ជនសង្ស័យម្នាក់ត្រូវសមត្ថិច្ចចាប់ខ្លួនបាន ក្រោយពីធ្វើសកម្មភាពរួមនឹងគូកនរបស់ខ្លួនចេញឆក់និងកំហែងយកម៉ូតូតាមផ្លូវកាលពីថ្ងៃទី ២៣ខែមករាឆ្នាំ២០២៣ នៅតាមផ្លូវជាតិលេខ៤ នៅភូមិថ្លើក ឃុំពើក ស្រុកអង្គស្នួល ខេត្តកណ្តាល ។
ជនសង្ស័យ មានគ្នាចំនួន ០២នាក់។ក្នុងនោះរួមមាន៖ឈ្មោះ ប៉ុល បូរិន ហៅហ៊ីង ភេទប្រុស អាយុ៣៦ឆ្នាំ ជន ជាតិខ្មែរ មុខរបរមិនពិតប្រាកដ នៅភូមិព្រៃមាន ឃុំព្រៃពួច ស្រុកអង្គស្នួល ខេត្តកណ្ដាល ត្រូវសមត្ថកិច្ចឃាត់ខ្លួនថ្ងៃទី២៧ខែមករាឆ្នាំ២០២៣ និងម្នាក់ទៀតបានរត់គេចខ្លួនបាន។
បើតាមសមត្ថកិច្ច ជនសង្ស័យមានដីកាបង្គាប់ឲ្យចាប់ខ្លួន លេខ៥៣៨ ចុះថ្ងៃទី០៤ ខែវិច្ឆិកា ឆ្នាំ២០១៩ របស់ចៅក្រមស៊ើបសួរ នៃសាលាដំបូងខេត្តកណ្ដាល ហុក វ៉ាន់ធីណា ត្រូវចោទពីបទ៖ ជួញដូរដោយខុសច្បាប់នូវសារធាតុញៀន ប្រព្រឹត្តនៅភូមិត្រពាំងពេីក ឃុំពេីក ស្រុកអង្គស្នួល ខេត្តកណ្ដាល កាលពីថ្ងៃទី២៦ និង២៩ ខែមិថុនា ឆ្នាំ២០១៩។
ជាងនេះទៅទៀតជនសង្ស័យធ្លាប់ជាប់ពន្ធនាគារខេត្តកណ្តាល ០២លេីក រួចមកហើយគឺ-លើកទី១៖ រយៈពេល ០៣ខែ ពីបទ ជួញដូរដោយខុសច្បាប់នូវសារធាតុញៀន ឆ្នាំ២០១៥។-លេីកទី២៖ រយៈពេល ០៣ខែ ពីបទ៖ ហិង្សាដោយចេតនា ឆ្នាំ២០១៧។
ចណែកឈ្មោះ វុន គារ៉ាន់ ហៅទក,ត្រា ភេទប្រុស អាយុ២១ឆ្នាំ ជនជាតិខ្មែរ មុខរបរមិនពិតប្រាកដ នៅភូមិប្រមរ ឃុំព្រៃពួច ស្រុកអង្គស្នួល ខេត្តកណ្ដាល (គេចខ្លួន)។
ក្នុងប្រតិបត្តិការចាប់ខ្លួនជនសង្ស័យនោះ សមត្ថកិច្ចបានដកហូតម៉ូតូចំនួន ០៤គ្រឿង ដែលម៉ូតូទាំងនោះសុទ្ធតែត្រូវបានកែបន្លំស្លាកលេខ។
ជនរងគ្រោះ មានឈ្មោះថា ពឿន ពេជ្រ ភេទប្រុស អាយុ១៨ឆ្នាំ ជនជាតិខ្មែរ មុខរបរ បុគ្គលិកហាង ស្នាក់នៅភូមិត្រពាំងភូមិ ឃុំពើក ស្រុកអង្គស្នួល ខេត្តកណ្ដាល ។
