កាលពីពេលថ្មីៗនេះមហាសេដ្ឋីលេខមួយពិភពលោក Elon Musk និងជានាយកប្រតិបត្តិក្រុមហ៊ុន Tesla បានប្រកាសចង់ទិញក្លិបបិសាចក្រហម Man United ដោយបានសរសេរនៅលើ Twitter ថា៖«ខ្ញុំក៏ចូលរួមទិញ Manchester United ដែរ,សូមស្វាគមន៍»។
ខណ:ក្រុមហ៊ុនវិនិយោគរបស់កាតា (QSI) រួមទាំងក្រុមហ៊ុនដែលមានមូលដ្ឋាននៅប្រទេសអារ៉ាប៊ីសាអូឌីត ក៏ដូចជាសហរដ្ឋអាមេរិក កំពុងតែប្រជែងគ្នាដេញថ្លៃដើម្បីទិញក្លិប Man United នៅថ្ងៃសុក្រ ទី១៧ ខាងមុននេះ។
បច្ចុប្បន្នបើយោងតាមទស្សនាវត្តី Forbes លោក Elon Musk ដែលមានវ័យ៥១ឆ្នាំ មានទ្រព្យសម្បត្តិតម្លៃ ២៧៤ពាន់លានដុល្លារ ពោលគឺជាមហាសេដ្ឋីដែលមានទ្រព្យលើសគេលើពិភពលោក ព្រមទាំងបានទិញភាគហ៊ុនរបស់ Twitter ចំនួន ៧៣,៥លានហ៊ុន។
(យ៉ាងណាក៏ដោយតាមគំនិតខ្ញុំ៖«Man United មិនគួរលក់ក្លិបឱ្យ Elon Musk ឡើយ»មូលហេតុគឺដោយសារតែលោក Elon Musk មិនមែនជាអ្នកស្រលាញ់កីឡាពិតប្រាកដ, មិនសូវយល់ពីកីឡាច្បាស់លាស់ ហើយគោលបំណងទិញក្លិប Man United គឺដើម្បីធ្វើអាជីវកម្មប៉ុណ្ណោះ។
ជាក់ស្តែងអ្នកគាំទ្រ Man United ផ្ទាល់ធ្លាប់យល់អារម្មណ៍នេះច្បាស់រួចមកហើយ ជុំវិញត្រកូល Glazers ទិញក្លិប Man United ដើម្បីធ្វើអាជីវកម្ម គិតតែពីចំណេញ ប៉ុន្តែមិនដែលតម្រូវចិត្តអ្នកគាំទ្រសោះ)។
បច្ចុប្បន្នតម្លៃហាងឆេងលើទីផ្សាររបស់ក្លិបបិសាចក្រហម Man United ត្រឹមតែ ២,៨ ពាន់លានដុល្លារប៉ុណ្ណោះ ប៉ុន្តែលោក Glazers ប្រធានក្លិប Man United បានដាក់លក់ក្នុងតម្លៃរហូតដល់ ៤,៨៩ ពាន់ដុល្លារអាមេរិកឯណោះ។ គោលបំណងនៃការដាក់ថ្លៃខ្ពស់បែបនេះ គឺដោយសារលោកគឺមិនចង់លក់ឲ្យអ្នកផ្សេងក្រៅពីត្រកូល Glazers របស់លោកឡើយ។
គួរដឹងថាត្រកូល Glazers បានទិញយកក្លិបបិសាចក្រហមដែលទទួលបានការគាំទ្រច្រើនបំផុតមួយលើលោកមកកាន់កាប់ក្នុងតម្លៃ ៧៩០ លានផោនកាលពីឆ្នាំ ២០០៥។ ខណ: Manchester United គឺជាក្លិបបាល់ទាត់ដ៏ល្អបំផុតមួយក្នុងពិភពលោក។ ក្លិបនេះធ្លាប់ឈ្នះជើងឯកអង់គ្លេសច្រើនជាងគេគឺរហូត ២០ដង និងធ្លាប់ឈ្នះជើងឯក Champion League ចំនួន ៣ដង។
នេះគ្រាន់តែជាគំនិតខ្ញុំមួយប៉ុណ្ណោះ ចុះអ្នកវិញ?
ប្រិយមិត្តត្រយង ដែលចង់ចែករំលែកនូវបទពិសោធល្អៗ និងស្ថានភាពសង្គមនានា ព្រមទាំងរឿងរ៉ាវស្នេហាផ្សេងៗ ក៏អាចផ្ញើអត្ថបទមកចុះផ្សាយនៅសារព័ត៌មានត្រយងបាន ដោយទាក់ទងមកតាមរយៈលេខទូរសព្ទ ភ្ជាប់នឹងតេឡេក្រាមដូចខាងក្រោមនេះ៖
- ០១២ ៧៨៧ ៦៦៣
- ០១២ ៥៦៧ ៤៦៨
- ០៩៩ ៥៨៨ ៨៨០