សិល្បៈជាតិ៖ អ្នកនាង ប្រាសាទ ដាវីន បាននាំយកយកឈុតតំណាងជាតិ «អប្សរមេរា» គ្រងដើរបង្ហាញនៅលើវេទិកាប្រកួត Universal Woman 2023 ដែលត្រៀមធ្វើឡើងនៅដើមខែកុម្ភៈខាងមុខនេះ នាឌូបៃជាទីក្រុងធំបំផុតនៃសហព័ន្ធអារ៉ាប់រួម។ ឈុតដ៏ប្រណិតនេះដែរ បានតំឡើង និងរចនាម៉ូដដោយលោក ជួប វិចិត្រ ឬគ្រប់គ្នាស្គាល់ឈ្មោះថា ស្ករគ្រាប់ ជាអ្នកច្នៃម៉ូដឈុតតំណាងជាតិដ៏ចំណានធ្លាប់មានស្នាដៃលេចធ្លោរក្នុងវិស័យប្រកួតសម្រស់បវរកញ្ញា។
បើមើលនឹងភ្នែក យើងឃើញពីសម្បុររបស់ឈុតតំណាងជាតិ អប្សរមេរា មានពណ៌សក្បុស រំលេចដោយត្បូងមរតក បូកផ្សំជាមួយនឹងក្បាច់បុរាណដែលចម្លងចេញពីទម្រង់អប្សរដើម បានញាំងឱ្យឈុតមួយនេះកាន់តែមានភាពទាក់ទាញ និងចំណាប់អារម្មណ៍ពីមហាជន។ ចុះហេតុអ្វីបានជាអ្នកច្នៃម៉ូដវ័យ ២៨ ឆ្នាំរូបនេះ ហ៊ានតំឡើងឈុតដែលប្លែកភ្នែកមិនធ្លាប់មានពីមុនមកបែបនេះ ? តើឈុតនេះបានបង្កប់អត្ថន័យ និងលក្ខណៈវិសេសបែបណាខ្លះ?
តាមការរៀបរាប់របស់ស្ករគ្រាប់ បានលម្អិតថា ឈុត «អប្សរមេរា» បានផ្ដោតអត្ថន័យនៃពាក្យ មេរ៉ា គឺជានាងទេពអប្សរាដែរមានរូសម្រស់ស្រស់ស្អាតដែលកើតចេញពីការការកូរសមុទ្រទឹកដោះរវាងអាសូរៈ និងទេវៈ ជាភាវៈអរូបី ជាដួងព្រលឹងវិញ្ញាណរបស់ស្ត្រីដែលផ្សុំរួមបញ្ចូលគ្នារវាងពពកនឹងទឹក។ តួរឈុតធ្វើឡើយដោយការប្រើប្រាស់ភាពស្រមើលស្រមៃនៃនាងទេពអប្សរ ដោយយកលំនាំតាមចម្លាក់នាងអប្សរាអង្គរ ជ្រើសយកពណ៌សរតំណាងឱ្យភាពបរិសុទ្ធ ស្មោះសរ សេរីភាព ថ្វាយអទិទេព។ រីឯត្បូងមករតវិញ ហេតុអ្វីបានក្លាយជាត្បូងពិសេសដែលជ្រើសមករំលេចក្នុងការរចនាម៉ូដឈុតនេះ?
ស្ករគ្រាប់ បានលើកឡើងថា ត្បូងមរតក មានពណ៌បៃតងខៀវស្រងាត់ បង្ហាញពីឥទ្ធិពល និងអំណាច ដែលធ្វើឱ្យឈុត អប្សរមេរា កាន់តែមានថាមពល។ ហើយលើសពីនោះ ចំនូលចិត្តរបស់លោកផ្ទាល់ក៏ស្រឡាញ់ត្បូងមួយប្រភេទនេះជាពិសេសផងដែរ។ លក្ខណៈពិសេសរបស់ឈុត «អប្សរមេរា» គឺខុសប្លែកពីទម្រង់នៃឈុតរបស់អប្សរាតាមចម្លាក់នៅលើផ្ទាំងប្រាសាទ គឺឈុតនេះមានអាវក្រោះ។ ពិតជាចម្លែកណាស់ តើស្ត្រីខ្មែរអាចគ្រង ឬពាក់អាវក្រោះបាននៅពេលណា?
