សិល្បៈ​អន្តរជាតិ​៖​ កាល​ពី​ថ្ងៃ​ម្សិលមិញ​នេះ​បណ្ដាញ​សង្គម​​និង​សារព័ត៌មាន​ជា​ច្រើននៅ​ជុំវិញ​ពិភពលោក​បាន​សំរុក​ផ្សព្វផ្សាយ​ដំណឹង​រៀបការ​របស់​ Song Joong Ki និង​មិត្ត​ស្រី​​បរទេស​នាង​ Katy Louise Saunders តាម​រយៈ​បណ្ដាញ​សង្គម​ ព្រម​ទាំង​ប្រកាស​ដំណឹង​ល្អ​ថា​ខាង​ស្រី​កំពុង​ពរពោះ​ខណៈ​ដែល​អ្នក​ទាំង​ពីរ​បាន​ចុះ​អេតាស៊ី​វិល​រួច​រាល់​។​ ក្នុង​ចំណោម​អ្នក​គាំទ្រ​ដែល​ចូល​មក​អបអរសាទរ​ចំពោះ​ដំណឹង​ដ៏​រីករាយ​របស់​បុរស​សង្ហា​ញញឹម​ស្រស់​រូប​នេះ​ក៏​មាន​ហ្វេន​មួយ​ចំនួន​បាន​បង្ហាញ​ការ​ខកចិត្ត​និង​ធ្វើ​ពហិការ​ឈប់​គាំទ្រ​លោក​ដោយ​ហេតុផល​ថា​ តារា​រូប​នេះ​ច្រើន​ប្រើ​មនោសញ្ចេតនា​ដើម្បី​ទាក់​ប្រយោជន៍​សម្រាប់​អាជីព​របស់​ខ្លួន​។

យោង​តាម​រយៈ​បណ្ដាញ​សង្គម​ Twitter ​អតីត​អ្នក​គាំទ្រ​ Song Joong Ki ដែល​មិន​សប្បាយ​ចិត្ត​ចំពោះ​ដំណឹង​ដ៏​រីករាយ​របស់​តារា​រូប​នេះ​បាន​បង្ហាញ​អារម្មណ៍ឆេះឆួល​របស់​ខ្លួន​​យ៉ាង​ដូច្នេះ​ថា​៖ «ការ​គាំទ្រ​របស់​ខ្ញុំ​ចំពោះ​ Joong​ki បាន​ដើរ​មក​ដល់​ទីបញ្ចប់​។ខ្ញុំ​នឹង​គ្មាន​ថ្ងៃ​ភ្លេច​ទង្វើ​នៅ​ស្ងៀមស្ងាត់​មិន​ចេញ​ស្ដី​នៅពេល​ដែល​ Song Hye Kyo ត្រូវ​បាន​គេ​វាយ​ប្រហារ​យ៉ាង​អាម៉ាស​នៅប្រទេស​កូរ៉េ​ បូក​នឹង​រឿង​ដែល​គេ​សុំ​នាង​លែងលះ​ខណៈ​ដែល​នាង​កំពុង​ថត​ខ្សែ​ភាពយន្ត​នៅ​បរទេស​»

បន្ទាប់​ពី​ការ​លើក​របស់​ហ្វេន​ម្នាក់​នោះ​ មាន​មនុស្ស​ជា​ច្រើន​បាន​ចូល​មក​ឆ្លើយ​តប​និង​ Retweet ចំពោះ​ការ​លើក​ឡើង​នេះ។ ដោយ​ក្នុង​នោះ​មាន​ទាំង​មតិគាំទ្រ​ចំពោះ​ការ​លើក​ឡើង​ខាង​លើ​ និង​មតិ​ប្រឆាំង​មិន​គាំទ្រ​ការ​លើក​ឡើង​ខាង​លើ​ ហើយ​ចេញ​មក​ការពារ​ Song Jong Ki។

«ខ្ញុំ​មិន​ដែល​មើល​ឃើញ​គាត់​ដូច​កាល​ពី​មុន​នោះ​ឡើយ​ ក្រោយ​គាត់​បាន​ធ្វើ​ទង្វើ​បែប​នោះ​ដាក់​ Song Hye Kyo… មែន​វា​ជា​ការ​ពិត​ដែល​យើង​មិន​បាន​ដឹង​រឿង​ទាំង​ស្រុង​ ប៉ុន្តែ​ពួក​គេ​មាន​បាន​ដោះ​ស្រាយ​គ្នា​អត់​..ការ​ពិត​មួយ​ដែល​គាត់​បិទ​មាត់​អត់​និយាយ​ស្អី​ ហើយ​សុំ​នាង​លែងលះ​ទាំង​នាង​កំពុង​ថត​រឿង​នៅ​បរទេស​ បាន​បង្ហាញ​ពីចរិត​ពិត​របស់​គេ​រួច​ស្រេច​ទៅ​ហើយ​»

«Joong Ki រៀបការ​ម្ដង​ទៀត​ព្រោះ​ Katy មាន​ខ្សែ​បណ្ដាញ​ជួយ​លើ​អាជីព​ការងារ​របស់​គេ​នៅ​បរទេស​ ហើយ​នាង​មាន​ទ្រព្យ​ជាង​គេ​…ច្បាស់​ណាស់​គឺ​គេ​កំពុង​ត្រៀម​ខ្លួន​សាក​កាមេរ៉ា​​ថត​រឿង​នៅ​ក្នុង​ប៉ុស្ដិ៍​ BBC តាម​រយៈ​ប្រពន្ធ​ថ្មី​របស់​ខ្លួន​…គ្រប់​យ៉ាង​ច្បាស់​លាស់​អស់​ហើយ​…ចាំ​មើល​តើ​ម្ដង​នេះ​​បាន​យូរ​ប៉ុណ្ណា​»

នៅ​ក្នុង​រឿង​នេះ​ដែរ​ ​មាន​អ្នក​ខ្លះ​បាន​លើក​យក​រឿង​កូន​​មក​ធ្វើ​ជា​ប្រធាន​បទ​វែកញែក​គ្នា​ដោយ​អ្នក​ខ្លះ​អះអាង​ថា​ Song Hye Kyo ចង់​បាន​កូន​ ប៉ុន្តែ​ Joong Ki មិន​ទាន់​ចង់​បាន​ ហើយ​ក៏​មាន​អ្នក​គាំទ្រ​ខាង​ Joong Ki ចេញ​មក​ការពារ​និង​លើក​ហេតុផល​ថា​អ្នក​ដែល​ចង់​បាន​កូន​នោះ​គឺ Joong Ki តែ​ Song Hye Kyo មិន​ចង់​បាន​កូន​។

យ៉ាង​ណា​មិញ​អ្នក​គាំទ្រ​កណ្ដាល​និយម​បាន​បង្ហាញ​ទស្សនៈ​ថា​រឿង​របស់​ Song Joong Ki និង​ Song hye Kyo បាន​ចប់​សព្វគ្រប់​ហើយ​ អ្នក​ទាំង​ពីរ​បាន​លែងលះ​គ្នាស្រប​ច្បាប់​ ហើយ​អ្នក​ទាំងពីរ​ក៏​កំពុង​ដំណើរ​ជីវិត​រៀងៗ​ខ្លួន​ដែរ​ ដូច្នេះ​ការ​រៀបការ ​ឬ​មាន​កូន​គឺ​ជា​រឿង​ផ្ទាល់​ខ្លួន​មិន​មាន​ពាក់ព័ន្ធ​គ្នា​នោះ​ឡើយ​៕

Share.