ការប្រកួតកីឡាចំបាប់ជើងឯកថ្នាក់ជាតិ ឆ្នាំ២០២២ វិញ គឺក្រសួងមហាផ្ទៃ ដែលបាន បញ្ចូនអត្តពលិកចូលរួមច្រើនជាងគេនោះ បានឈ្នះមេដាយសរុប ២២គ្រឿង រួមមានមេដាយមាស៨ ប្រាក់ ៩ និងសំរឹទ្ធ ៥ ដើម្បីឈរនៅលេខ១ ហើយតាមពីក្រោយដោយ ក្រសួងការពារជាតិ ដែលឈ្នះបានមេដាយមាស ៣ ប្រាក់ ៣ និងសំរឹទ្ធ ៣។
ចំណែកក្រសួងសេដ្ឋកិច្ច និងហិរញ្ញវត្ថុ ឈរលេខ៣ ឈ្នះមេដាយមាស ២ និងសំរឹទ្ធ ២ រីឯក្លិបយាងព្រីងមានរឹទ្ធខេត្តកំពង់ឆ្នាំ ឈរលេខ៤ ឈ្នះមេដាយមាស ២ សំរឹទ្ធ ១ និងសមាគមកីឡាចំបាប់ខេត្តពោធិ៍សាត់ ឈ្នះមេដាយមាស ១ និងសំរឹទ្ធ ៧ ឈរលេខ៥។
លទ្ធផលនេះ ក្រោយបានបញ្ចប់ការប្រកួត នៅថ្ងៃទី២៩ ខែមករានេះ ក្រោយដំណើរការប្រកួតរយៈពេល ៥ថ្ងៃ នៅសាលដំបូលទូក នៃពហុកីឡដ្ឋានជាតិ ហើយការប្រកួតនេះ មានប្រតិភូ និងកីឡាករ កីឡាការិនីចូលរួមសរុប ៩៦នាក់ មកពី១០សមាគម/ក្លិប និងក្រសួង។
លោក ខេស៊ី បាណេត អនុប្រធានសហព័ន្ធកីឡាចំបាប់កម្ពុជា បានចាត់ទុកការប្រកួតកីឡាចំបាប់ជ្រើសរើសជើងឯកថ្នាក់ជាតិ ឆ្នាំ២០២២ គឺជាជំហានថ្មីមួយទៀត នៃដំណើរឆ្ពោះទៅកាន់ការប្រកួតកីឡាស៊ីហ្គេម លើកទី៣២ នៅកម្ពុជា នាខែឧសភា ឆ្នាំ២០២៣ ខាងមុខ។
លោក ខេស៊ី បាណេត បានកោតសរសើរ និងវាយតម្លៃខ្ពស់ ចំពោះការខិតខំរៀបចំរបស់គណៈកម្មការ និងមន្ដ្រីបច្ចេកទេស ពិសេសការខិតខំប្រឹងប្រែងរបស់កីឡាករ កីឡាការិនី ដែលជំរុញឱ្យការប្រកួតនេះ បញ្ចប់ដោយជោគជ័យ និងជាសញ្ញាណមួយដ៏ល្អ សម្រាប់ការត្រៀមធ្វើម្ចាស់ផ្ទះស៊ីហ្គេម ឆ្នាំ២០២៣ បន្ទាប់ពីសហព័ន្ធកីឡាចំបាប់កម្ពុជា បានទទួលបទពិសោធន៍ល្អៗជាច្រើន ក្នុងការប្រកួតជើងឯកអាស៊ីអាគ្នេយ៍ កាលពីថ្មីៗនេះ។
លោកបានបញ្ជាក់ថា៖ «ការចូលរួមប្រកួតនេះ គឺជាជំហានបន្ដ សម្រាប់ការបង្ហាញសមត្ថភាពរបស់កីឡាករ កីឡាការិនី ព្រមទាំងពង្រឹងជំនាញ និងបច្ចេកទេស ទាំងកីឡាករ កីឡាការិនី និងមន្ដ្រីបច្ចេកទេស អាជ្ញាកណ្ដាល-ចៅក្រម។ ការប្រកួតជើងឯកទូទាំងប្រទេសនេះ គឺជាជំហានថ្មីមួយដ៏សំខាន់ ដើម្បីត្រៀមបេសកកម្មចំពោះមុខ គឺការរៀបចំការប្រកួតកីឡាស៊ីហ្គេម លើកទី៣២ នាខែឧសភា»។
អនុប្រធានសហព័ន្ធកីឡាចំបាប់កម្ពុជា រូបនេះ បានបន្ថែមថា ស៊ីហ្គេមនៅកម្ពុជា កីឡាចំបាប់ បានកំណត់ ៣វិញ្ញាសាធំៗ រួមមានវិញ្ញាសាក្រិចកូរ៉ូម៉ាំង, ចំបាប់សេរីបុរស និងនារី ដែលផ្នែកនីមួយៗមាន ១០ប្រភេទទម្ងន់ ឬ ១០វិញ្ញាសាដូចៗគ្នា។ តាមរយៈនេះ លោកបានជំរុញឱ្យកីឡាករ កីឡាការិនី ពិសេសក្រុមជម្រើសជាតិ ត្រូវពង្រឹងឱ្យបានខ្លាំងលើវិញ្ញាសារៀងៗខ្លួន ដើម្បីត្រៀមប្រកួតប្រជែងដណ្ដើមមេដាយ និងឧត្តមភាពជាតិ ក្នុងនាមម្ចាស់ផ្ទះ៕