លីគកំពូលរបស់ប្រទេសមីយ៉ាន់ម៉ា (Myanmar National League) នឹងចាប់ផ្តើមដំណើរការប្រកួត រដូវកាលថ្មីរបស់ខ្លួនពីថ្ងៃ២១ ខែកុម្ភៈ នឹងបញ្ចប់នៅខែតុលា ឆ្នាំ២០២៣ ខាងមុខ នេះបើយោងតាមចុះផ្សាយរបស់គេហទំព័រសហព័ន្ធកីឡាបាល់ទាត់អាស៊ាន ថ្មីៗនេះ។
ប្រភពបញ្ជាក់ថាក្រុមដែលចូលរួមប្រកួតក្នុងពានរង្វាន់ Myanmar National League រដូវកាលឆ្នាំ២០២៣ នេះមាន ចំនួន ១២ក្រុម ក្នុងចំណោមនោះ ក្រុមដែលគ្រងជើងឯកពានរង្វាន់លីគកំពូលនេះច្រើនជាងគេគឺ ក្រុម Yangon United សរុប៥សម័យកាល និងរងជើងឯកចំនួន៤សម័យកាល ទី២ គឹក្រុម Shan United គ្រងជើងឯកសរុបចំនួន៤សម័យកាល និងរងជើងឯកចំនួន២សម័យ ដូចគ្នាជាមួយក្រុម Yadanarbon តែទទួលបានជើងឯករងបាន១សម័យកាល។
ដូច្នេះក្រុមទាំង១២ មាន Ayeyawady United, Dagon Star United, GFA, Hantharwady United, ISPE, Kachin United, Mahar United, Myawady, Rakhine United, Shan United, Yadanarbon, Yangon United។
គួរបន្ថែមដែរថា សម្រាប់ពានរង្វាន់ Myanmar National League បានបង្តើតឡើងនៅឆ្នាំ២០០៩ ដោយគិតមកដល់ពេលនេះគឺមានរយៈពេល ១៤ឆ្នាំ ស្របពេលដែលក្រុមសន្សំពិន្ទុបានច្រើនជាងគេក្លាយជាម្ចាស់ជើងឯក ហើយក្រុមដែលនៅបាតតារាង២ក្រុមត្រូវធ្លាក់ទៅលេងពានរង្វាន់លីគទី២ នៅរដូវកាលបន្ទាប់៕
