ខេត្តបន្ទាយមានជ័យ៖ សមាជិកកីឡាកររបស់ក្រុមបាល់ទាត់រាជសីហ៍និមិត្ត និងជាកីឡាករតម្រង់ទិសប្រចាំខេត្តបន្ទាយមានជ័យ បានទទួលមរណភាព បន្ទាប់ពីជួបហេតុការណ៏គ្រោះថ្នាក់ចរាចរណ៍។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង ៨:៣០ នាទីយប់ ត្រង់ចំណុចស្រុកអូជ្រៅ ខេត្តបន្ទាយមានជ័យ ។
មុនពេលកើតហេតុ ជនរងគ្រោះជិះម៉ូតូម៉ាកហុងដា C១២៥ ពាក់ផ្លាកលេខបន្ទាយមានជ័យ 1X-2885 ធ្វើដំណើរស្របទិស មិនពាក់មួកសុវត្ថិភាព បើកបុក គុតគោយន្តពីក្រោយ (គោយន្តមិនមានភ្លើងពីក្រោយ) បណ្តាលឲ្យជនរងគ្រោះស្លាប់នៅកន្លែងកើតហេតុ ចំណែកឯអ្នកបើកបរគោយន្តរត់គេចខ្លួនបាត់។
ជនរងគ្រោះឈ្មោះ ប្រាក់ វីរៈ ភេទប្រុស អាយុ១៧ឆ្នាំ ជាសមាជិកកីឡាកររបស់ក្រុមបាល់ទាត់រាជសីហ៍និមិត្ត និងជាកីឡាករតម្រង់ទិសប្រចាំខេត្តបន្ទាយមានជ័យ
ក្រោយកើតហេតុ សមត្ថកិច្ច បានចុះវាស់វេង និងបាននាំយកម៉ូតូខាងលើយកមករក្សាទុកនៅអធិការដ្ឋាននគរបាលស្រុកអូជ្រៅ រងចាំដោះស្រាយគ្នានៅពេលក្រោយ។ ចំណែកជនរងគ្រោះ ត្រូវបានក្រុមគ្រូពេទ្យ បញ្ជូនទៅឲ្យគ្រួសារ យកទៅធ្វើបុណ្យតាមប្រពៃណី៕
