លោក អួន ឡឺត ទៅលាងចាននៅភោជនីយដ្ឋានចិនពេលលោកទើបមកដល់សហរដ្ឋអាមេរិកនៅឆ្នាំ១៩៨៣។ លោកបានខិតខំរៀនសូត្រយកសញ្ញាប័ត្រពីសាកលវិទ្យាល័យ Widener University នៅរដ្ឋ Pennsylvania ។ នៅឆ្នាំ២០០២ លោកបានក្លាយខ្លួនជាបុគ្គលិកម្នាក់ក្នុងកងការពារសន្តិសុខប្រធានាធិបតីសហរដ្ឋអាមេរិក។ នេះបើតាមវីដេអូកិច្ចសម្ភាសន៍រវាងVOA និងលោក អួន ឡឺត ( ជនភៀសខ្លួនខ្មែរម្នាក់សរសេរសៀវភៅអំពីការតស៊ូរហូតដល់បានចូលធ្វើការក្នុងកងការពារប្រធានាធិបតីអាមេរិក (voanews.com) ។
បើតាមកិច្ចសម្ភាសន៍នោះ លោក អួន ឡឺត បានឱ្យដឹងថាលោកបានចូលបម្រើការងារជាកងការពារសន្តិសុខប្រធានាធិបតីអាមេរិក ចំនួន៤រូបរហូតដល់សព្វថ្ងៃ។ ប្រធានាធិបតីដែលលោក អួន ឡឺត បានការពារសន្តិសុខនោះ រាប់ចាប់តាំងពីលោកប្រធានាធិបតី ប៊ូស, អូបាម៉ា, ត្រាំ និងប្រធានាធិបតី ចូ បៃដិន នាបច្ចុប្បន្ន។ ក្នុងអាជីពជាកងសន្តិសុខប្រធានាធិបតីអាមេរិក លោកមានបទពិសោធប្រមាណ២០ឆ្នាំមកហើយ។
សារព័ត៌មានត្រយង សូមស្រង់យកផ្នែកខ្លះនៃកិច្ចសម្ភាសន៍របស់VOA ដែលលោក អួន ឡឺត ថ្លែងឱ្យដឹងថា «ខ្ញុំជួបមុខដំបូង គឺប្រធានាធិបតី ប៊ូស ខ្ញុំនិយាយមិនចេញទេ ដូចពាក្យគេថាក្ដិចខ្លួនឯងថាវាជាការពិតឬសុបិន មិនសង្ឃឹម! យើងមកពីស្រុក[ខ្មែរ]គ្មានស្អីអាលីង ឥលូវទៅឈរជិតមនុស្សដែលមានអំណាចលើពិភពលោក មិនមែនឈរធម្មតា មានការពារ មានទាំងកាំភ្លើង ឈរជិត»។
តាមរយៈភារកិច្ចជាសន្តិសុខប្រធានាធិបតី លោក អួន ឡឺត ក៏មានឱកាសមកប្រទេសកម្ពុជាជាលើកដំបូងជាមួយអតីតប្រធានាធិបតីអាមេរិក បារ៉ាក់ អូបាម៉ា កាលពីឆ្នាំ២០១២ ដែលកម្ពុជាធ្វើជាប្រធានអាស៊ាននាកាលណោះ។ លោករំលឹកថា«ឆ្នាំ២០១២ហ្នឹងជាលើកទីមួយហើយដែលខ្ញុំទៅ[កម្ពុជា]ជាមួយប្រធានាធិបតីអូប៉ាម៉ា។ កាលហ្នឹងខ្ញុំធ្វើការជាមួយឆ្កែដែរ។ កាប៉ាល់ហោះចុះចតពោធិ៍ចិនតុង ខ្ញុំក៏ចេះតែនឹកឃើញរឿងអតីតកាល»។
លោករម្លឹកថាពេលមកដល់អាកាសយានដ្ឋានអន្តរជាតិភ្នំពេញ លោកបានជួបមន្រ្តី និងបុគ្គលិកខ្មែរមួយចំនួន ហើយពួកគេមិនបានដឹងទេថាលោកជាខ្មែរ។ លោកបានរំលឹកប្រាប់លោក ប៉ូច រាសី អ្នកកាសែតជើងចាស់របស់VOAថា«ខ្ញុំមាឌធំជាងគេ អត់សក់ ដល់តែចាប់ផ្ដើមនិយាយទៅ គេថាអូហ៍បងឯងនិយាយខ្មែរច្បាស់ម្លេះ! ខ្ញុំថាខ្ញុំខ្មែរ! គេថាអូហ៍និយាយខ្មែរច្បាស់! ខ្ញុំថាខ្ញុំខ្មែរ! ខ្ញុំកើតស្រុកខ្មែរ រហូតជំនាន់ ប៉ុល ពត មកដល់អាមេរិក»។
បើគ្មានការប្រែប្រួលទេ យូរបំផុតនៅខែតុលា ឆ្នាំ២០២៣នេះ លោក អួន ឡឺត នឹងចូលនិវត្តន៍ពីការងារជាកងសន្តិសុខប្រធានាធិបតីអាមេរិកដែលជាការងារដំបូងបំផុតសម្រាប់កូនខ្មែរលើទឹកដីអាមេរិក។ ការចូលនិវត្តន៍ គឺជាឱកាសដែលលោកចង់វិលមកជួយមាតុប្រទេស ដោយលោកបានមានប្រសាសន៍ថា«គំនិតខ្ញុំហ្នឹងចង់ទៅស្រុកខ្មែរ ខ្ញុំស្រលាញ់ឆ្កែ ខ្ញុំចង់យកចំណេះដែលខ្ញុំរៀនហ្នឹងទៅបង្រៀននៅស្រុកខ្មែរយើង»។
លោក អួន ឡឺត បានសរសេរសៀវភៅមួយក្បាលរៀបរាប់អំពីដំណើរជីវិតរបស់លោក ដែលមានចំណងជើងជាភាសាអង់គ្លេសថា៖ «A REFUGEE’S AMERICAN DREAM From the Killing Fields of Cambodia to the U.S. Secret Service» ឬជាខ្មែរថា «សុបិនអាមេរិកាំងរបស់ជនភៀសខ្លួនម្នាក់ ពីវាលពិឃាតនៅកម្ពុជា ដល់កងការពារសន្តិសុខប្រធានាធិបតី»៕
