ក្លិបបាល់ទាត់វិសាខា នៅថ្ងៃទី១៣ ខែកុម្ភ: នេះ បានប្រកាសសម្រេចផ្ទេរកីឡាករ Barreto De Lima Mouzinho ទៅកាន់ក្លិប SLB Laulara ដែលជាក្លិបចាស់នៅស្រុកកំណើររបស់កីឡាកររូបនេះក្រោមលក្ខខណ្ឌខ្ចីជើងរយៈពេលខ្លី។
កាលពីរដូវកាលឆ្នាំ២០២២ រូបគេបានចូលរួមជាមួយក្លិបបាល់ទាត់អង្គរថាយហ្គឺរ និងបានព្រមព្រៀងចុះកិច្ចសន្យាជាមួយក្លិបបាល់ទាត់វិសាខា សម្រាប់រដូវកាលឆ្នាំ២០២៣ នេះ។ ខណ:កីឡាករ Mouzinho គ្មានឈ្មោះលេងឱ្យវិសាខា ក្នុងពានរង្វាន់ Cambodian League Cup រដូវកាល ២០២៣។
មូលហេតុ ដោយសារតែច្បាប់របស់ CPL បានចែង ថាក្លិបទាំងអស់អាចមានសិទ្ធិចុះឈ្មោះកីឡាករបរទេសបានតែ៥នាក់ប៉ុណ្ណោះ ខណ:វិសាខា សម្រេចចុះឈ្មោះកីឡាករ Khan Mohammed Faeez, Takumu Nishihara, Marcos Vinicius, Mirzaev Alisher និង Mbarga Emmanuel។
កីឡាករ Mouzinho កើតនៅថ្ងៃទី ២៦ កុម្ភះ ឆ្នាំ២០០២ (អាយុ ២០ឆ្នាំ) មានកម្ពស់១ម៉ែត្រ៦៥ និងលេងក្នុងតំណែងខ្សែប្រយុទ្ធ។ រូបគេធ្លាប់លេងនៅក្លិប SLB Laulara ពាក់អាវលេខ ១០ របស់ជម្រើសជាតិទីម័រខាងកើត កីឡាកររូបនេះក៏អ្នកទាត់បញ្ចូលទីបានច្រើនជាងគេប្រចាំរដូវកាលពីរដូវកាល ២០២១ នៃលីគកំពូលទីម័រ៕