ស្តេចប្រដាល់ថៃ ប៊ួរខាវ ប៊ិនចាមេក បច្ចុប្បន្នមានវ័យ ៤០ឆ្នាំ ដែលមហាជនស្គាល់ថាជាអ្នកប្រដាល់ដែលមានថ្វីដៃ ខ្លាំង និងមានទម្ងន់ រូបនេះបានប្រកាសនៅលើគណនីហ្វេសប៊ុកផេក ផ្លូវការ របស់ខ្លួនកាលពីពេលថ្មីៗនេះថា រូបគេជាជនជាតិដើមកួយ ដែលមានកំណើតនៅលើទឹកដីថៃ ដោយបដិសេធថាមិនមែនជាជនជាតិខ្មែរ ឬខ្មែរសុរិន្ទ នោះឡើយ។
ស្របពេលជាមួយគ្នានោះ មានមតិមហាជនខ្មែរ ជាច្រើនបានលើឡើងថា៖ ទោះជាយ៉ាងណាក៏ដោយសម្រាប់ប្រជាជនខ្មែរ ក៏មិនធ្លាប់គិតថា ប៊ួរខាវ ប៊ិនចាមេក ជាជនជាតិខ្មែរម្តងណាឡើយ។
ស្តេចប្រដាល់ថៃ ប៊ួរខាវ ប៊ិនចាមេក បានបដិសេធបែបនេះ ស្របពេលដែល កម្ពុជាកំពុងប្រឈមភាពតានតឹង និងចម្រុងចម្រាស ជាមួយសហព័ន្ធប្រដាល់ថៃ ទាក់ទងនិងការដាក់ឈ្មោះលើវិញ្ញាសា គុនខ្មែរ ក្នុងព្រឹត្តិការណ៍ស៊ីហ្គេម ២០២៣ ដែលកម្ពុជា ជាម្ចាស់ផ្ទះ។
គួរបញ្ជាក់ថា សម្រាប់វិញ្ញាសាកីឡាប្រដាល់ ដែលកម្ពុជា បានរក្សាជំហរសម្រេចក្នុងការប្រើឈ្មោះ«គុនខ្មែរ» ដោយមិនមានការកែប្រែសម្រាប់ការប្រកួតកីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះនាពេលខាងមុខ ខណៈថៃ ទាមទារឲ្យដាក់ម៊ួយថៃ ដោយពួកគេជឿជាក់ថា ថៃ ជាម្ចាស់ដើមនៃប្រភេទកីឡានេះ។
