សិល្បៈជាតិ៖ តារាចម្រៀងខ្ពស់ស្រឡះលោក ជី ដេវីត និងគូស្នេហ៍កញ្ញា ទេព បូព្រឹក្ស ក្រោយសាងទំនាក់ទំនងស្នេហាផ្អែមល្ហែមជាមួយគ្នាជាច្រើនឆ្នាំ នៅពេលនេះចំណងស្នេហារបស់អ្នកទាំងពីរកាន់តែរឹងមាំនិងផ្អែមល្ហែមថែមទៀត ព្រោះទើបនឹងទទួលបានកូនប្រុសដ៏ស្រស់ស្អាតម្នាក់ជាចំណងដៃស្នេហា។
អ្នកគាំទ្រនៅមិនទាន់ភ្លេចនៅឡើយទេកាលពីថ្ងៃ នៅថ្ងៃទី២១ ខែតុលា ឆ្នាំ២០២២ តារាចម្រៀងទេព បូព្រឹក្សបានចេញមកប្រកាសជាផ្លូវការថាអ្នកនាងកំពុងតែពពោះកូនដំបូងជាមួយនឹងគូស្នេហ៍គឺលោក ជី ដេវីត ដែលដំណឹងនេះធ្វើឱ្យមហាជន ជាពិសេសអ្នកគាំទ្ររបស់អ្នកទាំងពីររំភើបចិត្តជាខ្លាំង។
គូស្នេហ៍ដែលតែងតែបង្ហាញក្ដីស្រលាញ់ដោយមិនលាក់លៀមរហូតមានពេលខ្លះធ្វើឱ្យអ្នកអត់គូលួចច្រណែននោះ ទើបនឹងទទួលស្វាគមន៍សមាជិកថ្មី ក្រោយពេលដែលអ្នកម៉ាក់ ទេព បូព្រឹក្សសម្រាលកូនប្រុសដោយសុខសុវត្ថិភាពនៅថ្ងៃទី១៦ ខែកុម្ភៈម្សិលមិញនេះ។
ម្ចាស់បទ«ចុមអាអូនអត់ដេក»បានចែករំលែកដំណឹងដ៏រីករាយនេះជាមួយនឹងអ្នកគាំទ្ររបស់ខ្លួននៅលើបណ្ដាញសង្គមដោយភ្ជាប់ជាមួយនឹងពាក្យក្នុងចិត្តថា៖««ស្វាគមន៍កូនប៉ាៗមកកាន់ពិភពលោក កូន Dinosaur ជំរាបសួរអ៊ុំពូមីង លោកតាលោកយាយ សូមផ្តល់ក្តីស្រលាញ់អោយអូនផង អូនឈ្មោះ ៖ ទេព បញ្ចវរាប ហៅក្រៅ ( Albert ) អូនសុខភាពល្អ និងសង្ហាដូចប៉ាៗអូន ហើយម៉ាក់ផ្តាំថា M/V ( Goddess ) កាលអូននៅក្នុងពោះនឹង Post នៅថ្ងៃស្អែកម៉ោង៧យប់ នៅ Page ម៉ាក់ៗៗ»។
ក្រោយតារាចម្រៀងរូបនេះបង្ហោះពាក្យពេចន៍ក្នុងចិត្តរួចគេឃើញមានតារាចម្រៀង តារាសម្ដែង ពិធីករជាច្រើនរូបបានចូលរួមអបអរសាទរដល់លោកប៉ាអ្នកម៉ាក់ថ្មោងថ្មី ដោយក្នុងនោះដែរក៏មានមហាជននិងអ្នកគាំទ្ររបស់តារាទាំងពីរដួងចូលរួមអបអរសាទរចំពោះវត្តមានរបស់កូនប្រុសតូចរបស់អ្នកទាំងពីរផងដែរ។
