សិល្បៈអន្តរជាតិ៖ ថ្មីៗនេះនៅលើបណ្ដាញសង្គមអនឡាញកោះតៃវ៉ាន់កំពុងតែផ្ទុះករណីរិះគន់ចំពោះតារាសម្ដែងឯករឿង F4 របស់ប្រទេសថៃដែលបង្ហាញឥរិយាបទមិនសមរម្យថែមទាំងមានពេលខ្លះនាំគ្នាញ៉ាំនំខណៈដែលកំពុងស្ថិតក្នុងការផ្ដល់បទសម្ភាសន៍។ មិនអស់ត្រឹមប៉ុណ្ណេះនោះទេ សារព័ត៌មានកោះតៃវ៉ាន់បានសរសេរទៀតថាតារាថៃទាំងនេះមិនគោរពពេលវេលាមកយឺតយ៉ាវ ថែមទាំងមិនមានការសុំទោស គ្រាន់តែអ្នកដឹកនាំមកប្រាប់ថាមកយឺតដោយសារតែរវល់ផាត់មុខធ្វើសក់ និងសាច់រឿងជាច្រើនទៀតដែលរៀបរាប់មិនអស់។ ប៉ុន្តែក៏មានក្រុមអ្នកគាំទ្ររបស់តារាទាំងនេះចេញមកការពារនិងលើកឡើងថាប្រហែលជាអាចមកពីទំនាក់ទំនងមានរបាំងភាសាក៏ថាបាន។
ចំពោះករណីខាងលើនេះទីបំផុតផលិតកម្ម GMM TV បានចេញមកថ្លែងការណ៍ពាក់ព័ន្ធនឹងករណីនេះថា៖ ថ្មីៗនេះមានការលើកឡើងយ៉ាងគគ្រឹកគគ្រេងពាក់ព័ន្ធនឹងផ្ដល់បទសម្ភាសន៍សិល្បករយើងខ្ញុំនៅក្រុងតៃប៉ិ ដែលធ្វើឡើងកាលពីថ្ងៃទី៤ កុម្ភៈ ឆ្នាំ២០២៣កន្លងទៅ ផលិតកម្មសូមបកស្រាយចំពោះករណីនេះដូចតទៅ
១.ករណីរឿងការផ្ដល់បទសម្ភាសន៍មានភាពយឺតយ៉ាវ៖ ការផ្ដល់បទសម្ភាសន៍ពិតជាយឺតជាងពេលវេលាកំណត់ពិតមែន ដោយសារតែជើងហោះហើរមានការពន្យាពេល ទើបធ្វើឱ្យយឺតជាងពេលវេលាបានណាត់គ្នា ប៉ុន្តែអ្នករៀបចំកម្មវិធីបានជម្រាបដល់អ្នកសារព័ត៌មានរួចហើយ ចំណុចនេះក្រុមហ៊ុនសុំទោសចំពោះរឿងដែលបានកើតឡើងផងដែរ។
២.ចំពោះអាកប្បកិរិយានិងឥរិយាបទមិនភ្នែករបស់សិល្បករយើងខ្ញុំដែលសម្ភាសន៍បណ្ដើរញ៉ាំនំបណ្ដើរនោះ អាចមកពីមានការយល់ច្រឡំឬដោយសារតែការទំនាក់ទំនងគ្នារវាងក្រុមការងារនិងសិល្បករដែលបណ្ដាលឱ្យតារាយើងមានយល់ច្រឡំថាមិនទាន់ចាប់ផ្ដើមថតកម្មវិធីនៅឡើយ ទើបនាំគ្នាញ៉ាំនំលេងខណៈកំពុងរង់ចាំថតកម្មវិធី។ ប៉ុន្តែនៅពេលប្រាប់ឱ្យសិល្បករយើងបានដឹង ទើបគ្រប់គ្នាត្រៀមខ្លួនជាស្រេចដើម្បីផ្ដល់បទសម្ភាសន៍ ប៉ុន្តែក្រុមការងារបានជម្រាបដល់អ្នកសារព័ត៌មានហើយកុំឱ្យប្រើប្រាស់រូបភាពទាំងនេះ។
ករណីដែលកើតឡើងនេះក្រុមហ៊ុន GMM-TV និងសិល្បករទាំងអស់សូមឱនកាយទទួលស្គាល់កំហុស ដែលធ្វើបុគ្គលពាក់ព័ន្ធជាច្រើនមិនសប្បាយចិត្តចំពោះរឿងដែលកើតឡើងនេះ។ តទៅថ្ងៃមុខយើងខ្ញុំនឹងមានការប្រុងប្រយ័ត្នឱ្យកាន់តែខ្លាំងថែមទៀតមិនឱ្យកើតមានហេតុការណ៍បែបនេះកើតឡើងទៀត ជាពិសេសនឹងព្យាយាមទំនាក់ទំនងឱ្យកាន់តែស្អិតល្មួតមិនឱ្យមានការយល់ច្រឡំគ្នាដូចជាលើកនេះទៀត៕
ប្រភព៖ Sanook
