កាលពីថ្ងៃទី២៦ ខែមករា ឆ្នាំ២០២៣ គ្រូបង្វឹកបាល់ទាត់ប្រចាំខេត្តកណ្តាល លោកគ្រូ គួង លី បានបង្ហោះសារនៅគណនីហ្វេសបុក ផ្ទាល់ខ្លួនរបស់លោក ដោយអំពាវនាវឲ្យកីឡាករដែលធ្លាប់ហ្វឹកហាត់នៅសាលាតម្រង់ទិសខេត្តកណ្តាល ចូលមកហ្វឹកហាត់វិញ ទោះបីជាសាលាតម្រង់ទិសត្រូវបានផ្អាកក៏ដោយ។
លោកគ្រូ គួង លី បានសរសេររៀបរាប់នៅលើហ្វេសបុកថា៖ «26-01-2023 តាំងពី ស ប ក ព្យួរសាលាតម្រង់បាល់ទាត់ខេត្តកណ្តាលមក មិនមានកីឡាករណាចង់ហាត់ និងបាល់ទាត់ទេឬ បើនៅតែអញ្ចឹង វានិងទៅជាយ៉ាងណាទៅ (សូមប្អូនមកហាត់វិញ ទោះមិនបានលេង របស់ ស ប ក យើងហាត់ដើម្បី សុខភាព និងលេងពានរង្វាន់ផ្សេងៗទៀតកុំគិតតែ១ចំណុចតូចនេះ)ព្រោះហាត់មិនមានការបង់ប្រាក់ទេ គ្រូសុខចិត្តចំណាយកំលាំង និងពេលវេលាមួយនេះ»។
គួរបញ្ជាក់ថា កាលពីថ្ងៃទី២៨ ខែធ្នូ ឆ្នាំ២០២២ សហព័ន្ធកីឡាបាទាត់កម្ពុជា បានធ្វើការផ្អាក់ដំណើរការសាលាតម្រង់ទិសខេត្តកណ្ដាល (ក្រុងតាខ្មៅ) ជាបណ្ដោះអាសន្ន ក្នុងករណីមន្ទីអប់រំខេត្ត មានបំណងចង់បើកដំណើរការសាលាតម្រង់ទិសខេត្តកណ្ដាល(ក្រុងតាខ្មៅ) ឡើងវិញ លុះត្រាតែមានទីលានហ្វឹកហាត់សមស្រប និងទីលានបម្រុងពេលទីលានមន្ទីអប់រំខេត្តមានបញ្ហាឬជាប់រវល់៕