សិល្បៈ​ជាតិ​៖​ បើ​និយាយ​ពី​ចម្រៀង​កាយវិ​កា​រឿង​ ទុំទាវ​ របស់​ផលិតកម្ម​ហង្សមាស​ ជឿ​ថា​ប្រិយមិត្ត​អ្នក​គាំទ្រ​ទាំង​អស់​គ្នា​ច្បាស់​ជា​ចង​ចាំ​ជាក់​ជា​មិន​ខាន​ ព្រោះ ស៊ីឌី​ និង​វីស៊ីឌី​ មួយ​វ៉ុល​នេះ​មាន​ប្រជាប្រិយ​ភាព​ខ្លាំង​មែន​ទែន​ក្នុង​ឆ្នាំ​ ២០០០​ ដែល​មាន​ការ​ចូល​រួម​សម្ដែង​តួ​ទុំ​ ដោយ​លោក​ ទេព​ រិនដារ៉ូ​ និង​តួ​ទាវ​ ដោយ​អ្នក​នាង​ នារី​ រតន៍​គន្ធា​។ ក្រោយ​មក​អ្នក​ទាំង​ពីរ​ក៏​លែង​បាន​សម្ដែង​ជា​មួយ​គ្នា​រហូត​ដល់​បច្ចុប្បន្ន​។​

យ៉ាង​ណា​មិញ​ កាល​ពី​ថ្ងៃ​ទី​ ២២​ ខែ​កុម្ភៈ​ ឆ្នាំ​ ២០២៣​នេះ​ តួ​អង្គ​ទាំង​ពីរ​បាន​វិល​មក​ជួប​គ្នា​វិញ​ ដូច​តាម​បំណង​របស់​អ្នក​គាំទ្រ​ ដោយ​លោក​ ទេព​ រិន​ដារ៉ូ​ បាន​បង្ហាញ​សកម្មភាព​ស្និទ្ធស្នាល​ជាមួយ​អ្នក​នាង​ នារី​ រតន៍​គន្ធា​ នៅ​ក្នុង​កម្មវិធី​ក្រុង​ពាលី​រឿង​ភាគ​ «អប្សរា​មហា​អង្គរ​» នា​ស្ថានីយ​ទូរទស្សន៍​ហង្ស​មាស​។​ ដោយ​ឡែក​ អ្នក​នាង​ នារី​ រតន៍​គន្ធា​ បាន​ចូល​ប្រឡូក​សិល្បៈ​ភាពយន្ត​តាំង​ពី​ឆ្នាំ​ ១៩៨៧​ រហូត​ដល់​ឆ្នាំ​ ២០០០​ អ្នក​នាង​ក៏​បាន​បញ្ចប់​អាជីព​មួយ​នេះ​ទៅ​វិញ​ ដោយ​សារ​តែ​អ្នក​នាង​ត្រូវ​រៀបការ​មាន​ស្វាមី​ឈ្មោះ​ ផល្លី​ ជា​ទាហាន​ធ្វើ​ការ​លើ​កប៉ាល់​ និង​បាន​ចេញ​ទៅ​រស់​នៅ​សហរដ្ឋអាមេរិក​នៅ​ឆ្នាំ​ ២០០១​។​

វិល​មក​ថត​ភាពយន្ត​ឡើង​វិញ ​នៅ​ពេល​នេះ​ អ្នក​នាង​ នារី​ រតន៍​គន្ធា​ នឹង​សម្ដែង​ជា​តួ​អង្គ​ដែល​មាន​ឈ្មោះ​ ជម្ពូ​ ជា​ស្ត្រី​ដែល​មាន​ចំណេះដឹង​ខាង​មេផ្ទះ​ មាន​របៀបរៀបរយ​អប់រំ​មនុស្ស​នៅ​ជុំវិញ​ខ្លួន​។ អ្នក​នាង​នឹង​សម្តែង​ប៉ះ​គ្នា​ជាមួយ​លោក​ ទេព​ រិន​ដារ៉ូ​ ជា​តួអង្គ​បណ្ឌិត​អក្សរ​សាស្ត្រ​ ឈ្មោះ​ ខី​ណា​ព្រាហ្មណ៍​ និង​មិត្ត​ភ័ក្ក​ចាស់​ម្នាក់​ទៀត​គឺ​ អ្នក​នាង​ អម្ពរ​ ទេវី​ ជា​តួអង្គ​ព្រះនាម​ អ្នក​អង្គ​ម្ចាស់​ស្ត្រី​ កាមល​ ជា​រាជ​នាដ​កា​អប្សរា​ ជា​រាជ​គ្រូ​បង្ហាត់​បង្ហាញ​ព្រះកេរមរតក​ដ៏​មហាអស្ចារ្យ​របស់​ជាតិ​ខ្មែរ​។​

សូម​ជម្រាប​ថា​ នៅ​ពេល​តួអង្គ​ ទុំ​ទាវ​ បាន​វិល​មក​សម្ដែង​ជុំ​គ្នា​វិញ​ក្នុង​ឆ្នាំ​ ២០២៣​នេះ ​គឺ​ពិត​ជា​ធ្វើ​ឱ្យ​មហាជន​អ្នកគាំទ្រ​ភ្ញាក់​ផ្អើល​ខ្លាំង​ ហើយ​នេះ​ក៏​ជា​បំណង​ធំ​មួយ​របស់​អ្នក​ដឹក​នាំ​រឿង​ផ្ទាល់​ គឺ​ឯកឧត្តម​ ហ្វៃ​ សំអាង​។​ ហើយ​អ្វី​ដែល​គេ​ចាប់​អារម្មណ៍​ខ្លាំង​ទៀត​នោះ​ គឺ​តារា​ជើង​ចាស់​ទាំង​ពីរ​រូប​នេះ​ នៅ​តែ​រក្សា​បាន​នូវ​ចំណង​មិត្ត​ភាព​ស្អិត​រមួល​អស់​រយៈ​ពេល​ ៣០​ ឆ្នាំ​មក​ហើយ​ ពោល​គឺ​ចាប់​តាំង​ពី​អ្នក​ទាំង​ពីរ​បាន​សម្ដែង​រឿង​ជុំ​គ្នា​ជា​ច្រើន​រឿង​កាល​អំឡុង​ទសវត្សរ៍​៨០​និង៩០​ មក​ម្ល៉េះ​៕

Share.