សហព័ន្ធកីឡាបាល់ទាត់មីយ៉ាន់ម៉ា (MFF) នៅថ្ងៃទី៣១ ខែមករា នេះ បានប្រកាសពីការបញ្ចប់កិច្ចសន្យាជាមួយលោក Antoine Hey ដែលបច្ចុប្បន្នជាគ្រូបង្វឹកក្រុមជម្រើសជាតិមីយ៉ាន់ម៉ា។ លោក Antoine Hey ត្រូវបានតែងតាំងជាគ្រូបង្វឹកក្រុមជម្រើសជាតិមីយ៉ាន់ម៉ាក្នុងខែតុលា ឆ្នាំ២០១៩។
គ្រូបង្វឹកសញ្ជាតិអាល្លឺម៉ង់រូបនេះ បច្ចុប្បន្នមានវ័យ ៥២ឆ្នាំ និងបានចាប់អាជីពជាគ្រូបាល់ទាត់ដំបូងនៅឆ្នាំ២០០៣ ដោយដឹកនាំក្លឹបបាល់ទាត់សមាគមអាឡឺម៉ង់ VfR Neumünster។ មុនពេលឈានជើងចូលដឹកនាំនៅអាស៊ី លោក Antoine Hey ធ្លាប់បានដឹងនាំក្លិបជាច្រើន រួមទាំងក្រុមបាល់ទាត់ជម្រើសជាតិដូចជា៖
- ឆ្នាំ២០០៤-២០០៦ ក្រុមបាល់ទាត់ជម្រើសជាតិឡេសូតូ
- ឆ្នាំ២០០៦-២០០៧ ក្រុមបាល់ទាត់ជម្រើសជាតិហ្គាំប៊ី
- ឆ្នាំ២០០៨-២០០៩ ក្រុមបាល់ទាត់ជម្រើសជាតិលីបេរីយ៉ា
- ឆ្នាំ២០០៩ ក្រុមបាល់ទាត់ជម្រើសជាតិកេនយ៉ា
- ឆ្នាំ២០១៧-២០១៨ ក្រុមបាល់ទាត់ជម្រើសជាតិរវ៉ាន់ដា
ក្រោមការដឹកនាំរបស់លោកAntoine Hey ក្រុមជម្រើសជាតិមីយ៉ាន់ម៉ា បានចេញមុខលើឆាកអន្តរជាតិវិញលើកដំបូងនៅអំឡុងខែឧសភា ឆ្នាំ២០២១ គឺដើម្បីចូលរួមប្រកួតក្នុងវគ្គជម្រុះជុំទី២ នៃពានរង្វាន់បាល់ទាត់ពិភពលោក 2022 FIFA World Cup និងវគ្គជម្រុះពាន AFC Asian Cup 2023 ប្រចាំទ្វីបអាស៊ី ក្រោយសកម្មភាពបាល់ទាត់ក្នុងប្រទេសអាស៊ានមួយនេះស្ងប់ស្ងាត់អស់មួយរយៈធំ តាំងពីមានបញ្ហានយោបាយនៅក្នុងប្រទេសខ្លួន។
គូសបញ្ជាក់ដែរថា សម្រាប់ពានរង្វាន់ AFF Mitsubishi Electric Cup 2022 ក្រុមជម្រើសជាតិមីយ៉ាន់ម៉ា បានបញ្ចប់ត្រឹមចំណាត់ថ្នាក់លេខ៤ ក្នុងពូល B ចាញ់ ៣ប្រកួតស្មើ១ មាន ១ពិន្ទុ។ ខណ:ក្រុមជម្រើសជាតិថៃ ក្លាយជាក្រុមឈ្នះជើងឯកពានរង្វាន់បុរសប្រចាំតំបន់អាស៊ានឆ្នាំ២០២២ នេះ បានច្រើនជាងគេ រហូតដល់ទៅ៧លើក វៀតណាមជើងឯករង៕