ជាទូទៅ អាវក្រោះ គេប្រើសម្រាប់ពាក់ការពារខ្លួននៅពេលចេញច្បាំង ឬធ្វើសឹកសង្គ្រាមតែប៉ុណ្ណោះ។ ការរំលេចនូវម៉ូដអាវក្រោះលើតួទម្រង់អប្សរា គឺមិនដែលមានការរចនាបែបនេះឡើងពីមុនមកទេ។ ស្ករគ្រាប់ និយាយថា មូលហេតុនៃការផុសគំនិតរចនាម៉ូដអាវក្រោះលើតួឈុត អប្សរមេរា ក៏ព្រោះលោកចង់បង្ហាញអីភាពអង់អាចក្លាហាន ឥទ្ធិពលស្ត្រីខ្មែរក្នុងការការពារខ្លួន នៅពេលចេញច្បាំងលើវេទិការប្រកួតអន្តរជាតិ។ ហើយនៅពេលដែលឈុតនេះបានគ្រងដោយអ្នកនាង ប្រាសាទ ដាវីន ថែមទៀត នោះកាន់តែធ្វើឱ្យឈុតមួយនេះមើលទៅដូចជាមានព្រលឹងពិតៗ។
ដោយឡែក ឈុតតំណាងជាតិ «អប្សរមេរា» បានចំណាយពេលតំឡើងត្រឹមតែរយៈពេល ១២ ថ្ងៃតែប៉ុណ្ណោះ គឺជាឈុតដំបូងហើយដែលលោកប្រើរយៈពេលខ្លីក្នុងការតំឡើង ដែលខុសពីឈុតមុនៗ លោកត្រូវចំណាយពេលធ្វើយ៉ាងហោចណាស់ ១ខែកន្លះទៅ ២ខែទើបរួចរាល់ និងប្រណិតភាព។
សូមជម្រាប ក្រៅពីឈុត «អប្សរមេរា» លោក ជួប វិចិត្រ ហៅស្ករគ្រាប់ក៏ធ្លាប់មានបទពិសោធន៍រចនាម៉ូដឈុតតំណាងជាតិជាច្រើនទៀតដូចជា «នាង ភិម៉ាល័យ ភួង ភិគុន្ធ» គ្រងដោយ Miss Cambodia 2021 ទទួលពានរង្វាន់ Best National Custom ។ ឈុត «មុន្នីខេណីពិជ័យទេវី» គ្រងដោយម្ចាស់មកុដកញ្ញាឯកភេទទី៣ កញ្ញា វ៉ាន់ ប៊ី Miss Queen Cambodia 2021 ទទួលពានរង្វាន់ Best National Custom លើឆាកជាតិ។ ឈុត «អ្នកចម្បាំងចុងក្រោយ» គ្រងដោយ កញ្ញា ឯម គុនថង Miss Global Cambodia 2022។
ក្រោយមកមានឈុត «សុវណ្ណាហង្ស» គ្រងដោយកញ្ញា ហង្ស សុរិយាន់ បេក្ខនារីកំពូល៦នាក់ចុងក្រោយក្នុងកម្មវិធី Miss Universe 2022។ ឈុត «គជរី ឰរាវ័ណ (ដំរី អៃរ៉ាវ៉ាន់)» គ្រងដោយ កញ្ញា ហង្ស ម៉ានីតា ម្ចាស់មកុដកម្មវិធី Miss Universe Cambodia 2022។ ឈុត «បុទុមម៉ានាគី» គ្រងដោយកញ្ញា សារី ស្រីពេជ្រ ម្ចាស់មកុដបវរកញ្ញា Miss Petite Global 2022 ឈុតនេះឈ្នះ Best National Custom លើឆាកអន្តរជាតិ និងឈុត «សុវណ្ណមច្ឆា» គ្រងដោយ កញ្ញា ពេជ្រ វត្តីសារ៉ាវ៉ាឌី ម្ចាស់មកុដកម្មវិធី Miss Grand Cambodia 2022 ជាដើម៕