សិល្បៈ​ជាតិ​៖​ សារព័ត៌មាន​ត្រយង​បាន​ទទួល​ដំណឹង​មក​ថា​ ផលិតកម្ម Galaxy​ Navatra​ បាន​ត្រៀម​ផលិត​បទ​ចម្រៀង​សម្រាប់​ព្រឹត្តិការណ៍​ ស៊ីហ្គេម​លើក​ទី​ ៣២​ និង​អាស៊ាន​ប៉ារ៉ា​ហ្គេម​លើក​ទី​ ១២​ ដែល​នៅ​ក្នុង​មាន​តារា​ចម្រៀង​ចំនួន​ ៤​ ច្រៀង​រួម​គ្នា​ដូច​ជា​៖​ ឧកញ៉ា​ ព្រាប​ សុវត្ថិ​ ឧកញ៉ា​ ខេមរៈ​ សិរីមន្ត​ លោក​ ខេម​ កញ្ញា​ តន់​ ចន្ទ​សីម៉ា​។​

យ៉ាង​ណា​មិញ​ គេ​បាន​ដឹង​ថា​ បទ​ចម្រៀង​សម្រាប់​ព្រឹត្តិការណ៍​ខាង​លើ​នេះ​ មាន​ការ​ចូល​រួម​និពន្ធ​ និង​ដឹកនាំ​សម្រិត​ការ​ផលិត​ដោយ​ថ្នាក់​ដឹកនាំ​កំពូល​ៗរបស់​ផលិតកម្ម​ដូច​ជា​ អ្នកឧកញ៉ា​ ឡេង​ ណាវ៉ាត្រា​ ឧកញ៉ា​ យឹម​ តាស្រង់​ ឯកឧត្តម​ ហ៊ឹម​ នភា​ ឯកឧត្តម​ ខេមរៈ​ ភារុណ​ លោក​ សុខ​ ជំនោរ​ និង​លោក​ ខាំ​ ភូរិ​។​ នេះ​គឺ​ជា​លើក​ទី​មួយ​ ហើយ​ក៏​ជា​ប្រវត្តិ​សម្រាប់​កំពូល​តារា​ចម្រៀង​ទាំង​បួន​របស់​ផលិតកម្ម​ ហ្គាឡាក់​ ណាវ៉ាត្រា ​ផងដែរ​។

សូម​ជម្រាប​ថា​ គិត​ត្រឹម​ថ្ងៃ​ទី​២៤​ ខែ​កុម្ភៈ​ ឆ្នាំ​២០២៣​ នេះ​ គឺ​នៅ​សល់​តែ​៧០​ថ្ងៃ​ទៀត​ប៉ុណ្ណោះ​ នឹង​ឈាន​ដល់​ព្រឹត្តិការណ៍​ស៊ីហ្គេម​លើក​ទី​៣២​ (32nd​ SEA​ Games​) និង​អាស៊ាន​ប៉ារ៉ា​ហ្គេម​លើក​ទី​១២​ (12th​ ASEAN​ Para​ Games​) ក្រោម​ពាក្យ​ស្លោក​ “កីឡា​រស់​ក្នុង​សន្តិភាព​” ហើយ​កម្ពុជា​យើង​នឹង​ធ្វើ​ជា​ម្ចាស់ផ្ទះ​ការ​ប្រកួត​ចាប់​ពី​ថ្ងៃទី​០៥​ ដល់​ថ្ងៃទី​១៧​ ខែ​ឧសភា​ ឆ្នាំ​២០២៣​ និង​ការ​ប្រកួត​កីឡា​ ASEAN​ Para​ Games​ លើក​ទី​១២​ ចាប់​ពី​ថ្ងៃ​ទី​៣​ ដល់​ថ្ងៃ​ទី​៩​ ខែមិថុនា​ ឆ្នាំ​២០២៣​ ខាង​មុខ​នេះ​៕​

Share.