សិល្បៈជាតិ៖ មុននេះបន្តិចសារព័ត៌មានត្រយង បានទទួលដំណឹងមកថា តារាកំប្លែង នាយក្ដឹប បានទទួលមរណភាពនាយប់ថ្ងៃទី ១៨ ខែកុម្ភៈ ឆ្នាំ ២០២៣ នេះ បន្ទាប់ពីសភាពជំងឺប្រចាំកាយរបស់លោកកាន់តែធ្ងន់ធ្ងរជាងមុន រហូតមិនអាចព្យាបាលបាន។
ផ្អែកលើហ្វេសប៊ុករបស់កូនស្រីនាយ ក្ដឹប បានប្រាប់ដំណឹងមកកាន់មហាជនថា ៖ «ឪពុករបស់ខ្ញុំគាត់បានស្លាប់ លាចាកលោកចោលពួកខ្ញុំហើយ នាវេលាម៉ោង 9 និង 45 នាទីថ្ងៃទី 18 ខែកុម្ភៈ 2023»។
មុនពេលទទួលមរណភាពកូនស្រី នាយក្ដឹប ក៏បានប្រាប់ពីស្ថានភាពជំងឺឪពុកឱ្យមហាជនបានដឹងដែរថា លោកមានរាងកាយទ្រុឌទ្រោម និងដុនដាប ហើយសភាពរោគជំងឺក៏កាន់តែធ្ងន់ធ្ងរ នៅសល់តែការរង់ចាំពេលវេលាចុងក្រោយតែប៉ុណ្ណោះ។ កន្លងមក នាយក្ដឹប ធ្លាប់មានជំងឺប្រចាំកាយដូចជា ទឹកក្នុងសួត ជំងឺបេះដូង លើសឈាម ដាច់សរសៃឈាម ស្លាប់មួយចំហៀងខ្លួនជាដើម និងធ្លាប់បានចូលសង្គ្រោះបន្ទាន់នៅមន្ទីរពេទ្យកាល់ម៉ែត្រជាច្រើនដងផងដែរ។
ក្រោយពីទទួលបានដំណឹងដ៏សែនក្រៀមក្រំនេះ មហាជន និងសិល្បករជាច្រើននាក់ បានចូលរួមសោកស្ដាយចំពោះការបាត់បង់អ្នកកំប្លែងដ៏មានប្រជាប្រិយភាពប្រចាំប្រទេស។ លោក ហេង ឡុង ប្រធានសមាគមមិត្តសិល្បៈស្ម័គ្រចិត្តជួយសង្គម ក៏បានបង្ហោះរំលែកទុក្ខដែរថា ៖ «ខ្ញុំបាទ និងសិល្បករ សិល្បការិនី សូមចូលរួមរំលែកមរណទុក្ខចំពោះគ្រួសារនាយក្ដឹប ដែលបានចែកឋាននៅវេលាម៉ោង 9 និង45 នាទី យប់ នៅថ្ងៃទី ១៨ ខែ កុម្ភៈ ឆ្នាំ ២០២៣ សពតម្កល់នៅផ្ទះរបស់គាត់។ សូមបងប្អូនចូលបុណ្យតាមរយៈទូរស័ព្ទកូនរបស់គាត់ផ្ទាល់លេខ 011212217»។
សូមជម្រាបថា នារាត្រីថ្ងៃទី ១៨ នេះ ក្រុមគ្រួសាររបស់នាយ ក្ដឹប កំពុងរៀបចំពិធីបុណ្យសពតាមប្រពៃណីព្រះពុទ្ធសាសនា៕
