណៈ។
នៅថ្ងៃទី២៥ ខែមករា ឆ្នាំ២០២៣ អ្នកនាង ពេជ្រ សូលីកា បានចេញមកប្រកាសប្រើធម៌ក្ដៅចំពោះអ្នកដែលលួចទម្លាយបទចម្រៀងថ្មីរបស់អ្នកនាង ព្រមទាំងបង្កើតឆាណែលយូធូប (Channel Youtube) ដោយប្រើឈ្មោះរបស់អ្នកនាង ពេជ្រ សូលីកា ជាភាសាខ្មែរ ដើម្បីបង្ហោះថ្មីនោះដោយអ្នកនាងប្រកាសយ៉ាងដូច្នេះថា៖ «អ្នកផុសបទខ្ញុំបន្តពី Channel ជនអនាមិក ក៏មិនរួចខ្លួនដែរ»។
អ្នកម្ដាយកូនមួយរូបនេះបានបន្តទៀតថា៖ «Channel មួយនេះជាដើមហេតុដំបូងនៃការចែកចាយ បទចម្រៀងថ្មីរបស់នាងខ្ញុំសូមជួយ Report Channel ជនអនាមិក ម្នាក់មួយផងបងប្អូន។ កុំបន្តគាំទ្រ ពួកជនអនាមិក បន្ថែមទៀតអី»។
បទចម្រៀងដែលត្រូវបានឆាណែលជនអនាមិកបង្កើតក្នុងឈ្មោះអ្នកនាង ពេជ្រ សូលីកា មានចំនួនពីរបទគឺបទ «ហេតុអ្វីយើងបែកគ្នា» និង «មានអ្នកត្រូវការខ្ញុំទេ»។
ក្រោយពីអ្នកនាងចេញមកព្រមានចំពោះអ្នកចង់យកបទចម្រៀងទៅផុសបន្តនិងស្នើសុំឱ្យអ្នកគាំទ្រជួយគ្នា Report ឃើញថាមានអ្នកគាំទ្រមួយចំនួនបាននាំគ្នាជួយ Report Channel Youtube មួយនោះ ប៉ុន្តែមកដល់ព្រឹកថ្ងៃទី២៦ ខែមករានេះ ឆាណែលដែលអ្នកនាង ពេជ្រ សូលីកា អះអាងថាបង្កើតដោយជនអនាមិកនោះនៅតែមានវត្តមាននៅលើ Platform Youtube នៅឡើយ។ ដូច្នេះមានតែរង់ចាំមើលជាបន្តទៀតថាតើតារាចម្រៀងស្រីរូបនេះនឹងមានចំណាត់ការអ្វីផ្សេងបន្ថែមទៀតដែរឬយ៉ាងណា?
