យោងតាមការចុះផ្សាយរបស់ផេកសហព័ន្ធកីឡាគុនខ្មែរអន្តរជាតិ – KUN KHMER International Federation នៅរសៀលថ្ងៃចន្ទ ទី៣០ ខែមករា ឆ្នាំ២០២៣ បានឲ្យដឹងថាប្រទេសចំនួន ៤ នៅតំបន់អាស៊ានយល់ព្រមចូលរួមជាសមាជិក «គុនខ្មែរ» អន្តរជាតិ។
ប្រទេសចំនួន៤មានដូចជា៖
-ថៃ
-ឥណ្ឌូនេស៊ី
-ម៉ាឡេស៊ី
-ហ្វីលីពីន។
កម្ពុជា បានសម្តែងការស្វាគមន៍និងបើកទ្វាទូលាយគ្រប់បណ្តាប្រទេសទាំងអស់ដើម្បីចូលរួម ដោយក្នុងនាមជាម្ចាស់ក្បាច់គុន ដែលមានគោលបំណងផ្សព្វផ្សាយកីឡាគុនខ្មែរឲ្យមានភាពទូលំទូលាយលើពិភពលោក ដែលបច្ចុប្បន្នមានសមាជិកកើនដល់ ៣៣ប្រទេសរបស់សហព័ន្ធគុនខ្មែរអន្តរជាតិ។
ការសម្រេចចូលរួមជាសមាជិក«គុនខ្មែរ»អន្តរជាតិរបស់៤ប្រទេសខាងលើកើតឡើង បន្ទាប់ពីបញ្ចប់កិច្ចប្រជុំពិសេសថ្នាក់ដឹកនាំកីឡាគុនខ្មែរអន្តរជាតិ នៅសណ្ឋាគារហ្គាឌិនសុីធី រាជធានីភ្នំពេញ កាលពីព្រឹកថ្ងៃទី២៦ ខែមករា ឆ្នាំ២០២៣។
ជាលទ្ធផលនៃកិច្ចប្រជុំដែលបានសម្រេចគឺ ប្រទេសថៃ និង៧ប្រទេសនៅតំបន់អាស៊ាន ដូចជា៖ ឡាវ,ម៉ាឡេស៊ី, មីយ៉ាន់ម៉ា,ឥណ្ឌូណេស៊ី,ហ្វីលីពីន និង វៀតណាម បានគាំទ្រ និងអនុម័តជាឯកច្ឆ័ន្ទប្រើឈ្មោះ«គុនខ្មែរ» ដោយមិនមានការកែប្រែសម្រាប់ព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
ជុំវិញការដាក់កីឡា «គុនខ្មែរ» ចូលរួមប្រកួតក្នុងព្រឹត្តិការណ៍ស៊ីហ្គេមនេះ ឯកឧត្តម វ៉ាត់ ចំរើន បានបញ្ជាប់ក្រុមការងារសាព័ត៌មានត្រយង ថា៖ «កីឡា «គុនខ្មែរ» នឹងត្រូវដាក់ប្រកួតមាន១៨ វិញ្ញាសា រួមទាំងវិញ្ញាសាសម្ដែងគុណគ្រូ ផងដែរ។ ចំណែកលក្ខខន្តិកៈនៃការប្រកួតក៏នឹងកំណត់ស្លៀកសម្លៀកបំពាក់ ដូចជាមានក្រមា បូកនឹងទង់ជាតិប្រទេសរៀងៗខ្លួន ជួតលើក្បាល ក្នុងនោះទ្រនាប់ដៃ ឬ កងដៃ (ខ្សែចងដៃ) ទៅតាមពណ៌នៃប្រទេសនីមួយៗចង់ដាក់ (ពាក់ព័ន្ធនឹងជំនឿ) ព្រមទាំងមានប្រើមួក (ការពារបង្ហាញថាមិនបែបហិង្សា)»។
សូមបញ្ជាក់ថា ព្រឹត្តិការណ៍ប្រកួតកីឡាអាស៊ីអាគ្នេយ៍ លើកទី៣២ (32nd SEA Games) នឹងធ្វើឡើងពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣ ចំណែកព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ (12th ASEAN Para Games) នឹងធ្វើឡើងពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣៕
