សារព័ត៌មានរបស់វៀតណាម បានប្រកាសនៅរសៀលថ្ងៃពុធ ទី២២ ខែកុម្ភៈ ឆ្នាំ២០២៣ នេះថាស្មាត់ វឿន វាសនា របស់សមាគមកីឡាបាល់ទះវិសាខា និងជាសមាជិកក្រុមបាល់ទះជម្រើសជាតិកម្ពុជា នឹងផ្ទេរទៅចូលរួមក្រុមចាស់ Lavie Long An សមាជិកលីគបាល់ទះកំពូលរបស់ប្រទេសវៀតណាម។
ពានរង្វាន់បាល់ទះជើងឯកនៃប្រទេសវៀតណាម ផ្នែកបុរសបានចាប់ពូលរួចរាល់ហើយ ដោយពូល A មានក្រុមSanest Khanh Hoa , Hanoi , Ha Tinh , City. Ho Chi Minh City និង Da Nang ហើយពូល B មាន Ninh Binh LienVietPostBank , Binh Duong Building Materials , Bien Phong , The Cong និង Lavie Long An។
កីឡាករ វឿន វាសនា នឹងចេញដំណើរទៅចូលរួមជាមួយក្រុម Lavie Long An នៅពេលឆាប់ៗ ពោលគឺ ក្រោយចប់បេសកម្មជាមួយក្រុមជម្រើសជាតិកម្ពុជា ប្រកួតមិត្តភាពអន្តរជាតិជាមួយក្រុម U19 បារាំងទាំង២ជើង។
កាលពីឆ្នាំមុន វឿន វាសនា បានចូលរួមជាមួយក្រុម Lavie Long An ហើយបង្ហាញខ្លួនគ្រប់ការប្រកួត បន្ទាប់ពីរូបគេជួយក្រុមជម្រើសជាតិកម្ពុជា ដណ្តើមបានមេដាយសំរឹទ្ធិ ក្នុងព្រឹត្តិការណ៍កីឡាស៊ីហ្គេមឆ្នាំ២០២១ (លើកមកធ្វើនៅឆ្នាំ២០២២) ក្នុងរដ្ឋធានីហាណូយ ប្រទេសវៀតណាម៕
