ការប្រកួតពានរង្វាន់ខេមបូឌានលីគខាប់ (Cambodian League Cup) ឆ្នាំ២០២៣ បានធ្វើការចាប់ឆ្នោតជ្រើសរើសពូលប្រកួតរួចរាល់ហើយកាលពីថ្ងៃទី២៦ ខែមករា ឆ្នាំ២០២៣ កន្លងទៅ ដែលគ្រោងនឹងចាប់ផ្តើមថ្ងៃទី១១ ខែកុម្ភៈ ឆ្នាំ២០២៣ ដល់ថ្ងៃទី៤ ខែមិថុនា ឆ្នាំ២០២៣។
ខណ:លោក Oleg Starynskyi គ្រូបង្វឹកភ្នំពេញក្រោន បាននិយាយអំពីការប្រកួតលីគខាប់រដូវកាលនេះថា៖ «ខ្ញុំគិតថាក្នុងពូល B នឹងមានការប្រកួតប្រជែងខ្លាំង។ វាជារឿងដែលល្អសម្រាប់ក្រុមយើងក្នុងការមើលពីភាពលូតលាស់របស់កីឡាករដែលយើងមាន។ សម្រាប់គោលដៅរបស់យើងនោះគឺការពារតំណែងជើងឯក។ យើងចង់ក្លាយជាក្រុមដំបូងគេដែលឈ្នះពាននេះ ២ ឆ្នាំជាប់គ្នា»។
ក្លិបបាល់ទាត់ភ្នំពេញក្រោន ស្ថិតនៅពូល B នៃពានរង្វាន់ Cambodian League Cup 2023 ជាមួយ ព្រះខ័នរាជស្វាយរៀង, អង្គរថាយហ្គឺរ, ណាហ្គាវើលដ៍, នគរបាលជាតិ, សូលទីឡូអង្គរ, ISI ដង្កោសែនជ័យ ខណ:ពូល A មានក្លិបបាល់ទាត់គិរីវង់សុខសែនជ័យ វិសាខា, បឹងកេត, , Tiffy Army FC, អគ្គិសនីកម្ពុជា, កោះកុង និង ព្រៃវែង។
គួររំលឹកថាលោក Oleg Starynskyi ត្រូវបានក្លិបបាល់ទាត់ភ្នំពេញក្រោនប្រកាសបន្តកិច្ចសន្យារយៈពេល ២ឆ្នាំ បន្ថែមទៀត កាលពីថ្ងៃទី២៨ ខែធ្នូ ឆ្នាំ២០២២ បន្ទាប់ពីគ្រូបង្វឹកកាន់សញ្ញាប័ត្រ UEFA A-License រូបនេះបានដឹកនាំក្លិបឈ្នះលីគកំពូលកម្ពុជា ២រដូវកាលជាប់គ្នា ជាពិសេសគឺទទួលបានជោគជ័យខ្លាំងនារយៈពេល ២ឆ្នាំកន្លងមកនេះ។
លោក Oleg Starynskyi ចូលកាន់តំណែងជាគ្រូបង្វឹកភ្នំពេញក្រោន នៅរដូវកាលឆ្នាំ ២០២០ ដើម្បីជំនួសកៅអីលោក ស៊ុំ វណ្ណា ខណ:នេះគឺជាលើកទី២ ដែលបុរសជនជាតិអ៊ុយក្រែនរូបនេះត្រឡប់មកកាន់ទឹកដី Smart RSN បន្ទាប់ពីលោកធ្លាប់ដឹកនាំក្រុមសិង្ហក្រហមនេះម្ដងកាលពីឆ្នាំ ២០១៦-២០១៧។
ស្នាដៃរបស់លោក Oleg Starynskyi នៅឆ្នាំ២០២២៖
-ឈ្នះពាន Cambodian Super Cup
-ឈ្នះពាន Cambodian League Cup
-ឈ្នះពានលីគកំពូលកម្ពុជា Cambodia Premier League
-ឈ្នះពានគ្រូបង្វិកល្អជាងគេ៕