សិល្បៈជាតិ៖ នៅក្នុងព្រឹត្តិការណ៍អង្គរសង្ក្រាន្តឆ្នាំ ២០២៣ ខាងមុខនេះ កម្ពុជាយើងត្រៀមប្រកួតរាំម៉ាឌីហ្សុន ទ្រង់ទ្រាយធំជាលើកទី២ ដើម្បីបំបែកឯកគ្គទកម្មពិភពលោក Guinness World Record ។ នេះបើតាមកិច្ចប្រជុំដែលបានរៀបចំឡើងដោយសហភាពសហព័ន្ធយុវជនកម្ពុជាខេត្តសៀមរាបនាពេលថ្មីៗនេះ។
គេនៅចាំបានថា នៅក្នុងព្រឹត្តិការណ៍អង្គរសង្ក្រាន្តថ្ងៃទី ១៥ មេសា ឆ្នាំ ២០១៥ យុវជនកម្ពុជាប្រមាណ ២,០១៥ នាក់ បានចូលរួមរាំ ចង្វាក់ម៉ាឌីហ្សុន ដើម្បីបំបែកកំណត់ត្រាឯកទគ្គកម្មថ្មីរបស់ពិភពលោក ដោយបានទម្លាក់តំណែងកំណត់ត្រាពិភពលោក នៃការរាំចង្វាក់ម៉ាឌីហ្សុន របស់អូស្ត្រាលី ដែលមានអ្នកចូលរួមរាំ ១,១៥៥នាក់កាលពីឆ្នាំ២០១៤។
យ៉ាងណាមិញ ការរៀបចំយុទ្ធនាការបំបែកឯកគ្គទកម្មថ្មី២ទៀតនេះ គឺស្មារតីខួប១០ឆ្នាំនៃមហាព្រឹត្តិការណ៍អង្គរសង្ក្រាន្តក្រោមប្រធានបទ «ក្ដីស្រមៃ និងក្ដីសង្ឃឹម» ដែលនាំមកនូវមោទកភាពនៃប្រជាជាតិកម្ពុជា ក្នុងលើកស្ទួយផ្សព្វផ្សាយពីកេរ្តិ៍ដំណែលអរិយធម៌ វប្បធម៌ ទំនៀមទម្លាប់ និងស្នាដៃរបស់បុព្វបុរសខ្មែរយើងបានបន្សល់ទុកឱ្យ។
សូមជម្រាបថា សហភាពសហព័ន្ធយុវជនកម្ពុជា បាននិងកំពុងបញ្ជ្រាបការផ្សព្វផ្សាយពីព្រឹត្តិការណ៍អង្គរសង្ក្រាន្តឆ្នាំ២០២៣ ក្នុងយុទ្ធនាការប្រកួតរាំម៉ាឌីហ្សុន បំបែកឯកគ្គទកម្មពិភពលោក និងយុទ្ធនាការ Beyond The Games (លើសពីការប្រកួត) បត់បេះដូងក្រដាស បំបែកឯកគ្គទកម្មពិភពលោក ១ លានបេះដូង «បេះដូងលោតក្នុងចង្វាក់តែមួយ» ទៅដល់មន្ទីរ-អង្គភាព ស្ថាប័ន កងកម្លាំងប្រដាប់អាវុធ៣ប្រភេទ ដើម្បីបន្តធ្វើការផ្សព្វផ្សាយឱ្យកាន់តែទូលំទូលាយ និងផុសផុល ដល់បងប្អូនប្រជាពលរដ្ឋ សិស្សានុសិស្សនៅតាមគ្រឹះស្ថានឧត្តមសិក្សារដ្ឋ និងវិស័យឯកជន ព្រមទាំងសាធារណជននានា ក្នុងការចូលរួមយុទ្ធនាការមួយនេះផងដែរ៕