យោងតាមរបាយការណ៍ពីសមត្ថកិច្ចបានឲ្យដឹងថា នៅមុនពេលកើតហេតុជនរងគ្រោះបានជិះម៉ូតូ ០១គ្រឿងម៉ាក Honda Scoopy ពណ៌ស លាយក្រហម ផលិតឆ្នាំ2021 ពាក់ផ្លាកលេខ កំពង់ស្ពឺ 1T-9908 ចេញពីការងារចុងភៅក្នុងអាហារដ្ឋានជប៉ុន នៅក្នុងការ៉ាស់សាំងតេលា (សុិនត្រលផាក) ស្ថិតក្នុងភូមិត្រពាំងពើក ឃុំពើក ឆ្ពោះទៅលេងផ្ទះម្ដាយរបស់ខ្លួន នៅភូមិរំដួល ឃុំត្រពាំងគង ស្រុកសំរោងទង ខេត្តកំពង់ស្ពឺ។ នៅពេលជិះដល់ចំណុចកើតហេតុខាងលើ ស្រាប់តែមានជនសង្ស័យចំនួន ០២នាក់ ជិះម៉ូតូ ០១គ្រឿង ម៉ាក Let’s ពណ៌ស គ្មានក្បាំងផ្នែកខាងមុខ គ្មានផ្លាកលេខ បានជិះតាមពីក្រោយហើយជិះមកក្បែរ រួចកៀរម៉ូតូជនរងគ្រោះអែបខាង បន្ទាប់មកជនសង្ស័យមាឌតូចជិះក្រោយលូកដៃឆក់ទូរស័ព្ទជនរងគ្រោះ តែមិនបាន ភ្លាមនោះជនរងគ្រោះបានស្រែកថាចោរៗ ស្រាប់តែជនសង្ស័យមាឌធំអ្នកឌុប បានវាយទៅលើជនរងគ្រោះចំនួន ០២ដៃ ត្រូវកញ្ចឹង.កបណ្តាលឱ្យដួលម៉ូតូ ហើយជនរងគ្រោះបានទុកម៉ូតូចោលរត់គេចខ្លួនពីកន្លែងកើតហេតុ។ ពេលនោះជនសង្ស័យម្នាក់ បានលើកម៉ូតូរបស់ជនរងគ្រោះហើយជិះគេចខ្លួនទៅទិសខាងលិចបាត់ទៅ ក្រោយមកជនរងគ្រោះក៏បានទូរស័ព្ទទៅប្រាប់ក្រុមគ្រួសារ ដើម្បីរាយការណ៍ទៅឲ្យសមត្ថកិច្ច។
ក្រោយពីទទួលបានព័ត៌មានកម្លាំងផ្នែកជំនាញ សហការណ៍ជាមួយកម្លាំងប៉ុស្ដិ៍ព្រៃពួច ពើក លំហាច ដំណាក់អំពិល ធ្វើការស៊េីបអង្កេត ស្រាវជ្រាវ ទើបកំណត់មុខសញ្ញាបាន រហូតដល់ថ្ងៃទី២៧.០១.២០២៣ ក៏ឈានទៅដល់ការឃាត់ខ្លួនជនសង្ស័យបាន១នាក់ឈ្មោះ ប៉ុល បូរិន នៅចំណុចភូមិព្រៃមាន ឃុំព្រៃពួច ស្រុកអង្គស្នួល ខេត្តកណ្តាល ។
នៅចំពោះមុខសមត្ថកិច្ច ជនសង្ស័យបានសារភាពថា ខ្លួននិងបក្ខពួក ពិតជាបានរួមគំនិតគ្នា វាយយកម៉ូតូជនរងគ្រោះ ហេីយនាំគ្នាយកទៅលក់ នៅផ្លូវ៤១ ខេត្តកំពង់ស្ពឺ ដោយមានអ្នកទទួលទិញ ចំនួន ០២នាក់នៅស្រុកសំរោងទងនិងគងពិសី ខេត្តកំពង់ស្ពឺ។
ក្រោយចាប់ខ្លួនបាន ជនសង្ស័យត្រូវបាននាំទៅកាន់នៅអធិការដ្ឋាននគរបាលស្រុក ដេីម្បីកសាងសំណុំរឿងតាមនីតិធី៕
អត្ថបទ៖តាខ្មៅ