ក្លិបបាល់ទាត់ភ្នំពេញក្រោន បានបង្ហោះលើទំព័រហ្វេសប៊ុក នៅព្រឹកថ្ងៃអង្គារ ទី១ ខែកុម្ភ: ឆ្នាំ២០២៣ ថា៖«ប្រធាន FIFA លោក Gianni Infantino បានផ្ញើរលិខិតអបអរសាទរក្លិបបាល់ទាត់ភ្នំពេញក្រោន តាមរយៈឯកឧត្តមនាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជាក្នុងឱកាសដែលភ្នំពេញក្រោនបានគ្រងជើងឯកលីគកំពូលកម្ពុជានៅឆ្នាំ២០២២ កន្លងទៅថ្មីៗនេះ»។
ក្លិបបាល់ទាត់ភ្នំពេញក្រោន ក្រោមការដឹកនាំរបស់លោក Oleg Starynskyi បានគ្រងតំណែងជើងឯកលីគកំពូលកម្ពុជា ឆ្នាំ២០២២ ក្រោយយកឈ្នះបឹងកេត ក្នុងលទ្ធផល ៥-០ សប្តាហ៍ទី២៧ នៅកីឡដ្ឋាន Smart RSN នារាត្រីថ្ងៃទី៣ ខែធ្នូ ជាមួយ ៥២ពិន្ទុនៅក្នុងដៃ។
នេះជាការឈ្នះជើងឯកខេមបូឌាលីគ Cambodian Premier League ២ឆ្នាំជាប់គ្នារបស់ភ្នំពេញក្រោន និងជាលើកទី៨ ដែលជាចំនួនច្រើនបំផុតប្រចាំប្រវត្តិសាស្រ្តលីគកំពូលកម្ពុជា ពោលគឺឈ្នះនៅឆ្នាំ២០០២ ២០០៨ ២០១០ ២០១១ ២០១៤ ២០១៥ ២០២១ និង ២០២២៕
