សមាគមបាល់ទះវិសាខា បានប្រកាសនៅព្រឹកថ្ងៃព្រហស្បត្តិ៍ ទី២៣ ខែកុម្ភ: ឆ្នាំ២០២៣ ថាកីឡាករ វឿន វាសនា នឹងផ្ទេរទៅចូលរួមជាមួយក្លិបបាល់ទះ Lavie Long An សមាជិកលីគបាល់ទះកំពូលរបស់ប្រទេសវៀតណាម រយៈពេលខ្លី។
បើយោងតាមការបញ្ជាក់របស់លោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធបាល់ទះកម្ពុជាបានលើកឡើងថា៖«កីឡាករ វឿន វាសនា នឹងផ្ទេរទៅចូលរួមជាមួយក្លិបបាល់ទះ Lavie Long An របស់វៀតណាម ជាលើកទី២ ដោយឆ្នាំមុនតម្លៃខ្លួន១ម៉ឺនដុល្លារ ខណ:លើកនេះតម្លៃខ្លួនគុណនឹង២ ធ្វើឲ្យ វាសនា ក្លាយជាកីឡាករបាល់ទះខ្មែរដែលមានតម្លៃខ្លួនថ្លៃជាងគេ»។
ចំពោះទីផ្សារដោះដូរកីឡាកររបស់ វឿន វាសនា ទៅកាន់ក្លិបវៀតណាម គឺបានឆ្លងកាត់ សហព័ន្ធកីឡាបាល់ទះកម្ពុជា, សហព័ន្ធកីឡាបាល់ទះអាស៊ី ក៏ដូចជាសហព័ន្ធកីឡាបាល់ទះពិភពលោកផងដែរ។
គួរដឹងថាពានរង្វាន់បាល់ទះជើងឯកនៃប្រទេសវៀតណាម ផ្នែកបុរសបានចាប់ពូលរួចរាល់ហើយ ដោយពូល A មានក្រុមSanest Khanh Hoa , Hanoi , Ha Tinh , City. Ho Chi Minh City និង Da Nang ហើយពូល B មាន Ninh Binh LienVietPostBank , Binh Duong Building Materials , Bien Phong , The Cong និង Lavie Long An។
កីឡាករ វឿន វាសនា ចេញដំណើរទៅចូលរួមជាមួយក្រុម Lavie Long An នៅព្រឹកថ្ងៃព្រហស្បត្តិ៍ ទី២៣ ខែកុម្ភ: ឆ្នាំ២០២៣ វេលាម៉ោង ៥:០០ព្រឹក ពោលគឺ៨ម៉ោងប៉ុណ្ណោះ ក្រោយចប់បេសកម្មជាមួយក្រុមជម្រើសជាតិកម្ពុជា ប្រកួតមិត្តភាពអន្តរជាតិជាមួយក្រុម U19 បារាំងទាំង២ជើង។
កាលពីឆ្នាំមុន វឿន វាសនា បានចូលរួមជាមួយក្រុម Lavie Long An ហើយបង្ហាញខ្លួនគ្រប់ការប្រកួត បន្ទាប់ពីរូបគេជួយក្រុមជម្រើសជាតិកម្ពុជា ដណ្តើមបានមេដាយសំរឹទ្ធិ ក្នុងព្រឹត្តិការណ៍កីឡាស៊ីហ្គេមលើកទី៣១ ឆ្នាំ២០២២ ក្នុងរដ្ឋធានីហាណូយ ប្រទេសវៀតណាម៕
